សាលាក្តីខ្មែរក្រហមទទួលបានអាហារឡើងវិញ
ដំណឹងល្អសម្រាប់បុគ្គលិកបម្រើការងារនៅសាលាក្តីខ្មែរក្រហម ពិសេសបុគ្គលិកភាគីជាតិ។ កាលពីថ្ងៃព្រហស្បតិ៍ម្សិលមិញប្រទេសជប៉ុនបានប្រកាសផ្តល់ថវិកា៦លានដុល្លារដល់សាលាក្តីពិសេសដែលកំពុងខ្វះថវិកានេះ។ នៅថ្ងៃសុក្រនេះទៀត ចក្រភពអង់គ្លេសក៏បានប្រកាសសន្យាផ្តល់ ១ លាន២សែនដុល្លារបន្ថែមទៀតដែរ។ ថវិកាជំនួយទាំងនេះត្រូវបានប្រកាសផ្តល់អោយសាលាក្តីក្រោយពីមានការស្វែងរកជំនួយពីថ្នាក់ដឹកនាំរបស់សាលាក្តីនៅការិយាល័យអង្គការសហប្រជាជាតិកាលពីសប្តាហ៍កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២១
យ៉ាងយូរក្នុងសប្តាហ៍ទី៣នៃខែមិនានេះ បុគ្គលិកផ្នែកច្បាប់នៅក្នុងសាលាក្តីខ្មែរក្រហមដែលបានសុំព្យួរការងារនោះ នឹងអាចត្រឡប់មកបន្តការងារជាធម្មតាវិញ ពីព្រោះប្រាក់ខែពួកគេបានមកដល់ហើយ។
នោះគឺជាថវិកាជំនួយរបស់ប្រទេសជប៉ុន៦លានដុល្លារសម្រាប់សាលាក្តីពិសេសនេះ។ តែប៉ុន្មានថ្ងៃ ក្រោយពីដំណើរស្វែងរកថវិការបស់ថ្នាក់ដឹកនាំរដ្ឋបាលរបស់សាលាក្តីពីបុរីញូយ៉កវិញ នៅថ្ងៃទី១មិនាម្សិលមិញ រដ្ឋាភិបាលជប៉ុនបានចេញមុខមុនគេថ្លែងការណ៍ប្រកាសផ្តល់ជំនួយ៣លាន៥សែនដុល្លារដល់ភាគីកម្ពុជា និង២លាន៥សែនដុល្លារដល់ភាគីអន្តរជាតិក្នុងសាលាក្តីខ្មែរក្រហម។
នៅថ្ងៃសុក្រទី២មិនានេះទៀត នៅក្នុងជំនួបជាមួយលោកឧបនាយករដ្ឋមន្ត្រីសុខ អាន ឯកអគ្គរាជទូតអង់គ្លេសបានប្រកាសសន្យាផ្តល់ថវិកាជំនួយ១លាន២សែនដុល្លារដល់ភាគីកម្ពុជាក្នុងសាលាក្តីខ្មែរក្រហម។
ថវិកាទាំងនេះនឹងត្រូវប្រើប្រាស់ដើម្បីបើកប្រាក់ខែអោយមន្ត្រីច្បាប់ ចៅក្រម ព្រះរាជអាជ្ញាដែលខ្វះប្រាក់ខែតាំងពីខែតុលាឆ្នាំមុន និងអោយមន្ត្រីរដ្ឋបាលភាគីជាតិដដែល ដែលមិនបានបើកប្រាក់ខែតាំងពីខែមករាដើមឆ្នាំមក។
គួរបញ្ជាក់ថាថវិការជំនួយជាង៧លានដុល្លារនៅពេលនេះ គឺជាការឆ្លើយតបចំពោះការស្វែងរកថវិការបស់សាលាក្តីកូនកាត់អន្តរជាតិដែលត្រូវការចំណាយជិត៩០លានដុល្លារសម្រាប់ឆ្នាំ២០១២ និង២០១៣ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ