OTAN/NATO៖ លោក យែន ស្តុលទែនប៊ែរ ត្រូវបានតែងតាំងឲ្យបន្តធ្វើជាអគ្គលេខាធិការ មួយឆ្នាំទៀត
លោក យែន ស្តុលទែនប៊ែរ ត្រូវបានប្រទេសសមាជិកអង្គការសម្ព័ន្ធមិត្តអូតង់ បោះឆ្នោតសម្រេចឲ្យបន្តធ្វើជាអគ្គលេខាធិការអូតង់ មួយឆ្នាំទៀត។ នេះគឺជាការផ្តល់សេចក្តីទុកចិត្ត លើការងាររបស់លោកកន្លងមក ក្នុងកាលៈទេសៈ ដែលក្រុមប្រទេសអូតង់ កំពុងតែប្រឈមមុខខ្លាំងជាមួយរុស្ស៊ី ក្នុងបរិបទសង្គ្រាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២៩
លើទំព័រ Twitter លោក យែន ស្តុលទែនប៊ែរ បានសរសេរសារ ថាលោកសូមអរគុណ ចំពោះការផ្តល់សេចក្តីទុកចិត្ត ពីសំណាក់ប្រទេសសមាជិកសម្ព័ន្ធមិត្តអូតង់ ដែលបានអនុញ្ញាតឲ្យលោកបន្តការងារមួយឆ្នាំទៀត រហូតដល់ថ្ងៃទី១ខែតុលាឆ្នាំ២០២៤។ អតីតនាយករដ្ឋមន្ត្រីន័រវែស វ័យ៦៤ឆ្នាំរូបនេះ បានបន្ថែមថា ចំណងសហប្រតិបត្តិការ រវាងអឺរ៉ុប និងអាមេរិកខាងជើង តាមរយៈសម្ព័ន្ធភាពអូតង់ បានធានាឲ្យមានសិទ្ធិសេរីភាព និងបានការពារសន្តិសុខអស់រយៈពេល៧៥ឆ្នាំមកហើយ។ ក្នុងកាលៈទេសៈ ដែលពិភពលោកកាន់តែប្រឈមគ្រោះថ្នាក់ សម្ព័ន្ធភាពនេះកាន់តែមានសារៈសំខាន់ខ្លាំងឡើងថែមទៀត។
គួររំលឹកថា អស់ជាច្រើនសប្តាហ៍មកហើយ ដែលអង្គការសម្ព័ន្ធភាពអាត្លង់ទិកខាងជើង ហៅកាត់ថា អូតង់ ឬ ណាតូ ត្រូវស្វែងរកមនុស្សថ្មីម្នាក់ មកកាន់មុខតំណែងជាអគ្គលេខាធិការ ខណៈដែលលោកយែន ស្តុលទែនប៊ែរ ត្រូវចប់អាណត្តិ។ មានឈ្មោះបេក្ខជនខ្លះ ត្រូវបានគេលើកឡើងថាអាចមកជំនួសលោក យែន ស្តុលទែនប៊ែរ ដូចជា លោកស្រីអតីតនាយករដ្ឋមន្រ្តីដាណឺម៉ាក Mette Frederiksen និងលោករដ្ឋមន្ត្រីការពារជាតិអង់គ្លេស Ben Wallace ជាដើម។
តែទីបំផុត អគ្គរដ្ឋទូតនៃប្រទេសទាំង៣១សមាជិកអូតង់ បានជួបប្រជុំគ្នានៅស្នាក់ការធំរបស់អូតង់ នៅក្រុងព្រុចស៊ែល ដោយបានសម្រេចយល់ព្រម ពន្យាអាណត្តិរបស់លោក យែន ស្តុលទែនប៊ែរ ថែមមួយឆ្នាំទៀត។ តែទន្ទឹមគ្នានេះ មន្ត្រីទូតមួយចំនួន បានបង្ហាញការបារម្ភ ថាការពន្យាពេលដល់ឆ្នាំក្រោយ ដើម្បីរើសមនុស្សថ្មីមកធ្វើជាអគ្គលេខធិការអូតង់ វាអាចនឹងចោទជាបញ្ហាកាន់តែលំបាក ព្រោះវាកៀកនឹងការបោះឆ្នោតសភាអឺរ៉ុប នៅខែមិថុនា២០២៤ ព្រមទាំងការបោះឆ្នោតប្រធានាធិបតីអាមេរិក ខែវិច្ឆិកា២០២៤។ ការបោះឆ្នោតទាំងនេះ អាចនឹងធ្វើឲ្យមានការផ្លាល់ប្តូរនយោបាយផ្ទៃក្នុង ព្រមទាំងការតែងតាំងមុខតំណែងសំខាន់ៗផងដែរ។
យ៉ាងណាក៏ដោយ លោក ចូ បៃដិន បានផ្ញើសារអបអរសាទរ និងបានសរសើរការងារដឹកនាំរបស់លោក យែន ស្តុលទែនប៊ែរ នៅក្នុងកាលៈទេសៈដ៏រំជើបរំជួល ដែលអង្គការអូតង់កំពុងតែឆ្លងកាត់នាពេលនេះ ក្នុងបរិបទសង្គ្រាមនៅអ៊ុយក្រែន។ យ៉ាងណាមិញ នៅប៉ុន្មានថ្ងៃខាងមុខនេះ អូតង់នឹងបើកជំនួបកំពូលធំរបស់ខ្លួននៅទីក្រុងវីលនុស ប្រទេសលីទុយអានី។ លោកប្រធានាធិបតីអ៊ុយក្រែន បានថ្លែងរំលឹកថា លោកសង្ឃឹមថាជំនួបកំពូលនេះ នឹងផ្តល់ពន្លឺជាក់ច្បាស់ ទាក់ទិននឹងការទទួលយកបេក្ខភាពអ៊ុយក្រែន ចូលជាសមាជិករបស់អូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ