បារាំង ជំរុញ អារ៉ាប៊ីសាអូឌីត ឲ្យពន្លឿនសកម្មភាពដើម្បីបុព្វហេតុអាកាសធាតុ
រដ្ឋមន្ត្រីថាមពលបារាំង បានជំរុញ ព្រះរាជាណាចក្រប្រេង អារ៉ាប៊ីសាអូឌីត ឲ្យពិនិត្យផែនការសកម្មភាពឡើងវិញ ដើម្បីបុព្វហេតុបរិស្ថានអាកាសធាតុ ជាពិសេសឲ្យពន្លឿនអព្យាក្រឹតកាបូន។ ការណ៍នេះបង្ហាញឲ្យដឹងតាមរយៈដំណើរទស្សនកិច្ចរបស់អ្នកស្រីរដ្ឋមន្ត្រីថាមពលបារាំង នៅរាជធានីរីយ៉ាដ នាថ្ងៃអាទិត្យ ទី៩កក្កដា ។ បារាំង ក៏បានឆ្លៀតឱកាស ស្នើប្រាប់ អារ៉ាប៊ីសាអូឌីត អំពីលទ្ធភាព-សមត្ថភាពរបស់ខ្លួន ក្នុងការវិនិយោគទុនផ្នែកថាមពលនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:២៦
គឺក្នុងរបៀបវរៈ ថាមពលនិងអាកាសធាតុ ដែល រដ្ឋមន្ត្រីថាមពលបារាំង អ្នកស្រី Agnès Pannier-Runacher អញ្ជើញទៅ ក្រុងរីយ៉ាដ របស់ អារ៉ាប៊ីសាអូឌីត។ តាំងតែពីឆ្នាំ២០២១មក អារ៉ាប៊ីសាអូឌីត ប្រទេសផលិតប្រេងនាំចេញលំដាប់ធំជាងគេលើពិភពលោក បានសន្យាបង្ហាញសុឆន្ទៈ កាត់បន្ថយបញ្ចេញផ្សែងពុល និងគ្មានបញ្ចេញផ្សែងពុលសោះ យ៉ាងយូរបំផុតឆ្នាំ២០៦០។ ក៏ប៉ុន្តែ រដ្ឋមន្ត្រីថាមពលបារាំង ចង់ឲ្យ អារ៉ាប៊ីសាអូឌីត ពន្លឿនឲ្យកាន់តែឆាប់ជាងនេះ គឺត្រឹមឆ្នាំ ២០៣០-២០៣៥។ ស្របនឹងសម្តីនេះ អ្នកស្រី Agnès Pannier-Runacher ចង់លើកឡើងថា បារាំង អាចនឹងជួយ អារ៉ាប៊ីសាអូឌីត ឲ្យឆាប់សម្រេចផែនការ។
ទោះបីជារងការរិះគន់ពីក្រុមអ្នកប្រឆាំងនឹងថាមពលបរមាណូក្តី ក៏រដ្ឋបាលទីក្រុងប៉ារីស បាន ជ្រើសរើសការវិយោគទុនបង្កើនថាមពលនុយក្លេអ៊ែរ ដែល រដ្ឋបារាំងសព្វថ្ងៃ ចាត់ទុកថាជាថាមពលស្អាត និងជាចំណែកមួយក្នុងការចូលរួមកាត់បន្ថយការបញ្ចេញផ្សែងពុល។
តាមរយៈប្រសាសន៍របស់អ្នកស្រីរដ្ឋមន្ត្រី Agnès Pannier-Runacher គឺបារាំងមានសមត្ថភាពប្រកួតប្រជែងខ្ពស់ ខាងថាមពលនុយក្លេអ៊ែរ ដែលអាចនឹងបំពេញតម្រូវការ ក្តីរំពឹងទុក របស់ អារ៉ាប៊ីសាអូឌីត បាន។
បើតាម Aramco ក្រុមហ៊ុនរដ្ឋរបស់អារ៉ាប៊ីសាអូឌីត គឺប្រទេសនេះអាចនឹងឈានដល់សម្រេចផែនការអព្យាក្រឹត្យកាបូន នៅឆ្នាំ២០៥០ ពោលគឺ១០ឆ្នាំមុនផែនការ ខណៈដែលប្រទេសជិតខាង គឺ អេម៊ីរ៉ាត់អារ៉ាប់រួម ក៏បានចាក់បញ្ចូលថវិការាប់រយលានដុល្លារ ដើម្បីវិនិយោគទុនគម្រោងកម្មវិធីថាមពលស្អាត ហើយ នៅចុងឆ្នាំនេះ អេម៊ីរ៉ាត់អារ៉ាប់រួម ក៏នឹងធ្វើជាម្ចាស់ផ្ទះរៀបចំសន្និសីទអន្តរជាតិស្តីពីអាកាសធាតុ Cop28 នៅក្រុងឌុយប៉ៃ ទៀតផង ។
ទាំងអារ៉ាប៊ីសាអូឌីត ទាំងអេម៊ីរ៉ាត់អារ៉ាប់រួម និងប្រទេសផលិតប្រេងនៅឈូងសមុទ្រពែរ្ស៍ គឺហាក់បង្ហាញសកម្មភាពនិងសម្តីសន្យាអំពីការគិតគូរពីបរិស្ថានអាកាសធាតុ។ ប៉ុន្តែ នៅពីម្ខាងទៀត ក៏ពឹតប្រឹងបូមចម្រាញ់ប្រេង ដើម្បីបំពេញតម្រូវការទីផ្សារផង និងជាសេដ្ឋកិច្ចចម្បងរបស់ខ្លួនផង។ ទង្វើនេះជាហេតុដែល សកម្មជនបរិស្ថានអាកាសធាតុ បានរិះគន់ថា ពួកគេ ដៃម្ខាងពន្លត់ភ្លើង ដៃម្ខាងទៀត ដុតភ្លើង ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ