ណូបែលសន្តិភាព២០២៣បានផ្តល់ឲ្យស្រ្តីសកម្មជនអ៊ីរ៉ង់ Narges Mohammadi ដែលកំពុងជាប់ឃុំ
រដូវប្រកាសផ្តល់រង្វាន់ណូបែលឆ្នាំ ២០២៣ កំពុងបន្តធ្វើនៅក្នុងទីក្រុងអូស្លូ ប្រទេសន័រវែស។ បន្ទាប់ពីណូបែលវេជ្ជសាស្រ្ត រូបវិទ្យា គីមីវិទ្យា និងអក្សរសាស្រ្តមក ថ្ងៃសុក្រ ទី៦ តុលាជាការប្រកាសផ្តល់រង្វាន់ណូបែលសន្តិភាព។ រង្វាន់ណូបែលសន្តិភាពឆ្នាំ ២០២៣ នេះត្រូវបានគណៈកម្មាធិការណូបែលផ្តល់ទៅឲ្យស្រ្តីអ្នកកាសែត និងសកម្មជនអ៊ីរ៉ង់លោកស្រី Narges Mohammadi ដែលកំពុងជាប់ឃុំក្នុងពន្ធនាគារ។
ចុះផ្សាយនៅថ្ងៃ៖
ស្តាប់ - ០៣:១៩
ជម្រើសផ្តល់រង្វាន់ណូបែលសន្តិភាពឲ្យលោកស្រី Narges Mohammadi ត្រូវបានប្រធានគណៈកម្មាធិការណូបែលលោកស្រី Berit Reiss-Andersen លើកយកហេតុផលទៅពន្យល់ថា លោកស្រី Narges Mohammadi បានប្រយុទ្ធប្រឆាំងនឹងការគាបសង្កត់លើស្ត្រីក្នុងប្រទេសអ៊ីរ៉ង់ និងបានតស៊ូដើម្បីលើកកម្ពស់សិទ្ធិមនុស្ស និងសេរីភាពសម្រាប់ទាំងអស់គ្នា។ មានអាយុ ៥១ឆ្នាំ ស្រ្តីអ្នកកាសែត និងសកម្មជនអ៊ីរ៉ង់រូបនេះត្រូវបានចាប់ខ្លួនចំនួន ១៣ដង និងកាត់ទោសចំនួន ៥ដងឲ្យជាប់ក្នុងពន្ធនាគារសរុបចំនួន ៣១ឆ្នាំដោយសារតែលោកស្រីបានចេញមុខប្រឆាំងនឹងទោសប្រហារជីវិត និងប្រឆាំងកាតព្វកិច្ចពាក់កន្សែងរុំមុខរបស់ស្រ្តីនៅអ៊ីរ៉ង់។
ក្រោយពីការប្រកាសផ្តល់រង្វាន់ណូបែលសន្តិភាពឲ្យលោកស្រី Narges Mohammadi អង្គការសហប្រជាជាតិបានស្នើឲ្យរដ្ឋអំណាចអ៊ីរ៉ង់ដោះលែងលោកស្រីជាបន្ទាន់។ សំណើដូចគ្នានេះក៏មានពីប្រធានគណៈកម្មាធិការណូបែលលោកស្រី Berit Reiss-Andersen ដែរ។ « ខ្ញុំសូមអំពាវនាវឲ្យអ៊ីរ៉ង់ដោះលែងលោកស្រីNarges Mohammadi។ ចូរអស់លោកធ្វើអ្វីៗដែលសមរម្យ ថ្លៃថ្នូរ និងដោះលែងជ័យលាភីរង្វាន់ណូបែលសន្តិភាពទៅ » នេះជាការថ្លែងរបស់លោកស្រី Berit Reiss-Andersen។ ការសម្រេចផ្តល់រង្វាន់ណូបែលសន្តិភាពឲ្យអ្នកកាសែត និងសកម្មជនអ៊ីរ៉ង់លោកស្រី Narges Mohammadi បានធ្វើឡើង ខណៈដែលអ៊ីរ៉ង់បានឆ្លងកាត់ចលនាប្រឆាំងរដ្ឋាភិបាលដ៏ធំក្នុងឆ្នាំ ២០២២។
ចលនាប្រឆាំងមួយនេះបានកើតចេញពីការស្លាប់នារី Mahsa Amini វ័យ ២២ឆ្នាំដោយសា្នដៃប៉ូលិសសីលធម៌ក្នុងថ្ងៃទី១៦ កញ្ញា ២០២២។ តាមអង្គការក្រៅរដ្ឋាភិបាលឈ្មោះ Iran Human Rights មហាបាតុកម្មកាលណោះបានរងការវាយបង្រ្កាបយ៉ាងចាស់ដៃពីកម្លាំងប៉ូលិស និងទាហានដោយបណ្តាលឲ្យស្លាប់បាតុករចំនួន ៥៥១នាក់ ក្នុងនោះមានស្រ្តី ៤៩នាក់ និងកូនក្មេង ៦៨នាក់។ « ស្រ្តី ជីវិត សេរីភាព » នេះជាពាក្យស្លោកដែលបានកើតចេញពីចលនាប្រឆាំងពេលនោះ និងដែលត្រូវបានប្រធានគណៈកម្មាធិការណូបែលយកទៅអាននៅក្នុងពិធីប្រកាសផ្តល់រង្វាន់ណូបែលសន្តិភាពឲ្យអ្នកកាសែត និងសកម្មជនអ៊ីរ៉ង់លោកស្រី Narges Mohammadi។
ចំណែកគ្រួសារលោកស្រី Narges Mohammadi បានសាទរដោយចាត់ទុកជាពេលវេលាប្រវត្តិសាស្រ្តសម្រាប់ការប្រយុទ្ធដើម្បីសេរីភាពនៅអ៊ីរ៉ង់។ គួររម្លឹកថា លោកស្រី Narges Mohammadi ជាស្រ្តីអ៊ីរ៉ង់ទី២ ដែលបានទទួលរង្វាន់ណូបែលសន្តិភាព។ កាលពី ២០ឆ្នាំមុន ពោលក្នុងឆ្នាំ ២០០៣ រង្វាន់ណូបែលសន្តិភាពត្រូវបានផ្តល់ឲ្យស្រ្តីជនជាតិអ៊ីរ៉ង់លោកស្រី Shirin Ebadi។ នៅពេលទៅទទួលរង្វាន់ផ្ទាល់ដៃនៅក្រុងអូស្លូ ប្រទេសន័រវែសកាលណោះ លោកស្រី Shirin Ebadi បានផ្គើនរបបដឹកនាំអ៊ីរ៉ង់ដោយមិនប្រើកន្សែងរុំក្បាល និងសក់ទេ។ សម្រាប់លោកស្រី Narges Mohammadi វិញ បើលោកស្រីនៅបន្តជាប់ឃុំ លោកស្រីនឹងមិនអាចទៅទទួលទទួលរង្វាន់ណូបែលផ្ទាល់ដៃជាមួយនឹងប្រាក់រង្វាន់ចំនួន ៩០០ ០០០អឺរ៉ូបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ