ជំនួប៦ភាគីនិងបញ្ហានុយក្លេអ៊ែរអៀរ៉ង់
ចុះផ្សាយនៅថ្ងៃ៖
ស្តាប់ - ០៤:០៤
នៅថ្ងៃព្រហស្បតិ៍ម្សិលមិញ អ្នកតំណាងនៃប្រទេសរុស្ស៊ីបានថ្លែងឲ្យដឹងថា ជំនួបនៃប្រទេសមហាអំណាចទាំង៦ដែលមានបន្ទុកត្រួតមើល បញ្ហានុយក្លេអ៊ែរអៀរ៉ង់បានបញ្ចេញបង្ហាញឲ្យឃើញនូវ”សំណើស្ថាបនាមួយ ”ដ៏គួរឲ្យពេញចិត្ត។
លោកអគ្គរដ្ឋទូតចិនប្រចាំអង្គការសហប្រជាជាតិLi Baodong ឯណោះវិញបានថ្លែងគូសបញ្ជាក់ឲ្យដឹងថា ប្រទេសមហាអំណាចទាំង៦ដែលក្នុងនោះមាន ប្រទេសអាល្លឺម៉ង់ ប្រទេសចិន សហរដ្ឋអាមេរិក ប្រទេសបារាំង អង់គ្លេសនិងប្រទេសរុស្ស៊ី ត្រូវតែមានជំនួបជាថ្មីម្តងទៀតនៅសប្តាហ៍ក្រោយដើម្បីបន្ត កិច្ចចរចា។
ហើយកិច្ចចរចាទៀតសោតត្រូវសង្កត់ធ្ងន់ទៅលើការដោះ ស្រាយដោយប្រើវិធីការទូត។ គួរកត់សម្គាល់ថា ប្រទេសចិនគឺជាប្រទេសដែលមានការរួញរាជាងគេក្នុងចំណោមប្រទេសមហា អំណាចទាំង៦ក្នុងការដាក់ទណ្ឌកម្មទៅលើប្រទេសអៀរ៉ង់។
សូមគូស បញ្ជាក់ថា ជំនួប៦ភាគីនេះបានប្រព្រឹត្តទៅអស់រយៈពេលជិត៣ម៉ោង ក្រោយពីលោកប្រធានាធិបតីរុស្ស៊ីDmitri Medvedevហើយនិងលោកប្រធានាធិបតីអាមេរិកបារ៉ាក់អូបាម៉ាបានសម្ដែងឲ្យ ឃើញនូវឯកភាពទស្សនៈក្នុងការដាក់ទណ្ឌកម្មទៅលើប្រទេសអៀរ៉ង់។
ពាក់ព័ន្ធ នឹងបញ្ហានុយក្លេអ៊ែរនេះ ក្រុមប្រឹក្សាសន្តិសុខនៃអ ស ប ធ្លាប់បានធ្វើសេចក្តីសម្រេចចិត្តដាក់ទណ្ឌកម្ម៣លើករួចមកហើយទៅលើ ទីក្រុងតេហេរ៉ង់។ ក៏ប៉ុន្តែប្រទេសអៀរ៉ង់នៅតែធ្វើគរធ្វើថ្លង់នឹងការចោទប្រកាន់ របស់ប្រទេសលោកខាងលិចដែលចោទថា អៀរ៉ង់ប៉ុនប៉ងផលិតអាវុធនុយក្លេអ៊ែរ។ ប៉ុន្តែ ទីក្រុងប៉េកាំងដែលជាសម្ពន្ធមិត្តចាស់របស់ប្រទេសអៀរ៉ង់តែងធ្វើការ ប្រឆាំងជានិច្ចនឹងការដាក់ទណ្ឌកម្មថ្មីទៅលើទីក្រុងតេហេរ៉ង់។ ទើបតែនៅពេលថ្មីៗនេះតែប៉ុណ្ណោះដែលប្រទេសចិនយល់ព្រមចូលពិភាក្សាពី ការដាក់ទណ្ឌកម្មទៅលើទីក្រុងតេហេរ៉ង់។
សហរដ្ឋអាមេរិកនិងប្រទេស មហាអំណាចឯទៀតគ្រោងរៀបចំឲ្យមានសេចក្តីសម្រេចចិត្តមួយដើម្បីដាក់ ទណ្ឌកម្មទៅលើពួកឆ្មាំបដិវត្តន៍អៀរ៉ង់ មកពីពួកគេយល់ថា ពួកឆ្មាំបដិវត្តន៍អៀរ៉ង់ជាអ្នកបង្កឲ្យមានសកម្មភាពក្នុងការផលិត អាវុធនុយក្លេងអ៊ែរ។ អ្នកនាំពាក្យនៃក្រសួងការបរទេសអាមេរិកបានបញ្ជាក់ទៀតថា បញ្ហានុយក្លេអ៊ែរអៀរ៉ង់គឺជាប្រធានបទដ៏សំខាន់ដែលគេត្រូវលើកយកមក ពិភាក្សានាឱកាសជំនួបកំពូលស្ដីពីសន្តិសុខនុយក្លេអ៊ែរនៅទីក្រុង វ៉ាស៊ីនតោននៅថ្ងៃចន្ទនិងថ្ងៃអង្គារខាងមុខនេះដោយមានការចូលរួមពី សំណាក់ប្រមុខរដ្ឋនិងប្រមុខរដ្ឋាភិបាល៤៧ប្រទេស។
កាលពីថ្ងៃ ព្រហស្បតិ៍កន្លរទៅនៅទីក្រុងPrague លោកប្រធានាធិបតីរុស្ស៊ីDmitri Medvedevហើយនិងលោកប្រធានាធិបតីអាមេរិកបារ៉ាក់អូបាម៉ាបានសម្ដែងឲ្យ ឃើញនូវឯកភាពទស្សនៈក្នុងការដាក់ទណ្ឌកម្មយ៉ាងម៉ឹងម៉ាត់ទៅលើប្រទេស អៀរ៉ង់។ ទាំងនេះ ក៏ពីព្រោះតែទំនាក់ទំនងរវាងទីក្រុងវ៉ាស៊ីនតោននិងទីក្រុងម៉ូស្គូមាន លក្ខណៈល្អប្រសើច្រើនតាំងពីលោកបារ៉ាក់អូបាម៉ាបានឡើងមកកាន់កាប់ តំណែងជាប្រធានាធិបតីអាមេរិកមក។ លក្ខណៈមួយទៀតដែលគួរឲ្យកត់សម្គាល់គឺការប្តូរប្រែឥរិយាបថរបស់ ទីក្រុងប៉េកាំងដែលយល់ព្រមចូលពិភាក្សាពីការដាក់ទណ្ឌកម្មទៅលើ ទីក្រុងតេហេរ៉ង់។
ហើយម៉្យាងទៀតយើងគួរដឹងថា នៅតំបន់ប៉ែកខាងត្បូងនៃប្រទេសរុស្ស៊ី ដូចជាតំបន់Tchetchènie មានប្រជាជនជាច្រើនជាអ្នកកាន់សាសនាអ៊ីស្លាម ហើយពួកប្រជាជនអ៊ីស្លាមទាំងនោះកំពុងតែនាំគ្នាបះបោរទាមទារឯករាជ្យ។ ដូច្នេះ សាមគ្គីភាពរវាងប្រជាជនកាន់សាសនាអ៊ីស្លាមក៏ជាមូលហេតុមួយដែរមក ជំរុញឲ្យប្រទេសរុស្ស៊ីងាកមកមានឯកភាពទស្សនៈជាមួយសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ