គោលជំហរទីក្រុងម៉ូស្គូ ចំពោះស្ថានការណ៍នៅប្រទេសស៊ីរី
ថ្លែងក្នុងសន្នីសិទកាសែត ក្រោយពីទទួលជួបសមភាគីឥណ្ឌា លោករដ្ឋមន្ត្រី ការបរទេសរុស្ស៊ី Serguei Lavrov ដោយមានប្រសាសន៍ ប៉ះលើប្រទេសស៊ីរី បញ្ចេញយោបល់ ថា ស្ថានការណ៍នៅទីនោះ ចាប់ផ្តើមរំលឹកឲ្យឃើញជាបណ្តើរៗ ពីសង្គ្រាមស៊ីវិល នេះគឺក្រោយពីពួកយោធាដែលរត់ចោលជួរកងទ័ពរដ្ឋាភិបាល បានវាយប្រហារទៅលើ មូលដ្ឋានមួយដ៏សំខាន់ នៅជិតរដ្ឋធានី ដាម៉ាស។
ចុះផ្សាយនៅថ្ងៃ៖
ស្តាប់ - ០២:១៤
លោកប្រមុខការទូតរុស្ស៊ី ក៏បានលើកឡើងថា តាមយោបល់ទីក្រុងម៉ូស្គូ សំខាន់ត្រូវតែ ចាត់ចែងឲ្យមានកិច្ចចរចា យ៉ាងឆាប់បំផុត ហើយប្រសើរបំផុត ត្រូវទទួល រ៉ាបរងភារកិច្ចនេះ គឺ”សម្ព័ន្ធរដ្ឋអារ៉ាប” ដែលមុនដំបូងត្រូវអំពាវនាវ ភាគីបដិបក្ខ នៅស៊ីរីឲ្យបញ្ឈប់ អំពើហិង្សា។ ហើយកិច្ចចរចាសោត ត្រូវប្រព្រឹត្តទៅ ដោយមានការចូលរួមពីគ្រប់ភាគីពាក់ព័ន្ធ។ រីឯទីកន្លែង ដ៏គាប់ប្រសើរបំផុត សម្រាប់ធ្វើកិច្ចចរចាបែបនេះ តាមមតិម៉ូស្គូ គឺ ទីស្នាក់ការរបស់ ”សម្ព័ន្ធរដ្ឋអារ៉ាប” នៅទីក្រុង គែរ។
ចំណុចមួយទៀត ដែលលោករដ្ឋមន្ត្រីការបរទេសរុស្ស៊ី Serguei Lavrov បានចង្អុលឲ្យឃើញ ក្នុងសន្នីសិទកាសែតនោះ គឺថា ទីក្រុងម៉ូស្គូ ចេញមុខឲ្យមាពួកអ្នកសង្កេតការណ៍របស់ “សម្ព័ន្ធរដ្ឋអារ៉ាប”ស្ថិតនៅប្រចាំការ ក្នុងប្រទេសស៊ីរី។ តាមប្រសាសន៍គាត់ កាលពីប៉ុន្មានថ្ងៃមុន ថ្នាក់ដឹកនាំស៊ីរីខ្លួនឯង បានថ្លែងអំពីភាពត្រៀមខ្លួនទទួលពួកអ្នកសង្កេតការណ៍ទាំងនោះ ហើយ ធានាឲ្យគេវត្តមាន នៅតាមកន្លែងណាក៏ដោយ នៅតាមទីប្រជុំជនណាក៏ដោយ នៃប្រទេសស៊ីរី ដើម្បីឲ្យគេបានឃើញនឹងភ្នែកគេផ្ទាល់ អំពីរាល់អ្វីៗដែលកំពុងប្រព្រឹត្តទៅនៅទីនោះ។
តាមយោបល់លោក Serguei Lavrov “សម្ព័ន្ធរដ្ឋអារ៉ាប” ត្រូវតែបន្តការខំស្វះស្វែងតាមផ្លូវ ការទូត ឆ្ពោះទៅដោះស្រាយលុះទាល់តែបានរួច នូវទំនាស់ផ្ទៃក្នុងស៊ីរី។
គួរនិយាយថា ពីរថ្ងៃមុន លោកប្រមុខការទូតរុស្ស៊ី បានទទួលជួប នៅម៉ូស្គូ ជាមួយប្រធាន “ក្រុមប្រឹក្សាជាតិស៊ីរី” ជាមេដឹកនាំភាគីប្រឆាំង នៅស៊ីរី គឺលោក Buhran Galioun។ ក្នុងជំនួបនោះ លោក Lavrov បានអំពាវនាវ ភាគីប្រឆាំង នៅស៊ីរី ឲ្យធ្វើកិច្ចចរចា ជាមួយរដ្ឋាភិបាលលោក ប្រធានាធិបតី Assad។ តាមយោបល់ម៉ូស្គូ លុះណាតែតាមផ្លូវចរចា ទើបភាគីប្រឆាំងអាចភ្ជាប់ខ្លួន ទៅនឹង “ផែនការខាងស្តារឲ្យមានសន្តិភាពឡើងវិញ” ក្នុងប្រទេសស៊ីរី។ ផែនការនេះ បំផុសមក ដោយ “សម្ព័ន្ធរដ្ឋអារ៉ាប” គឺ បដិសេធអំពើហិង្សា ក្នុងឋានៈជាមធ្យោបាយ សម្រាប់សមិទ្ធិ គោលដៅនយោបាយ។
ប៉ុន្តែ លោក Buhran Galioun បានថ្លែងថា ភាគីប្រឆាំង នៅស៊ីរី មិនត្រឹមតែមិនព្រមធ្វើឡើយ កិច្ចចរចា ជាមួយរបបដែលប្រឡាក់ទៅដោយថ្លុកឈាម បាញ់សម្លាប់ ប្រជាបាតុករ តាមតួលេខ អ.ស.ប. គឺស្លាប់អស់ជាង៣.៥០០នាក់ទៅហើយ តែក៏បន្តទាមទារ ពីលោកប្រធានាធិបតី Assad ឲ្យលាចេញពីមុខតំណែងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ