បាតុភូតឡានីញ៉ានៅតែមិនអាចបញ្ចៀសការកើនឡើងកម្តៅផែនដីបាន
បាតុភូតឡានីញ៉ា (La Nina) បានវិលត្រលប់មកវិញ ហើយទំនងជានឹងមានវត្តមានដល់ដើមឆ្នាំ ២០២២ខាងមុខ។ ក៏ប៉ុន្តែទីភ្នាក់ងារអង្គការសហប្រជាជាតិនិយាយថាទោះបីជាមានឥទ្ធិពលត្រជាក់របស់ឡានីញ៉ាក្តី ក៏សីតុណ្ហភាពនៅក្នុងតំបន់ជាច្រើននឹងនៅតែជៀសមិនផុតពីការកើនឡើងកម្តៅហួសកម្រិតមធ្យមឡើយ។
ចុះផ្សាយនៅថ្ងៃ៖
ស្តាប់ - ០២:៣២
អង្គការឧតុនិយមពិភពលោក (WMO) បាននិយាយនៅថ្ងៃអង្គារ ទី៣០ វិច្ឆិកាថាបាតុភូតឡានីញ៉ាដែលបានគ្រប់ដណ្តប់ពិភពលោកក្នុងរវាងខែសីហា ឆ្នាំ២០២០ ដល់ខែឧសភាឆ្នាំនេះនឹងលេចរូបរាងជាថ្មី ហើយអាចអូសបន្លាយដល់ដើមឆ្នាំ ២០២២ខាងមុខ។
តែទោះបីជាមានឥទ្ធិពលត្រជាក់នៃបាតុភូតធម្មជាតិនេះក៏ដោយ ក៏គេព្យាករថាសីតុណ្ហភាពនៅក្នុងផ្នែកជាច្រើននៃពិភពលោកនឹងនៅតែកើនឡើងខ្ពស់ជាងសីតុណ្ហភាពកម្រិតមធ្យម ដោយសារតែកម្តៅប្រមូលផ្តុំនៅក្នុងបរិយាកាស។ កម្តៅដែលគេដឹងថាកើនឡើងពីការបញ្ចេញឧស្ម័នផ្ទះកញ្ចក់ និងកើតចេញពីស្នាដៃរបស់មនុស្ស។
ប្រធានអង្គការ WMO លោក Petteri Taalas និយាយថា ឥទ្ធិពលត្រជាក់នៃបាតុភូតឡានីញ៉ាឆ្នាំ ២០២០/២០២១ (ខែសីហា ឆ្នាំ២០២០-ខែឧសភាឆ្នាំ២០២១) នឹងធ្វើឲ្យឆ្នាំ ២០២១នេះក្លាយជាឆ្នាំមួយក្នុងចំណោមឆ្នាំក្តៅបំផុតទាំង១០នៅក្នុងកំណត់ត្រា។ តែបើគ្មានបាតុភូតធម្មជាតិនេះនោះទេ ២០២១ អាចនឹងក្លាយជាឆ្នាំដែលក្តៅបំផុត។
គួរបញ្ជាក់ថា ឡានីញ៉ាអាចជួយកាត់បន្ថយការកើនឡើងកម្តៅបានរយៈពេលខ្លី។ វាគឺជាការពិតជាក់ស្តែងណាស់ដែលថាបាតុភូតនេះនឹងមិនអាចផ្លាស់ប្តូរនិន្នាការឡើងកម្តៅរយៈពេលវែង ឬកាត់បន្ថយភាពបន្ទាន់នៃសកម្មភាពដើម្បីអាកាសធាតុឡើយ។
សីតុណ្ហភាពត្រូវបានព្យាករថានឹងខ្ពស់ជាងកម្រិតមធ្យម នៅតំបន់ភាគខាងកើត និងភាគអាគ្នេយ៍អាមេរិកខាងជើង ភាគច្រើននៃទ្វីបអឺរ៉ុប និងភាគឦសាននៃអាស៊ី។ សីតុណ្ហភាពខ្ពស់ជាងកម្រិតធម្មតា ក៏ត្រូវបានគេប៉ាន់ស្មានដែរថានឹងកើតឡើងនៅជិតតំបន់អេក្វាទ័រនៃទ្វីបអាហ្រ្វិក រួមទាំងតំបន់ម៉ាដាហ្គាស្កាដែលរងគ្រោះដោយគ្រោះរាំងស្ងួតរួចហើយ និងដែលត្រូវបានគេចាត់ទុកថាជាទីតាំងកំពុងប្រឈមមុខនឹងការប្រែប្រួលអាកាសធាតុដំបូងបង្អស់របស់ពិភពលោក។
គួរជ្រាបដែរថា ឡានីញ៉ាសំដៅដល់ការចុះត្រជាក់ទ្រង់ទ្រាយធំនៃសីតុណ្ហភាពលើផ្ទៃនៅកណ្តាល និងភាគខាងកើតនៃមហាសមុទ្រប៉ាស៊ីហ្វិក។ បាតុភូតឡានីញ៉ាកើតឡើងរៀងរាល់ពីរទៅប្រាំពីរឆ្នាំម្តង។ ប៉ុន្តែ WMO បានព្រមានថាការឡើងកម្តៅផែនដីកំពុងបណ្តាលឲ្យឥទ្ធិពលបាតុភូតធម្មជាតិនេះផ្លាស់ប្តូរនិងមានទម្រង់កាន់តែធ្ងន់ធ្ងរទៅៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ