ណូបែលវេជ្ជសាស្ត្រ២០២៣បានទៅអ្នកស្រាវជ្រាវ២នាក់ដែលរកឃើញវ៉ាក់សាំងARN messager
ថ្ងៃចន្ទ ទី២ តុលាជាការចាប់ផ្តើមប្រកាសរង្វាន់ណូបែលឆ្នាំ ២០២៣។ ថ្ងៃទី១ ជាការប្រកាសរង្វាន់ណូបែលផ្នែកវេជ្ជសាស្រ្តដែលឆ្នាំ ២០២៣ ត្រូវបានប្រគល់ទៅឲ្យអ្នកស្រាវជ្រាវចំនួន ២នាក់ដែលបានរកឃើញវ៉ាក់សាំងផលិតតាមបច្ចេកវិទ្យាថ្មី ARN messager សម្រាប់បង្ការជំងឺឆ្លងសកលកូវីដ១៩។
ចុះផ្សាយនៅថ្ងៃ៖
ស្តាប់ - ០២:២៨
ជ័យលាភីរង្វាន់ណូបែលវេជ្ជសាស្រ្តឆ្នាំ ២០២៣ ទាំង ២នាក់មានម្នាក់ជាស្រ្តីជនជាតិហុងគ្រីលោកស្រី Katalin Kariko និងម្នាក់ទៀតជាជនជាតិអាមេរិកលោក Drew Weissman។ តាមពិត អ្នកស្រាវជ្រាវទាំងពីរនាក់នេះស្ថិតក្នុងចំណោមអ្នកស្រាវជ្រាវដែលមានស្នាដៃលេចធ្លោផ្សេងទៀត។ តែជម្រើសយកលោកស្រី Katalin Kariko និងលោក Drew Weissman ត្រូវបានចៅក្រមរបស់គណៈកម្មាធិការណូបែលលើកយកហេតុផលពន្យល់ថា គឺដោយអ្នកទាំងពីរបានចូលរួមស្រាវជ្រាវរកឃើញយ៉ាងឆាប់រហ័សមិនធ្លាប់មានពីរបៀបផលិតវ៉ាក់សាំងតាមបែបបច្ចេកវិទ្យាថ្មី ARN messager សម្រាប់បង្ការជំងឺឆ្លងកូវីដ១៩ ខណៈដែលសុខភាពមនុស្សនៅទូទាំងសកលលោកកំពុងទទួលការគំរាមកំហែងដោយជំងឺឆ្លងមួយនេះ។
គួរបញ្ជាក់ថានៅមុនការរកឃើញវ៉ាក់សាំង ARN messager ការផលិតវ៉ាក់សាំងទូទៅនាពេលកន្លងមកត្រូវបានធ្វើឡើងដោយយកមេរោគទៅបន្សាំដើម្បីបង្កើតជាអង់ទីក័រ រួចចាក់ក្នុងខ្លួនមនុស្សដើម្បីបង្ការជំងឺឆ្លងណាមួយ។ ការផលិតវ៉ាក់សាំងរបៀបនេះត្រូវប្រើពេលយូររហូតដល់ច្រើនឆ្នាំដោយឆ្លងកាត់នីតិវិធីជាច្រើន មុននឹងដាក់ឲ្យប្រើប្រាស់ជាផ្លូវការ។ ចំណែកវ៉ាក់សាំងតាមបែបបច្ចេកវិទ្យាថ្មី ARN messager ត្រូវបានផលិតឡើងជាមួយនឹងចំណែកតូចមួយរបស់វីរុសដែលគេហៅប្រូតេអ៊ីន។ តួនាទីរបស់វ៉ាក់សាំង ARN messager នៅពេលចាក់ចូលក្នុងខ្លួនមនុស្ស គឺនាំកោសិកាឲ្យផលិតឡើងវិញនូវប្រូតេអ៊ីនរបស់វីរុសក្នុងគោលដៅផលិតអង់ទីហ្សែនដើម្បីឲ្យប្រព័ន្ធភាពស៊ាំស្គាល់វីរុស និងសម្លាប់វីរុសនោះចោល។
តាមរយៈល្បឿននៃការរកឃើញ និងប្រសិទ្ធិភាពរបស់វ៉ាក់សាំង ARN messager បង្ការជំងឺឆ្លងកូវីដ១៩ពេលនេះ ក្រុមអ្នកស្រាវជ្រាវ និងក្រុមអ្នកវិទ្យាសាស្រ្តសង្ឃឹមប្រើបច្ចេកវិទ្យាដដែលនេះដើម្បីផលិតវ៉ាក់សាំងក្នុងការបង្ការ និងព្យាបាលជំងឺឆ្លង ឬជំងឺមិនឆ្លងផ្សេងទៀត ដូចយ៉ាងជំងឺស៊ីដា ឬជំងឺមហារីក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ