ណូបែលរូបវិទ្យា២០២៣បានទៅរូបវិទូ៣នាក់សម្រាប់ស្នាដៃពាក់ព័ន្ធនឹងអេឡិចត្រុង
ថ្ងៃអង្គារ ទី៣ តុលាជាការប្រកាសផ្តល់រង្វាន់ណូបែលរូបវិទ្យាឆ្នាំ ២០២៣។ សម្រាប់រង្វាន់ណូបែលរូបវិទ្យាឆ្នាំ ២០២៣ នេះត្រូវបានគណៈកម្មាធិការណូបែលផ្តល់ទៅឲ្យរូបវិទូចំនួន ៣រូបសម្រាប់ស្នាដៃពាក់ព័ន្ធនឹងអេឡិចត្រុង។
ចុះផ្សាយនៅថ្ងៃ៖
ស្តាប់ - ០២:៤៧
ជ័យលាភីរង្វាន់ណូបែលរូបវិទ្យាឆ្នាំ ២០២៣ ទាំង ៣នាក់មានទី១ លោក Pierre Agostini ជាជនជាតិបារាំង និងដែលជាអ្នកស្រាវជ្រាវ ទី២ លោកស្រី Anne L’Huillier ជាជនជាតិបារាំងដើមកំណើតស៊ុយអែត និងជាសាស្ត្រាចារ្យរូបវិទ្យាអាតូម និងទី៣ លោក Feren Krausz ជាជនជាតិអូទ្រីសដើមកំណើតហុងគ្រី និងជារូបវិទ្យា។ ស្នាដៃរបស់ជ័យលាភីរង្វាន់ណូបែលរូបវិទ្យាឆ្នាំ ២០២៣ ទាំង ៣នាក់ពាក់ព័ន្ធនឹងអេឡិចត្រុង។ ក្រោយពីបានទទួលដំណឹងភ្លាម លោកស្រី Anne L’Huillier បានបញ្ចេញប្រតិកម្មដោយសប្បាយរីករាយ និងបញ្ជាក់ពីសារៈសំខាន់នៃរង្វាន់ណូបែលសម្រាប់លោកស្រីក្នុងនាមជាស្រ្តី និងដឹងថាមកដល់សព្វថ្ងៃ មានស្រ្តីតិចតួចណាស់ដែលបានទទួលរង្វាន់មួយនេះ។ ប្រាក់រង្វាន់សម្រាប់ណូបែលរូបវិទ្យាមានចំនួន ៩២០ ០០០អឺរ៉ូដែលត្រូវចែកជា ៣ចំណែក។
តាមពិត សម្រាប់រង្វាន់ណូបែលរូបវិទ្យាឆ្នាំ ២០២៣ មានការលើកឈ្មោះស្រ្តីផ្សេងទៀតសម្រាប់ស្នាដៃផ្សេង ដូចជាលោកស្រី Olga Botner ជាជនជាតិដាណឺម៉ាក និងលោកស្រី Sharon Glotzer ជាជនជាតិអាមេរិក។ គួរបញ្ជាក់ថា បើគិតតាំងពីឆ្នាំ ១៩០១ មកទល់នឹងឆ្នាំ ២០២៣ នេះ គឺទើបមានស្រ្តី ៥នាក់ដែលទទួលបានរង្វាន់ណូបែលរូបវិទ្យា។ លោកស្រី Marie Curie ទទួលបានក្នុងឆ្នាំ ១៩០៣ និងនៅ ៦០ឆ្នាំក្រោយមក ពោលក្នុងឆ្នាំ ១៩៦៣ ទើបមានស្រ្តីម្នាក់ទៀតឈ្មោះ Maria Goeppert Mayer។ បន្ទាប់មកទៀត គេត្រូវរង់ចាំ ៥៥ឆ្នាំ ពោលក្នុងឆ្នាំ ២០១៨ ទើបរង្វាន់ណូបែលរូបវិទ្យាបានធ្លាក់ក្នុងដៃស្រ្តីម្នាក់ទៀត គឺលោកស្រី Donna Strickland សម្រាប់ការរកឃើញ Laser និង Optique។
នៅ ២ឆ្នាំក្រោយមក ពោលក្នុងឆ្នាំ ២០២០ មានស្រ្តីម្នាក់ទៀតលោកស្រី Andrea Ghez បានទទួលរង្វាន់ណូបែលរូបវិទ្យាសម្រាប់ការឃើញ « ប្រហោងខ្មៅ » ឬហៅជាភាសាអង់គ្លេស « Black Hole »។ ឥឡូវនេះឆ្នាំ ២០២៣ រង្វាន់ណូបែលរូបវិទ្យាបានប្រគល់ឲ្យស្រ្តីម្នាក់ទៀតលោកស្រី Anne L’Huillier។ គេសង្ឃឹមថានៅពេលខាងមុខ មានស្រ្តីកាន់តែច្រើននឹងទទួលបានរង្វាន់ណូបែល មិនថារូបវិទ្យា គីមីវិទ្យា សេដ្ឋកិច្ច អក្សរសិល្ប៍ វេជ្ជសាស្រ្ត ឬសន្តិភាពទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ