គ.ជ.ប ប្រកាសពីការចុះឈ្មោះបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ
គណៈកម្មាធិការរៀបចំការបោះឆ្នោត គ.ជ.ប ប្រកាសដល់គណបក្សនយោបាយទាំងអស់ឲ្យ ត្រៀមលក្ខណៈ ដាក់ពាក្យសុំចុះឈ្មោះបោះឆ្នោតដែលបានចាប់ផ្តើមកាលពីដើមខែកុម្ភៈនេះ និងចុះឈ្មោះបេក្ខជនឈរឈ្មោះបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលនឹងប្រព្រឹត្តទៅ នៅថ្ងៃទី១៨ ខែឧសភា ខាងមុខ។ មន្ត្រី គ.ជ.ប រំពឹងថា មានគណបក្សប្រមាណជា ២ទៅ៣ នឹងចូលរួមនៅក្នុងការបោះឆ្នោតដែលគេចាត់ទុកថាមានសារៈសំខាន់តិចតួច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
គណៈកម្មាធិការជាតិរៀបចំការបោះឆ្នោត គ.ជ.ប បានឲ្យដឹងនៅថ្ងៃសុក្រនេះថា ស្ថាប័នរៀបចំការបោះឆ្នោតរបស់ជាតិមួយនេះបានចាប់ផ្តើម ពីគណបក្សពីការចុះបញ្ជីគណបក្សនយោបាយឈរឈ្មោះបោះឆ្នោត និងបេក្ខជនឈរឈ្មោះនៅគណៈកម្មការរាជធានី/ខេត្ត រៀបចំការបោះឆ្នោត (គធ/ខប) ការចុះឈ្មោះអ្នកសង្កេតការណ៍បោះឆ្នោត និងការចុះឈ្មោះតំណាងគណបក្សនយោបាយ សម្រាប់ការបោះឆ្នោតសម្រាប់ជ្រើសរើសក្រុមប្រឹក្សារាជធានីខេត្ត ក្រុង ស្រុក ខ័ណ្ឌ អាណត្តិទី២ ឆ្នាំ២០១៤។ ការបោះឆ្នោតដែលប្រព្រឹត្តទៅនៅថ្ងៃទី ១៨
ខែឧសភា ឆ្នាំ ២០១៤ ខាងមុខ។
យោងតាមច្បាប់បោះឆ្នោត ក៏ដូចជាការបញ្ជាក់របស់លោកស្រី ស៊ិន ជុំបូ អនុប្រធានគ.ជ.ប
បានប្រកាសថា ពលរដ្ឋដែលអាចឈរឈ្មោះជាបេក្ខជនបានលុះត្រាតែមានអាយុចាប់ពី២៥ឆ្នាំឡើងទៅ មានសញ្ជាតិខ្មែរ។ ហើយអ្នកដែលមិនអាចឈរឈ្មោះជាបេក្ខជនបានមានសមាជិកព្រឹទ្ធសភា រដ្ឋសភា ក្រុមប្រឹក្សាធម្មនុញ្ញ ក្រុមចៅក្រម ។ ដោយឡែកចំពោះអភិបាល អភិបាលរងរាជធានី ខេត្ត ក្រុង ស្រុក ខ័ណ្ឌ អាចឈរឈ្មោះជាបេក្ខជនបាន ទាល់តែសុំច្បាប់ពិសេសរយៈពេល ៧ថ្ងៃមុនថ្ងៃបោះឆ្នោត រហូតទាល់ប្រកាសលទ្ធផលឆ្នោត។ ពោលគឺមានការកែប្រែខុសពីការបោះឆ្នោតអាណត្តិមុន ដែលតម្រូវឲ្យមានការលាលែងពីតំណែង។ ជាមួយគ្នានេះក្រុមប្រឹក្សាឃុំ ក៏អាចទៅឈរឈ្មោះជាបេក្ខជនបានដែរ ដោយតម្រូវឲ្យលាលែងពីតំណែងបច្ចុប្បន្នជាមុន។
ជាទូទៅអ្នកដែលមានសិទ្ធិបោះឆ្នោតគឺមានតែក្រុមប្រឹក្សាឃុំ សង្កាត់ ក្នុងតំណែងដែលបានជាប់ឈ្មោះកាលពីឆ្នាំ ២០១២កន្លងមក។ លោកទេព នីថា អគ្គលេខាធិការ គ.ជ.ប បានថ្លែងថាបច្ចុប្បន្ននេះ គ.ជ.ប ទើបតែចាប់ផ្តើមស្រង់ឈ្មោះអ្នកបោះឆ្នោតនៅឡើយ ហើយលោកក៏មិនទាន់ដឹងថា គណបក្សណាខ្លះឈរឈ្មោះក៏ទេដែរ ក្នុងចំណោមគណបក្សចំនួន ៧ដែលមានសមាជិកជាប់ឈ្មោះ ក្រុមប្រឹក្សាឃុំ សង្កាត់ កន្លងមក។ ក៏ប៉ុន្តែ លោក ទេព នីថា ប៉ាន់ប្រមាណថា អាចនឹងមាន ពី២ ទៅ៣ គណបក្សដែលនឹងឈរឈ្មោះបោះឆ្នោតនៅពេលខាងមុខ។
ទាក់ទងទៅនឹងការចំណាយសម្រាប់រៀបចំការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខ័ណ្ឌ អាណត្តិទី២នេះ លោក អគ្គលេខាធិការ គ.ជ.ប បញ្ជាក់ថា មានប្រមាណជាង១,៦លានដុល្លារ ក៏ប៉ុន្តែត្រូវបន្ថែមជាង ១០ម៉ឺនដុល្លារទៀត ដោយសារតែការបំបែកខេត្តថ្មីមួយទៀត ចេញពីខេត្តកំពង់ចាមគឺខេត្តត្បូងឃ្មុំ កាលពីពេលថ្មីៗនេះ និងការបង្កើតខ័ណ្ឌចំនួនបីថ្មីទៀត។
សូមបញ្ជាក់ថា សមាជិកក្រុមប្រឹក្សារាជធានី ខេត្ត ដែលនឹងត្រូវបោះឆ្នោតជ្រើសរើសនៅអាណត្តិទីពីរនេះ មានចំនួន ៣៩៣នាក់ ក្រុមប្រឹក្សាក្រុង ស្រុក ខណ្ឌ ចំនួន២ ៩៣១នាក់ ហើយសមាជិកឃុំសង្កាត់ ដែលជាអង្គបោះឆ្នោតនោះ មានចំនួនសរុប ១១ ៤៥៩នាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ