ផុតឱសានវាទ តើសហគមន៍អន្តរជាតិនឹងធ្វើអ្វីទៀត ?!
ក្រុងដាម៉ាស អាចនឹងត្រូវប្រឈមនឹងទណ្ឌកម្មសេដ្ឋកិច្ច និងវិធានការមួយចំនួន ពីសំណាក់សម្ព័ន្ធអារ៉ាប ព្រោះស៊ីរីមិនបានគោរពតាមផែនការដោះស្រាយវិបត្តិ ដែលតម្រូវឲ្យរបបដឹកនាំលោក បាស្ហា អាល់ អាសាទ បញ្ឈប់ការបង្ក្រាបហិង្សា និងដកកម្លាំងយោធាចេញពីទីសាធារណៈ។ ឱសានវាទ ដែលកំណត់ដោយសម្ព័ន្ធអារ៉ាប បានចូលដល់ទីបញ្ចប់តាំងពីអាធ្រាត្រយប់មិញម្ល៉េះ។ សេចក្តីថ្លែងការណ៍មួយ នឹងត្រូវផ្សព្វផ្សាយនៅថ្ងៃនេះ។ ប៉ុន្តែនៅក្នុងប្រទេស មេដឹកនាំផ្តាច់ការស៊ីរីមិនអើពើឡើយ។ តាមរយៈបទសម្ភាសន៍ ជាមួយនឹងសារព័ត៌មានអង់គ្លេស Sunday Times លោក Bachar el-Assad បានផ្គើនតបវិញ នៅយប់មិញថា ស៊ីរី មិនចុះញ៉ម នឹងប្រតិបត្តិការយោធាអន្តរជាតិជាយថាហេតុមួយណាឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
សម្ព័ន្ធអារ៉ាបបានព្យួរសមាជិកភាពស៊ីរី ពីអង្គការ កាលពីថ្ងៃទី ១២វិច្ឆិកា រួចទៅហើយ ! សេចក្តីសម្រេចនោះ គឺថាជាស្នូរជួងដាស់សតិមេដឹកនាំផ្តាច់ការស៊ីរី ថានឹងអាចមានទណ្ឌកម្មការទូត ឬសេដ្ឋកិច្ច បន្តបន្ទាប់គ្នា។ ពេលនេះ សម្ព័ន្ធអារ៉ាបមិនទាន់សម្រេចចិត្តច្បាស់លាស់នៅឡើយទេ។
សម្ព័ន្ធអារ៉ាបល្បីឈ្មោះថាជាអង្គការមួយដែលមានសមាជិកមិនសូវចុះសម្រុងនឹងគ្នា ប៉ុន្តែក្រោមការដឹកនាំរបស់ប្រទេសកាតារ សម្ព័ន្ធអារ៉ាបបានសម្រេចរួមគ្នាដាក់សម្ពាធយ៉ាងខ្លាំងលើប្រទេសស៊ីរី។
សម្ព័ន្ធអារ៉ាបទំនងជានឹងត្រូវ ប្រកាសអំពីវិធានការដាក់ទណ្ឌកម្មថ្មីៗ លើស៊ីរី នៅប៉ុន្មានម៉ោងទៀតនេះ ក្រោមការទន្ទឹងរង់ចាំបំផុតពីសំណាក់សហគមន៍អន្តរជាតិ ពិសេសសហភាពអឺរ៉ុប និងសហរដ្ឋអាមេរិក។ សហគមន៍អន្តរជាតិដែលត្រូវការជំនួយពីសម្ព័ន្ធអារ៉ាប ដើម្បីអាចបញ្ជូនសំណុំរឿងស៊ីរី ទៅកាន់អង្គការសហប្រជាជាតិ ជាថ្មីម្តងទៀត។
លើកមុន សេចក្តីសម្រេចចិត្តថ្កោលទោសរបបលោកអែល-អាល់អាសាទ បានទទួលបរាជ័យ នៅក្រុមប្រឹក្សាសន្តិសុខអង្គការសហប្រជាជាតិ ព្រោះចិន និងរុស្ស៊ីបានប្រើសិទ្ធិប្រឆាំង។ ប៉ុន្តែម្តងនេះ ដោយមានការគាំទ្រពីបណ្តាប្រទេសអារ៉ាបយ៉ាងសន្ធឹកសន្ធាប់ សេចក្តីសម្រេចចិត្តមួយ ទំនងជាអាចមានជីវិតរស់ឡើងវិញ។ មហាសន្និបាតអង្គការសហប្រជាជាតិនឹងត្រូវរៀបចំឡើងនៅសប្តាហ៍ក្រោយ។ ការពារជីវិតជនស៊ីវិល ជាភារៈចាំបាច់ ដែលត្រូវធ្វើ ៖ ក្នុងរយៈពេលតែ៨ខែ មានជនស៊ីវិល ជាង៣៥០០នាក់បានបាត់បង់ជីវិត ក្នុងការបង្ក្រាបរបស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ