បោះឆ្នោតប្រធានាធិបតីតួកគី៖លោកអ៊ែរដូហ្កានកំពុងឈានទៅកាន់អំណាចចំនួន ៥ឆ្នាំបន្ថែមទៀត?
នៅថ្ងៃអាទិត្យ ទី២៨ ឧសភានេះ ប្រទេសតួកគីបានរៀបចំបោះឆ្នោតប្រធានាធិបតីជុំទី២។ មានបេក្ខជនចំនួន ២នាក់ដែលអ្នកបោះឆ្នោតត្រូវជ្រើសរើសសម្រាប់ការបោះឆ្នោតជុំទី២ គឺប្រធានាធិបតីផុតអាណត្តិលោកអ៊ែរដូហ្កាន និងប្រធានគណបក្សប្រឆាំងលោក កេម៉ាល់ គីលីច្សដារ៉ូហ្គូ។ តាមលទ្ធផលស្ទង់មតិចុងក្រោយ លោកអ៊ែរដូហ្កានដែលបានកាន់អំណាចរយៈពេល ២០ឆ្នាំកំពុងមានប្រៀបឈានទៅកាន់អំណាចចំនួន ៥ឆ្នាំបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងការបោះឆ្នោតជុំទី១ កាលពី ២សប្តាហ៍មុន ប្រធានាធិបតីផុតអាណត្តិលោកអ៊ែរដូហ្កានបាននាំមុខបេក្ខជនគូប្រជែងផ្សេងទៀតដោយទទួលបានសំឡេងគាំទ្រចំនួន ៤៩,៥១%។ ចំណែកអ្នកដែលទទួលបានសំឡេងច្រើនបន្ទាប់ គឺប្រធានគណបក្សប្រឆាំងលោកកេម៉ាល់ គីលីច្សដារ៉ូហ្គូដោយទទួលបានសំឡេងគាំទ្រចំនួន ៤៤,៨៨%។ តែលទ្ធផលដែលបេក្ខជនទាំងពីរបានទទួលនៅជុំទី១ មិនអាចអនុញ្ញាតឲ្យបេក្ខជនណាម្នាក់ជាប់ឆ្នោតភ្លាមៗឡើយ។ នេះហើយជាមូលហេតុនៃការរៀបចំបោះឆ្នោតជុំទី២ នៅពេលនេះ។
ក្នុងរយៈពេល ១៥ថ្ងៃកន្លងទៅ បេក្ខជនអ៊ែរដូហ្កានវ័យ ៦៩ឆ្នាំ និងបេក្ខជនគីលីច្សដារ៉ូហ្គូវ័យ ៧៤ឆ្នាំបានប្រឹងប្រែងឃោសនា និងព្យាយាមចងសម្ព័ន្ធជាមួយគណបក្សផ្សេង ពិសេសទាញយកសំឡេងឆ្នោតពីគណបក្សផ្សេងដែលទទួលបានសំឡេងគាំទ្រតិចតួចនៅក្នុងការបោះឆ្នោតជុំទី១។ ជាក់ស្តែង លោកអ៊ែរដូហ្កានទទួលបានការគាំទ្រពីបេក្ខជនប្រធានគណបក្សជាតិនិយមជ្រុលលោក Sinan Ogan។ នៅក្នុងការបោះឆ្នោតជុំទី១ បេក្ខជនប្រធានគណបក្សជាតិនិយមជ្រុលរូបនេះទទួលបានចំណាត់ថ្នាក់ទី៣ ដោយទទួលបានសំឡេងគាំទ្រចំនួន ៥,១៧%។
ចំណែកលោកកេម៉ាល់ គីលីច្សដារ៉ូហ្គូទទួលបានការគាំទ្រពីថ្នាក់ដឹកនាំនៃក្រុមគណបក្សស្តាំនិយមជ្រុល។ តើរវាងលោកអ៊ែរដូហ្កាន និងលោកគីលីច្សដារ៉ូហ្គូ ពលរដ្ឋតួកគីបោះឆ្នោតជ្រើសយកអ្នកណា?។ គេនឹងដឹងលទ្ធផលក្នុងថ្ងៃអាទិត្យ ទី២៨ ឧសភានេះ។ តែបើផ្អែកតាមលទ្ធផលស្ទង់មតិកាលពីថ្ងៃទី២០ និងទី២១ ឧសភា លោកអ៊ែរដូហ្កានបាននាំមុខលោកគីលីច្សដារ៉ូហ្គូដោយទទួលបានសំឡេងគាំទ្រចំនួន ៥២,៧% ទល់នឹង ៤៧,៣%។ បើលទ្ធផលផ្លូវការដូចគ្នា ឬស្រដៀងគ្នានឹងលទ្ធផលស្ទង់មតិមែន ប្រធានាធិបតិថ្មីរបស់តួកគីជាប្រធានាធិបតីផុតអាណត្តិលោកអ៊ែរដូហ្កានដែលបានកាន់តំណែងរយៈពេល ២០ឆ្នាំមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ