សម្ព័ន្ធអារ៉ាប់ទុកពេលបីថ្ងៃឲ្យប្រទេសស៊ីរីបិទបញ្ចប់ទង្វើវាយបង្ក្រាបដ៏ហិង្សា
ចាប់ពីថ្ងៃទី១៦វិច្ឆិកាឆ្នាំ២០១១ សម្ព័ន្ធអារ៉ាប់ទុកពេលបីថ្ងៃឲ្យទីក្រុងដាម៉ាសបិទបញ្ចប់ការវាយបង្ក្រាបដ៏សែនសាហាវទៅលើក្រុមបាតុករប្រឆាំង ឲ្យដោះលែងអ្នកទោសនយោបាយ ហើយនិងអនុញ្ញាតឲ្យមានអ្នកសង្កេតការណ៍នៅលើដែនដីស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
សម្ព័ន្ធអារ៉ាប់បានទុកពេលបីថ្ងៃឲ្យប្រទេសស៊ីរី គិតចាប់ពីថ្ងៃពុធទី១៦វិច្ឆិកាឆ្នាំ២០១១ទៅ សម្រាប់ឲ្យទីក្រុងដាម៉ាសបញ្ឈប់ការវាយបង្ក្រាបដ៏សែនឃោរឃៅទៅលើក្រុមបាតុករប្រឆាំង ឲ្យដោះលែងរាល់អ្នកទោសនយោបាយ ហើយនិងឲ្យយល់ព្រមមានវត្តមានអ្នកសង្កេតការណ៍៥០០នាក់នៅលើដែនដីស៊ីរី។ បើពុំដូច្នោះទេ សម្ព័ន្ធអារ៉ាប់នឹងចាត់វិធានការដាក់ទណ្ឌកម្មសេដ្ឋកិច្ច។
ដើម្បីជាគំនាបបន្ថែម វិធានការសំខាន់ពីរអាចជាសម្ពាធដាក់ទៅលើប្រទេសស៊ីរី៖
ទី១ -ធ្វើការព្យួរផ្អាកពុំឲ្យប្រទេសស៊ីរីចូលរួមប្រជុំក្នុងសម្ព័ន្ធអារ៉ាប់ដូចមានការសម្រេចចិត្តនៅទីក្រុងគែរ បើប្រសិនជាទីក្រុងដាម៉ាសពុំព្រមបញ្ឈប់ការវាយបង្ក្រាបបង្ហូរឈាមទេនោះ។
ទី២ -ជាវិធានការតឹងរ៉ឹងជាងវិធានការទី១ ពោលគឺបណ្តេញជាស្ថាពរប្រទេសស៊ីរីចេញពីសម្ព័ន្ធអារ៉ាប់។ ប៉ុន្តែវិធានការនេះតម្រូវឲ្យមានការយល់ព្រមជាឯកច្ឆ័ន្ទពីសំណាក់ប្រទេសជាសមាជិក។ ដូច្នេះឃើញថាគ្មានច្រកចេញរួចឡើយ។ លទ្ធភាពនៅមានតែមួយគត់គឺការដាក់ទណ្ឌកម្មសេដ្ឋកិច្ចថ្មី។
ចំណែកឯប្រទេសបារាំងដែលតែងថ្កោលទោសប្រទេសស៊ីរីជាច្រើនខែមកហើយ នៅថ្ងៃពុធម្សិលមិញ នៅរដ្ឋសភាបារាំងលោក Alain Juppé រដ្ឋមន្ត្រីក្រសួងការបរទេសបានថ្លែងទាមទារឲ្យប្រធានាធិបតីស៊ីរីបាស្ហារអាល-អាស្សាដចាកចេញពីមុខតំណែង ហើយនិងទាមទារឲ្យបោះឆ្នោតគាំទ្រសេចក្តីសម្រេចចិត្តរបស់អង្គការសហប្រជាជាតិ។
រីឯប្រទេសចិនឯណោះ គេបារម្ភយ៉ាងខ្លាំងដោយឃើញស្ថានការណ៍នៅប្រទេសស៊ីរីធ្លាក់ចុះដុនដាបយ៉ាងនេះ ហើយនិងក្រោយពីមានប្រតិកម្មរបស់សម្ព័ន្ធអារ៉ាប់ទុកពេលបីថ្ងៃឲ្យប្រទេសស៊ីរីបិទបញ្ចប់ការវាយបង្ក្រាបដ៏ហិង្សាទៅលើក្រុមបាតុករប្រឆាំង។ ការវាយបង្ក្រាបបង្ហូរឈាមដែលបានបណ្តាលឲ្យមានមនុស្សស្លាប់អស់ប្រមាណ ៣ ៥០០នាក់ នេះបើយោងតាមអង្គការ សហប្រជាជាតិ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ