តុលាការខ្មែរក្រហមបដិសេធសំណើសុំឲ្យដោះលែង អៀងសារី, ខៀវ សំផន និងអៀងធីរិទ្ធ
អង្គបុរេជំនុំជម្រះរបស់តុលាការខ្មែរក្រហមបានបដិសេធច្រានចោលបណ្តឹង ឧទ្ធរណ៍ ប្រឆាំងនឹងការបន្តថេរវេលាឃុំខ្លួនបណ្តោះអាសន្ន ដែលប្តឹងដោយជនត្រូវចោទ លោកអៀងសារី លោកខៀវ សំផន និងលោកស្រី អៀង ធីរិទ្ធ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
សេចក្តីសម្រេចនេះ ត្រូវបានលោកចៅក្រម ប្រាក់ គឹមសាន ប្រធានអង្គបុរេជំនុំជម្រះ ដែលមានចៅក្រម ៥ រូប បានប្រកាសជាសាធារណៈ ដាក់ដោយឡែកពីគ្នា ជាបន្តបន្ទាប់ នៅថ្ងៃទី៣០ ខែមេសានេះ។
ក្នុងបន្ទប់សវនាការ នៅពេលតុលាការប្រកាសសេចក្តីសម្រេចបន្តឃុំខ្លួននោះ លោក អៀង សារី អតីតរដ្ឋមន្ត្រីក្រសួងការបរទេស និងភរិយារបស់លោក គឺលោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ច បានបង្ហាញខ្លួនដាក់ដោយឡែកពីគ្នា នៅក្នុងរង្វង់ក្រចកសេះ។ ក៏ប៉ុន្តែ លោក ខៀវ សំផន អតីតប្រមុខរដ្ឋសម័យខ្មែរក្រហម មិនបានបង្ហាញមុខទេ ដោយសារតែអវត្តមានមេធាវីពីររូបរបស់លោក។
ដោយមិនព្រមដោះលែងមេដឹកនាំខ្មែរក្រហមទាំងបីរូបនោះ លោកចៅក្រម ប្រាក់ គឹមសាន ប្រធានអង្គបុរេជំនុំជម្រះ លើកហេតុផលស្រដៀងគ្នាមកពន្យល់ថា ការបន្តឃុំខ្លួនជនត្រូវចោទ នៅតែជាវិធានការដ៏ចាំបាច់ ដើម្បីទប់ស្កាត់កុំឲ្យជនត្រូវចោទគេចខ្លួន គាបសង្កត់សាក្សី និងបំផ្លាញភស្តុតាង។ លើសពីនេះទៀត ការបន្តថេរវេលាឃុំខ្លួនបណ្តោះអាសន្ននេះ ក៏ចាំបាច់ដើម្បីការពារសន្តិសុខជនត្រូវចោទ ព្រមទាំងរក្សាសន្តិសុខសាធារណៈ។
ការបដិសេធច្រានចោលបណ្តឹងឧទ្ធរណ៍ប្រឆាំងទៅនឹងការបន្តថេរវេលាឃុំខ្លួនបណ្តោះអាសន្ន លើមេដឹកនាំខ្មែរក្រហមជាន់ខ្ពស់ទាំងបីនេះ មានន័យថា ជនត្រូវចោទ លោកអៀងសារី, លោក ខៀវសំផន និងលោកស្រី អៀង ធីរិទ្ធ នឹងអាចបន្តថេរវេលាឃុំខ្លួនបណ្តោះអាសន្ន រហូតដល់ថ្ងៃទី ១២ និងថ្ងៃទី១៩ ខែវិច្ឆិកា ឆ្នាំ២០១០។
តាមច្បាប់ ឆ្នាំ២០១០នេះ ជាពេលវេលាចុងក្រោយនៃការឃុំខ្លួនមេខ្មែរក្រហម គម្រប់ ៣ ឆ្នាំ ដែលចៅក្រមមិនអាចពន្យារពេលឃុំខ្លួនជនត្រូវចោទ ជាមេខ្មែរក្រហមទៀតទេ។
សេចក្តីប្រកាសរបស់តុលាការខ្មែរក្រហម នៅថ្ងៃនេះ បានបញ្ជាក់ថា ប្រសិនបើជនត្រូវចោទ មិនត្រូវបាននាំមកជំនុំជម្រះកាត់ទោស ក្នុងរយៈពេល ៤ ខែនោះទេ ដោយគិតចាប់ពីពេលកំណត់ បញ្ជូនរឿងទៅជំនុំជម្រះ នោះការឃុំខ្លួនលើជនត្រូវចោទ លោក អៀងសារី, លោក ខៀវសំផន និងលោកស្រី អៀង ធីរិទ្ធ នឹងអស់ប្រសិទ្ធិភាព រាប់ទាំងលោក នួនជា អតីតប្រធានរដ្ឋសភាខ្មែរក្រហម។
ក៏ប៉ុន្តែលោក ឌឹម សុវណ្ណារុំ អ្នកនាំពាក្យតុលាការខ្មែរក្រហម បានបញ្ជាក់ថា សហចៅក្រមស៊ើបអង្កេត អាចនឹងបញ្ជូនសំណុំរឿង០០២ ដែលរួមមានជនត្រូវចោទ នួនជា, ខៀវសំផន អៀងសារី អៀងធីរិទ្ធ និងកាំងហ្គេកអ៊ាវ ហៅឌុច ទៅជំនុំជម្រះ នៅក្នុងខែកញ្ញាឆ្នាំ២០១០។ ចំណែកសំណុំរឿង០០១ របស់ ឌុច ដែលបានកាត់ទោសរួចហើយនោះ នឹងត្រូវប្រកាស នាពាក់កណ្តាលឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ