ក្រុមអង្គការសង្គមស៊ីវិល៖ ដំណើរការកំណែទម្រង់ការបោះឆ្នោត ត្រូវចុះឈ្មោះអ្នកបោះឆ្នោតថ្មី ដោយបិទរូបថត ហើយគ.ជ.ប ត្រូវតែឯករាជ្យ
ក្រុមអង្គការសង្គមស៊ីវិល ចំនួន ២០ ស្ថាប័ន ក្នុងនាមសម្ព័ន្ធកំណែទម្រង់ការបោះឆ្នោត បានដាក់ចេញនូវអនុសាសន៍ ៧ ចំណុច សម្រាប់ដំណើរការកំណែទម្រង់ការបោះឆ្នោត ដែលគណបក្សប្រជាជនកម្ពុជា និងគណបក្សសង្គ្រោះជាតិ កំពុងពិភាក្សាចរចា មិនទាន់រកច្រកចេញនៅពេលនេះ។ អនុសាសន៍ទាំង ៧ ចំណុច ដែលនឹងប្រកាសផ្សព្វផ្សាយ នៅអង្គការខុមហ្វ្រែល នាម៉ោង ១០ ព្រឹក ថ្ងៃពុធ ទី១២មីនាស្អែកនេះ រួមមាន ការចុះឈ្មោះអ្នកបោះឆ្នោតថ្មី ដោយតម្រូវឲ្យបិទរូបថតលើប័ណ្ណបោះឆ្នោត ហើយសមាជិកគ.ជ.ប ដែលជាអ្នករៀបចំការបោះឆ្នោត ត្រូវតែជាមនុស្សឯករាជ្យ មិនជាប់ពាក់ព័ន្ធនឹងគណបក្សនយោបាយដូចពេលនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ក្នុងពេលការចរចារវាងគណបក្សប្រជាជនកម្ពុជា និងគណបក្សសង្គ្រោះជាតិ លើកំណែទម្រង់ការបោះឆ្នោត កំពុងតែដំណើរការដោយភាពតានតឹង និងរកច្រកចេញមិនរួច គឺក្រុមអង្គការសង្គមស៊ីវិល ចំនួន ២០ ស្ថាប័ន ដែលមានឈ្មោះថា សម្ព័ន្ធកំណែទម្រង់ការបោះឆ្នោត បានសម្រេចដាក់ចេញនូវអនុសាសន៍ ៧ ចំណុច។ ជាអនុសាសន៍ សម្រាប់ដំណើរការកំណែទម្រង់ការបោះឆ្នោត ដោយមាននិយាយលម្អិតពីដំណើរការ និងបច្ចេកទេស ដែលសង្គមស៊ីវិល នឹងប្រកាសចេញ ក្នុងសន្និសីទកាសែត នាម៉ោង ១០ ព្រឹក ថ្ងៃទី១២មីនានេះ នៅទីស្នាក់ការអង្គការខុមហ្វ្រែល ទល់មុខវិទ្យាល័យសន្ធរមុខ រាជធានីភ្នំពេញ។
លោក ហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោត នីកហ្វិក ដែលជាសមាជិកសម្ព័ន្ធកំណែទម្រង់ការបោះឆ្នោត បានលើកឡើងថា ការកែទម្រង់ដំណើរការបោះឆ្នោត ទាំង ៧ ចំណុចនោះ រួមមាន ការធ្វើបញ្ជីឈ្មោះអ្នកបោះឆ្នោតថ្មី កែទម្រង់សមាសភាពគ.ជ.បការកំណត់ពីប្រព័ន្ធផ្សព្វផ្សាយ ពីអព្យាក្រឹត្យភាពរបស់មន្ត្រីរាជការស៊ីវិល មន្ត្រីតុលាការ យោធាប៉ូលិស ស្នើសុំឲ្យមានកូតាស្ត្រីក្នុងបញ្ជីអ្នកជាប់ឆ្នោត និងបង្កើតច្បាប់ហិរញ្ញវត្ថុសម្រាប់គណបក្សនយោបាយ។
លោក ហង្ស ពុទ្ធា បានបន្ថែមថា កំណែទម្រង់លើបញ្ជីឈ្មោះអ្នកបោះឆ្នោត តាមរយៈការចុះឈ្មោះឡើងវិញ ត្រូវបានសង្គមស៊ីវិល ផ្តល់អនុសាសន៍ថា ត្រូវតែមានបិទរូបថតលើប័ណ្ណអ្នកបោះឆ្នោត។ ចំណែកការកែទម្រង់សមាសភាពគ.ជ.ប គឺសង្គមស៊ីវិលស្នើឲ្យមានការជ្រើសរើសមនុស្សឯករាជ្យ មិនមែនជាសមាជិកគណបក្សនយោបាយ ដូចពេលនេះទេ។
កិច្ចចរចា កាលពីថ្ងៃទី៣មីនា គណៈកម្មការចម្រុះ របស់គណបក្សប្រជាជនកម្ពុជា និងគណបក្សសង្គ្រោះជាតិ បានឯកភាពគ្នា លើក្របខណ្ឌកំណែទម្រង់ការបោះឆ្នោត ដែលក្នុងនោះ មានទាំងការរៀបចំបញ្ជីឈ្មោះអ្នកបោះឆ្នោតឡើងវិញ កំណែទម្រង់ស្ថាប័នរៀបចំការបោះឆ្នោត និងបង្កើតច្បាប់ហិរញ្ញវត្ថុ សម្រាប់គណបក្សនយោបាយ ជាដើម។
ក៏ប៉ុន្តែកិច្ចចរចាជាថ្មី កាលពីថ្ងៃទី១០មីនា គណបក្សទាំងពីរ បានខ្វែងគំនិតគ្នា លើស្ថាប័នរៀបចំការបោះឆ្នោតគ.ជ.ប ដែលគណបក្សសង្គ្រោះជាតិ ចង់ឲ្យគ.ជ.ប ជាស្ថាប័នធម្មនុញ្ញ ហើយអនុម័តសមាសភាព ដោយសំឡេង ២ ភាគ ៣ នៃសមាជិករដ្ឋសភាទាំងមូល។ យ៉ាងណាក៏ដោយ គណៈកម្មការចម្រុះ ដើម្បីសិក្សា និងរៀបចំក្របខ័ណ្ឌកំណែទម្រង់ការបោះឆ្នោតរវាងគណបក្សទាំងពីរ បានព្រមព្រៀងថា នឹងជួបចរចាគ្នាម្តងទៀត នៅថ្ងៃទី១៧មីនា។
ជាការកត់សម្គាល់ លោក ហង្ស ពុទ្ធា បានគូសបញ្ជាក់ថា ក្នុងចំណោមអនុសាសន៍ ៧ ចំណុច របស់ក្រុមអង្គការសង្គមស៊ីវិល លើដំណើរការកំណែទម្រង់ការបោះឆ្នោត ដែលនឹងប្រកាសចេញលម្អិត នៅព្រឹកថ្ងៃទី១២មីនា មិនមាននិយាយពីការបោះឆ្នោតឡើងវិញ ឬការបោះឆ្នោត នៅមុនអាណត្តិនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ