អ៊ែរដូហ្កាន ៖ ស៊ុយអែត ចូលសមាជិកអូតង់ ទាល់តែឲ្យ តួកគី ចូលជាសមាជិកសហភាពអឺរ៉ុប
ថ្ងៃអង្គារ ទី១១កក្កដា អង្គការសម្ព័ន្ធមិត្តអូតង់ ត្រូវរៀបចំកិច្ចប្រជុំកំពូល នៅប្រទេស លីទុយអានី។ សំណុំរឿងសំខាន់ៗ ដែល រដ្ឋសមាជិក ទាំង៣១ប្រទេស ត្រូវយកចិត្តទុកដាក់ខ្លាំង គឺបញ្ហាសង្គ្រាមអ៊ុយក្រែន និងការចូលជាសមាជិករបស់ អ៊ុយក្រែន ទៅក្នុងអង្គការអូតង់ ហើយនិង បេក្ខភាពសមាជិករបស់ ស៊ុយអែត។ ចំពោះសំណុំរឿងស៊ុយអែត ត្រូវថ្នាក់ដឹកនាំ តួកគី យកជាចំណាប់ថ្នូរថា តួកគីនឹងយល់ព្រមបើកភ្លើងខៀវ អនុញ្ញាតឲ្យ ស៊ុយអែត ចូលជាសមាជិកអង្គការអូតង់ ប៉ុន្តែ ត្រូវមានលក្ខខណ្ឌ គឺទាល់តែសហភាពអឺរ៉ុប អនុញ្ញាតឲ្យ តួកគី ចូលជារដ្ឋសមាជិកដែរ។
ចុះផ្សាយនៅថ្ងៃ៖
ស្តាប់ - ០២:២១
«យើងសង្ឃឹមថា ស៊ុយអែត ចូលជាសមាជិកសម្ព័ន្ធអូតង់ ក្នុងពេលឆាប់ៗនេះ ហើយនៅក្នុងកិច្ចប្រជុំកំពូល នៅរដ្ឋធានី Vilnius គឺច្បាស់ជានឹងមានការសម្រេចចិត្តវិជ្ជមានចំពោះបេក្ខភាពស៊ុយអែត »។ នេះបើតាមប្រសាសន៍របស់ អគ្គលេខាធិការអង្គការអូតង់ លោក យែន ស្តុលទែនប៊ែរ (Jens Stoltenberg) ដែលថ្លែងនៅថ្ងៃច័ន្ទ ១ថ្ងៃមុនកិច្ចប្រជុំកំពូលអូតង់ បើកទ្វារនៅប្រទេសលីទុយអានី។
សូមជ្រាបថា បេក្ខភាពសមាជិករបស់ ស៊ុយអែត សុំចូលទៅក្នុងរង្វង់អង្គការអូតង់ គឺត្រូវប្រទេសតួកគី ជំទាស់យកជើងរាទឹក ជាយូរខែមកហើយ។ តួកគី ទំនាស់ ក៏ព្រោះតែ ស៊ុយអែត បានទទួលឲ្យ ពួកសកម្មជនគួដ ដែលជាក្រុមប្រឆាំងនឹងរដ្ឋអំណាចតួកគី បានសិទ្ធជ្រកក្រោនស្នាក់នៅទីនោះ។ ក៏ប៉ុន្តែ ពីថ្ងៃច័ន្ទ ប្រធានាធិបតីតួកគី មុននឹងហោះចេញដំណើរពីរដ្ឋធានីអង់ការ៉ា ទៅប្រទេសលីទុយអានី ទីប្រជុំកំពូលអូតង់ លោក រេសេប តាយីប អ៊ែរដូហ្កាន ប្រកាសលើកឡើងថា «រដ្ឋាភិបាលតួកគី ជាសមាជិកអង្គការអូតង់ ជាង៥០ឆ្នាំមកហើយ។ រដ្ឋបាលទីក្រុងអង់ការ៉ា នឹងគាំទ្របេក្ខភាពរបស់ ស៊ុយអែត ក្នុងការចូលជាសមាជិករបស់ អូតង់ គឺដូចកាលដែល តួកគី បើកផ្លូវឲ្យ ប្រទេសហ្វាំងចូលជាសមាជិកអូតង់ ពេលថ្មីៗនេះ ប្រសិនបើជា សហភាពអឺរ៉ុប យល់ព្រមបើកផ្លូវចរចាឲ្យ តួកគី ចូលជារដ្ឋសមាជិកសហភាពអឺរ៉ុប ដែរ »។
គួររំលឹកថា តាំងពីឆ្នាំ ១៩៨៧ ប្រទេសតួកគី បានដាក់បេក្ខភាពសុំចូលជាសមាជិកសហភាពអឺរ៉ុប តាំងពីពេល សហភាពអឺរ៉ុប នៅជាសហគមសេដ្ឋកិច្ចអឺរ៉ុបម្ល៉េះ។ ទាល់តែជាង១០ឆ្នាំក្រោយ គឺនៅឆ្នាំ១៩៩៩ ទើប សហភាពអឺរ៉ុប ទទួលយកសំណើសុំរបស់តួកគី ប៉ុន្តែ ក៏នៅមិនទាន់បើក នីតិវិធីចរចាជាផ្លូវការ នោះដែរទេ។ ទីបំផុត ចាប់ពីឆ្នាំ២០០៥មក ក៏ត្រូវជាប់ឃាំង ។ ជាប់ឃាំងពីព្រោះតែ សហភាពអឺរ៉ុប ទាមទារលក្ខខណ្ឌជុំវិញការគោរពសិទ្ធិមនុស្ស និងលទ្ធិប្រជាជាធិបតេយ្យ ដែលខាងបច្ចិមប្រទេសបានចោទប្រកាន់ តួកគី ថានៅមានការរំលោភសិទ្ធិមនុស្ស រំលោភគោលការណ៍ប្រជាធិបតេយ្យច្រើននៅឡើយ។ ហេតុនេះគឺមិនទាន់អាចចូលរង្វង់គ្រួសារសហភាពបានទេ។
ទោះជាម្តេចក្តី ជាចម្លើយសារនយោបាយតបទៅតួកគី គឺ អធិការបតីអាល្លឺម៉ង់ លោក អូឡាហ្វ ស្ហុលស៍ ប្រកាសថា គេមិនត្រូវច្រឡូកច្រឡំគ្នា រវាងការចូលជាសមាជិកអូតង់ និង ការចូលសមាជិកសហភាពអឺរ៉ុបនោះឡើយ។ បើតាមថ្នាក់ដឹកនាំអាល្លឺម៉ង់ សំណុំរឿង២នេះ ជាបញ្ហា២ដាច់ដោយឡែកពីគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ