CCIM បង្ហាញរបាយការណ៍ភាពមិនប្រក្រតីនៃការបោះឆ្នោតជាលើកទី៣
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ CCIM បានដាក់បង្ហាញលទ្ធផលនៃព័ត៌មានស៊ើបអង្កេត និងវេទិការសហគមន៍អំពីដំណើរការបោះឆ្នោតនៅកម្ពុជា។ វេទិកាលើកទី៣ ដែលមជ្ឈមណ្ឌលនេះ បានដាក់បង្ហាញលទ្ធផលរបស់ខ្លួន ដើម្បីជាការផ្តល់មតិយោបល់ទៅដល់គណៈកម្មាធិការជាតិរៀបចំការបោះឆ្នោត។ ក្នុងរបាយណ៍ស៊ើបអង្កេត បញ្ហាជនអន្តោប្រវេសន៍វៀតណាម ការបាត់បង់សិទ្ធិពលរដ្ឋបោះឆ្នោត និងការបញ្ជាក់លិខិតអត្តសញ្ញាណ គឺជាដើមចមនៃភាពមិនប្រក្រតីនៃការបោះឆ្នោត។ សម្រាប់គ.ជ.ប របាយ ការណ៍របស់CCIM មានលក្ខណៈដដែលៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
សាជាថ្មីម្តងទៀត មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យCCIM បានបង្ហាញរបាយការណ៍ស្រាវជ្រាវពីលទ្ធផលនៃភាពមិនប្រក្រតីនៃការបោះឆ្នោតអាណត្តិទី៥ កន្លងទៅនេះ។ ជារបាយការណ៍ដាក់បង្ហាញតាមរយៈការស្រាវជ្រាវព័ត៌មានស៊ើបអង្កេត និងពីវេទិកាសហគមន៍។
ក្នុងសន្និសីទលើកទី៣ នៅព្រឹកថ្ងៃសុក្រទី ២៨ កុម្ភៈនេះ លោក ណុបវី ប្រធានគ្រប់គ្រងផ្នែកអភិវិឌ្ឍន៍ប្រព័ន្ធផ្សព្វផ្សាយនៃ CCIM បានបង្ហាញថា មានបញ្ហា៥ចំណុចដែលបានធ្វើឱ្យមានភាពមិនប្រក្រតីនៃការបោះឆ្នោតអាណត្តិទី៥កន្លងទៅនេះ។ ទី១ ការបាត់សិទ្ធិបោះឆ្នោតរបស់ពលរដ្ឋ។ ទី២ ការឃោសនាមិនស្មើភាពគ្នារវាងបក្សចូលរួមការបោះឆ្នោត។ ទី៣ ការបោះឆ្នោតរបស់ជនអន្តោប្រវេសន៍វៀតណាម។ ទី៤ ការដឹកជញ្ជូនមនុស្សពីមួយកន្លែងទៅកន្លែងមួយទៀត និងភាពមិនប្រក្រតីនៃការប្រើប្រាស់លិខិតបញ្ជាក់អត្តសញ្ញាណជាដើម។
ក្នុងសន្និសីទលើកទី៣ដែលធ្វើឡើងនៅសណ្ឋាគារ អ៊ីមភើរៀលនេះ CCIM ក៏បានបង្ហាញដែរពីការបាត់បង់សិទ្ធិបោះឆ្នោតរបស់ពលរដ្ឋនៅតំបន់បុរីកីឡា ដែលត្រូវបានបញ្តេញចេញ កាលពីដើមឆ្នាំ២០១២កន្លងទៅ។ ដោយឡែកបញ្ហាជនអន្តោប្រវេសន៍វៀតណាមរស់នៅលើទឹកដីកម្ពុជាដែលមានសិទ្ធិបោះឆ្នោត ក៏ត្រូវបានCCIM ធ្វើការអង្កេតផងដែរ។
នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោកប៉ា ងួនទៀង បានបញ្ជាក់ពីគោលបំណងនៃសន្និសីទលើកទី៣នេះថា ដើម្បីបញ្ជាក់ទៅដល់គណៈកម្មាធិការជាតិរៀបចំការបោះឆ្នោត ក៏ដូចជារដ្ឋាភិបាល ពីភាពមិនប្រក្រតីនៃការបោះឆ្នោតសាជាថ្មីម្តងទៀត តាមរយៈការស្រាវជ្រាវរបស់មជ្ឈមណ្ឌល។
នាយកប្រតិបត្តិរូបនេះ បានអះអាងថា ការមិនខ្វល់របស់រដ្ឋាភិបាល ស្តីពីភាពមិនប្រក្រតីនៃការបោះឆ្នោតនេះ គឺកំពុងតែបានជះឥទ្ធិពលដល់ស្ថានភាពនយោបាយសង្គមនាពេលបច្ចុប្បន្ន។ បើតាមលោក ប៉ា ងួនទៀង ដដែល បើទោះបីជារដ្ឋាភិបាលមិនទាន់បានដោះស្រាយមែន ប៉ុន្តែរដ្ឋាភិបាលបានសន្យានឹងជំរុញឱ្យមានកំណែទម្រង់។
ចំណែកឯគ.ជ.បវិញ អគ្គលេខាធិការគ.ជ.ប លោក ទេព នីថា បានឆ្លើយតបនឹងរបាយការណ៍របស់CCIMថា ជារបាយការណ៍ដដែលៗ។ ហើយថា គ.ជ.បធ្វើការតាមតែច្បាប់ចែងតែប៉ុណ្ណោះ ហើយស្នើឱ្យCCIMផ្តល់ភស្តុតាងជាក់ស្តែង ស្តីពីភាពមិនប្រក្រតីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ