បារាំងបើកសម្ពោធពិព័រណ៍យន្តហោះអន្តរជាតិ Bourget ក្រោយអាក់ខានដោយសារកូវីដ
ថ្ងៃចន្ទទី១៩មិថុនា បារាំងបានបើកសម្ពោធពិព័រណ៍យន្តហោះអន្តរជាតិដ៏ធំរបស់ខ្លួន នៅជាយក្រុងប៉ារីស បន្ទាប់ពីអាក់ខានអស់រយៈពេល៤ឆ្នាំ ដោយសារតែកូវីដ១៩។ កម្មវិធីពិព័រណ៍ពេញមួយសប្តាហ៍នេះ គឺជាឱកាសតាំងបង្ហាញ នូវយានផ្លូវអាកាសគ្រប់ប្រភេទ ប្រកបដោយបច្ចេកវិទ្យាទំនើបចុងក្រោយបំផុត នៃបណ្តាក្រុមហ៊ុនឧស្សាហកម្មផ្លូវអាកាស។ ពិព័រណ៍ឆ្នាំនេះ គឺគេរំពឹងរងចាំមើល យន្តហោះដែលបញ្ចេញឧស្ម័នកាបូនិកតិចបំផុត។
ចុះផ្សាយនៅថ្ងៃ៖
ស្តាប់ - ០២:៣៤
លោកម៉ាក្រុងបានមានវត្តមាន ពេញមួយព្រឹកថ្ងៃទី១៩មិថុនា នៅក្នុងកម្មវិធីបើកសម្ពោធពិព័រណ៍យន្តហោះអន្តរជាតិ Bourget នៅជាយខាងជើងក្រុងប៉ារីស។ លោកបានធ្វើដំណើរទៅ ដោយជិះឧទ្ធម្ភាគចក្រ H160 ដ៏ទំនើបចុងក្រោយបង្អស់ ផលិតដោយក្រុមហ៊ុន Airbus Helicopters ដែលឧទ្ធម្ភាគចក្រនេះ អាចហោះបានដោយប្រើសាំងក្នុងទំហំ៣០% ដែលជាប្រភេទសាំងយន្តហោះចីរភាព (SAF)។ នេះគឺជាការបង្ហាញចេតនារបស់រដ្ឋភិបាលបារាំង ដែលចង់ផ្តោតអាទិភាពទៅលើ ការកាត់បន្ថយការបញ្ចេញឧស្ម័នកាបូនិក នៅក្នុងវិស័យអាកាសចរណ៍។
នៅថ្ងៃទីមួយនៃពិធីពិព័រណ៍ដ៏នេះ ក៏មានផងដែរនូវការហោះបង្ហាញ លើផ្ទៃអាកាស នូវយន្តហោះចម្បាំងទំនើប ដូចជាយន្តហោះ Rafale និងយន្តហោះដឹកអ្នកដំណើរប្រភេទថ្មី Airbus A321 XLR។ នៅលើដី មនុស្សម្នាជាច្រើននាក់ មានខ្លះក្នុងសម្លៀកបំពាក់ស៊ីវីល ខ្លះក្នុងសម្លៀកពាក់ទាហានផ្លូវអាកាស បន្តដើរចូលតាមស្តង់ធំៗ ទាំងអស់មានប្រមាណ២៥០០ ដែលសុទ្ធតែជាក្រុមហ៊ុនបច្ចេកវិទ្យា និងឧស្សាហកម្មផ្នែកផ្លូវអាកាស។
គួរបញ្ជាក់ថា ពិព័រណ៍យន្តហោះអន្តរជាតិ Bourget របស់បារាំង គឺជាពិព័រណ៍ធំជាងគេបង្អស់ នៃពិភពលោកក្នុងវិស័យនេះ។ ជានិច្ចជាកាល ក្នុងឱកាសនេះ គឺជាពេលវេលា ដែលក្រុមហ៊ុននានាចុះកិច្ចសន្យាបញ្ជាទិញយន្តហោះ ឬក៏បច្ចេកវិទ្យាថ្មីៗសម្រាប់ប្រើក្នុងវិស័យនេះ។ តែទន្ទឹមគ្នានេះ វិស័យដឹកជញ្ជូនផ្លូវអាកាស បានចូលរួមបញ្ចេញឧស្ម័នកាបូនិក ប្រមាណជា៣% នៃទំហំកាបូនិកទូទាំងសកលលោក។ ក្រុមអង្គការបរិស្ថានរិះគន់ថា វិស័យនេះត្រូវតែកាត់បន្ថយសកម្មភាព ដើម្បីចូលរួមដោះស្រាយវិបត្តិអាកាសធាតុសកលលោក។
តែយ៉ាងណា លោកប្រធានាធិបតីបារាំង បានឆក់ឱកាសនេះ ដើម្បីប្រកាសការពារគម្រូសេដ្ឋកិច្ចនិងសង្គម ដែលផ្តោតទៅលើ របកគំហើញថ្មី បច្ចេកវិទ្យាថ្មី ដើម្បីពង្រឹងវិស័យឧស្សាហកម្មផ្លូវអាកាស ធ្វើយ៉ាងណាឈានទៅកាត់បន្ថយការបញ្ចេញឧស្ម័នកាបូនិក មានតម្លាភាព ជាជាងការហាមឃាត់រារាំង មិនឲ្យមានការរីកចម្រើនទៅមុខ។
តាមការរំពឹងទុក នៅរវាង២៥ឆ្នាំទៀត វិស័យអាកាសចរណ៍នឹងកើនឡើងមួយទ្វេជាពីរ។ ដើម្បីចូលរូមដោះស្រាយវិបត្តិអាកាសធាតុ វិស័យអាកាសចរណ៍ពិភពលោក បានកំណត់កម្មវត្ថុរួម ឈានទៅមានអព្យាក្រិត្យភាពកាបូននៅឆ្នាំ២០៥០។ ក្រុមហ៊ុនដឹកជញ្ជូនផ្លូវជាច្រើន នឹងបញ្ជាទិញនូវយន្តហោះថ្មី ដែលស៊ីសាំងកាន់តែតិច ហើយបញ្ចេញឧស្ម័នកាបូនិកតិចបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ