ឌុចត្រូវបានបន្តឃុំខ្លួននៅតុលាការខ្មែរក្រហម
លោកស្រី ជា លាង និងលោក អាន់ឌ្រូ ខេលី ( Andrew Cayley ) សហព្រះរាជអាជ្ញារបស់តុលាការខ្មែរក្រហម បានសរសេរលិខិតរួមគ្នា ដាក់ទៅកាន់ក្រសួងមហាផ្ទៃ ដើម្បីបានស្នើសុំបន្តឃុំខ្លួនទណ្ឌិត លោក កាំងហ្កេកអ៊ាវ ហៅ ឌុច នៅមន្ទីរឃុំឃាំងរបស់តុលាការខ្មែរក្រហម។ លោក កាំង ហ្កេកអ៊ាវ អតីតមេគុកទួលស្លែង ដែលត្រូវផ្តន្ទាទោសដាក់ពន្ធនាគារមួយជីវិតនឹងត្រូវឡើងធ្វើជាសាក្សី នៅក្នុងសំណុំរឿង០០២ នាចុងខែមីនានេះ។ម្យ៉ាងទៀត មកដល់ពេលនេះ គេនៅមិនទាន់សម្រេចថា លោក កាំង ហ្កេកអ៊ាវ ហៅ ឌុចត្រូវផ្ទេរទៅជាប់ពន្ធនាគារថ្នាក់ជាតិណាមួយនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
លិខិតរបស់សហព្រះរាជអាជ្ញាតុលាការខ្មែរក្រហម ចុះថ្ងៃទី៧ ខែមីនា ឆ្នាំ២០១២ បញ្ជូនទៅកាន់អគ្គនាយក នៃអគ្គនាយកដ្ឋានពន្ធនាគារ របស់ក្រសួងមហាផ្ទៃ លើករណីរបស់ទណ្ឌិត លោក កាំង ហ្កេកអ៊ាវ ហៅ ឌុច។ សាលដីកាផ្តន្ទាទោស ឌុច ដាក់ពន្ធនាគារមួយជិវិត បានចូលជាស្ថាពរនៅថ្ងៃទី៣ខែកុម្ភៈ ឆ្នាំ២០១២។
សំណើសុំការអនុវត្តន៍ទោស ដែលផ្សព្វផ្សាយនៅថ្ងៃទី៩ ខែមីនា ឆ្នាំ២០១២ លោកស្រី ជា លាង និងលោក អាន់ឌ្រូ ខេលី សហព្រះរាជអាជ្ញារបស់តុលាការខ្មែរក្រហម បានបង្ហាញសេចក្តីព្រួយបារម្ភថា ការផ្ទេរបញ្ជូនទណ្ឌិតឈ្មោះ កាំង ហ្កេកអ៊ាវ ពីមន្ទីរឃុំឃាំងនៅ អ.វ.ត.ក. ទៅកាន់ពន្ធនាគារ អាចនឹងធ្វើឲ្យមានភាពស្មុគស្មាញដល់ការចូលរួមរបស់គាត់ ក្នុងនាមជាសាក្សីនៅក្នុងដំណើរការនីតិវិធី នៅចំពោះមុខតុលាការខ្មែរក្រហម។ ដូច្នេះសហព្រះរាជអាជ្ញា សូមស្នើអគ្គនាយក នៃអគ្គនាយកដ្ឋានពន្ធនាគារ នៃក្រសួងមហាផ្ទៃ សុំឲ្យទណ្ឌិតឈ្មោះ កាំង ហ្កេកអ៊ាវ បន្តជាប់ឃុំ នៅតុលាការខ្មែរក្រហម។
តាមសហព្រះរាជអាជ្ញា ឌុច បន្តជាប់ឃុំនៅតុលាការខ្មែរក្រហម រហូតដល់ធ្វើជាសាក្សីចប់ និងរហូតដល់មានការយល់ព្រមលើការកំណត់ពន្ធនាគារ ដើម្បីឃុំខ្លួន ឌុច។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានលើកឡើងថា លោក កាំង ហ្កេកអ៊ាវ ហៅ ឌុច ប្រហែលជាឡើងផ្តល់សក្ខីកម្ម ក្នុងសំណុំរឿង០០២ នៅចុងខែមីនានេះ។ ក៏ប៉ុន្តែគេមិនដឹងថា ឌុច នឹងត្រូវចំណាយពេលប៉ុន្មានថ្ងៃ ដើម្បីផ្តល់សក្ខីកម្ម ក្នុងនាមជាសាក្សី នៅតុលាការខ្មែរក្រហមទេ។
ក្នុងនាមសាក្សី លោក កាំង ហ្កេកអ៊ាវ ហៅ ឌុច នឹងបង្ហាញពីរចនាសម្ព័ន្ធរដ្ឋបាល ប្រព័ន្ធទំនាក់ទំនងការងារក្នុងរបបខ្មែរក្រហម ព្រមទាំងលើកបង្ហាញពីតួនាទីរបស់លោក នួន ជា លោកអៀងសារី និងលោកខៀវសំផន។
តុលាការខ្មែរក្រហម នឹងចាប់ផ្តើមសវនាការលើសំណុំរឿង០០២ ឡើងវិញ នៅថ្ងៃច័ន្ទទី១២ ខែមីនា ឆ្នាំ២០១២ បន្ទាប់ពីឈប់សម្រាក ចាប់តាំងពីថ្ងៃទី១៧ ខែកុម្ភៈ ឆ្នាំ២០១២។
តុលាការខ្មែរក្រហមនៅថ្ងៃនេះ ក៏បានផ្សព្វផ្សាយពីការអនុម័តគម្រោងថវិកា នៅឆ្នាំ២០១២ ងឆ្នាំ២០១៣ ដែលប្រទេសម្ចាស់ជំនួយបានយល់ព្រម កាលពីសប្តាហ៍មុន នូវទឹកប្រាក់សរុប ៨៩,៦ លានដុល្លារ។ ក្នុងនោះ ៤៥,៧ លានដុល្លារសម្រាប់ឆ្នាំ២០១២ និង ៤៣,៩ លានដុល្លារ សម្រាប់ឆ្នាំ២០១៣។ ថវិកាសម្រាប់ភាគីជាតិ មានចំនួន ២០ លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ