តុលាការខ្មែរក្រហមបន្តសវនាការលើកាយសម្បទា និងបញ្ញាស្មារតីអៀង ធីរិទ្ធ
នៅថ្ងៃអង្គារនេះ ជាថ្ងៃទី២ ដែលតុលាការខ្មែរក្រហម បានបន្តសវនាការសួរដេញដោលលើអ្នកជំនាញវេជ្ជសាស្ត្រ ពាក់ព័ន្ធនឹងបញ្ហាសុខភាព កាយសម្បទា និងបញ្ញាស្មារតី របស់លោកស្រី អៀង ធីរិទ្ធ។ លោកស្រី អៀង ធីរិទ្ធ អាយុ ៧៩ ឆ្នាំ ត្រូវបានអ្នកជំនាញបរទេសរកឃើញថា លោកស្រី មានបញ្ហាខាងស្មារតី និងប្រព័ន្ធសរសៃប្រសាទ ដែលមិនអាចចូលរួមពេញលេញ ក្នុងការជំនុំជម្រះបានទេ។
ចុះផ្សាយនៅថ្ងៃ៖
ស្តាប់ - ០១:៥២
ស្ទើរតែពេញមួយថ្ងៃ នៅថ្ងៃទី២ នៃសវនាការ សួរដេញដោលលើបញ្ហាកាយសម្បទា និងបញ្ញាស្មារតីលើអតីតមេខ្មែរក្រហម នៅថ្ងៃអង្គារនេះ បានផ្តោតលើបញ្ហារបស់លោកស្រី អៀង ធីរិទ្ធ។ លោកស្រី អៀង ធីរិទ្ធ ដែលបានបង្ហាញមុខក្នុងពេលបើកសវនាការដំបូង នៅព្រឹកមិញ តែមិនបានថ្លែងការណ៍អ្វីមួយម៉ាត់ឡើយ។
សហមេធាវីអន្តរជាតិការពារលោកស្រីអៀងធីរិទ្ធ និងសហព្រះរាជអាជ្ញា បានបន្តចោទសួរទៅកាន់អ្នកជំនាញវេជ្ជសាស្ត្រផ្នែកមនុស្សចាស់ លោក Jonh Cambell ជុំវិញរបាយការណ៍លើស្មារតីនៃការចងចាំ កាយសម្បទា ការប្រើប្រាស់ថ្នាំ និងការភ្លេចភ្លាំងស្មារតីរបស់លោកស្រី អៀង ធីរិទ្ធ។
លោកស្រី អៀង ធីរិទ្ធ អាយុ ៧៩ ឆ្នាំ ជាអតីតរដ្ឋមន្ត្រីក្រសួងសង្គមកិច្ចសម័យខ្មែរក្រហម ត្រូវបានអ្នកជំនាញរកឃើញថា លោកស្រី មានបញ្ហាខាងស្មារតី និងប្រព័ន្ធសរសៃប្រសាទ ដែលមិនអាចចូលរួមពេញលេញ ក្នុងការជំនុំជម្រះបានទេ។ តុលាការ ក៏បានចាត់តាំងអ្នកជំនាញវិកលចរិតបន្ថែម ដើម្បីពិនិត្យ និងវាយតម្លៃលើលោកស្រី អៀង ធីរិទ្ធ ក្នុងពេលឆាប់ៗខាងមុខ។
មេធាវីការពារលោកស្រី អៀង ធីរិទ្ធ បានព្យាយាមសួរដេញដោលលើអ្នកជំនាញ ដើម្បីបញ្ជាក់អង្គសវនាការថា ភរិយារដ្ឋមន្ត្រីការបរទេសខ្មែរក្រហម លោកស្រី អៀង ធីរិទ្ធ ពិតជាមានស្មារតីភ្លេចភ្លាំង និងមានសុខភាពមិនល្អគ្រប់គ្រាន់ ដើម្បីចូលរួមសវនាការបានឡើយ។
យ៉ាងណាក៏ដោយ សវនាការរយៈពេល ៣ ថ្ងៃ ដែលនឹងត្រូវបិទបញ្ចប់ នៅថ្ងៃ៣១សីហា នេះ មិនទាន់មានការសម្រេចបែបណា លើបញ្ហាសុខភាពរបស់អតីតមេខ្មែរក្រហមចាស់ជរានោះឡើយ។ តាមអ្នកនាំពាក្យសាលាក្តីខ្មែរក្រហម លោកនេត្រ ភក្ត្រា ក្នុងសវនាការរយៈពេល ៣ ថ្ងៃនេះ គេគ្រាន់តែលើកឡើងពីរបាយការណ៍ទាក់ទងនឹងបញ្ហាសុខភាព កាយសម្បទា និងបញ្ញាស្មារតីរបស់លោកនួនជា និងលោកស្រី អៀង ធីរិទ្ធប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ