កូវីដ១៩ ធ្វើឱ្យមនុស្សដល់ទៅ១៥០លាននាក់ធ្លាក់ខ្លួនក្រីក្រខ្លាំង
ចុះផ្សាយនៅថ្ងៃ៖
ស្តាប់ - ០៦:៥៧
ការរាតត្បាតនៃជំងឺកូវីដ១៩ បានធ្វើឱ្យពិភពលោកក្រឡាប់ចាក់ ស្ទើរគ្រប់វិស័យ។ បើតាមរបាយការណ៍របស់ធនាគារពិភពលោក ចេញផ្សាយនៅថ្ងៃពុធទី ៧ តុលា ២០២០ អត្រានៃជនក្រីក្របានកើនឡើងជាថ្មី មិនធ្លាប់មានទេ គិតចាប់តាំងពីឆ្នាំ១៩៩០មក។ ជាងនេះទៅទៀត ពីពេលនេះដល់ចុងឆ្នាំ២០២១ កូវីដ១៩ អាចនឹងធ្វើឱ្យប្រជាពលរដ្ឋលើភពផែនដី ដល់ទៅ ១៥០លាននាក់ ធ្លាក់ខ្លួនក្រីក្រខ្លាំង ដោយមានប្រាក់មិនដល់១,៩ដុល្លារផងក្នុងថ្ងៃសម្រាប់រស់។
ជាលើកទីមួយគិតតាំងពីជិត២៥ឆ្នាំកន្លងមកនេះ អត្រានៃជនក្រីក្រនៅលើពិភពលោកបានកើនឡើងជាថ្មី។ បើតាមរបាយការណ៍របស់ធនាគារពិភពលោក នៅឆ្នាំ២០២០នេះ មានពលរដ្ឋនៅលើភពផែនដីប្រមាណពី ៩,១%ទៅ៩,៤% រស់ក្នុងភាពក្រីក្រខ្លាំង។ ពីពេលនេះដល់ចុងឆ្នាំ២០២១ វិបត្តិកូវីដ១៩អាចនឹងរុញច្រានមនុស្សដល់ទៅ ១៥០លាននាក់ ឱ្យធ្លាក់ខ្លួន ក្លាយជា ជនក្រីក្រខ្លាំងបំផុត។ ស្ថាប័នអន្តរជាតិ កំណត់ថាមានលុយក្រោម១,៩ដុល្លារ ក្នុងមួយថ្ងៃសម្រាប់រស់ ត្រូវបានចាត់ទុកជាជនក្រីក្រខ្លាំងបំផុត។
អត្រានៃជនក្រីក្របំផុតនឹងបន្តកើនឡើង យ៉ាងហោចក្នុងរយៈបីឆ្នាំទៅមុខទៀត។ ប្រសិនបើគ្មានវិបត្តិកូវីដ១៩ផ្ទុះឡើងទេ អត្រាជនក្រីក្រពិភពលោកត្រូវធ្លាក់មកត្រឹម៧,៩%នៅឆ្នាំ២០២០។ តាំងពីជិតបីទសវត្សរ៍កន្លងមកនេះ មានពលរដ្ឋចំនួន១១០០លាននាក់ បានចាកចេញពីភាពក្រីក្រ ក្នុងនោះ៨០០លាននាក់ជាពលរដ្ឋចិន។ នៅក្នុងរវាងពីឆ្នាំ១៩៩០ដល់ឆ្នាំ២០១៥ ភាពក្រីក្រនៅពិភពលោកត្រូវបានកាត់បន្ថយជាមធ្យម១% ក្នុងមួយឆ្នាំ។ នេះបើតាមការលម្អិតរបស់របាយការណ៍ដដែល។
អ្នកក្រថ្មី ជានរណា ?
ជាទូទៅ អ្នកក្រមានផ្តុំគ្នាច្រើននៅតាមប្រទេសដែលធ្លាប់មានអត្រាក្រីក្រខ្ពស់ស្រាប់ និងភាគច្រើនជាអ្នករស់នៅតាមជនបទ ក្មេង និងដោយពុំបានរៀនសូត្រត្រឹមត្រូវ។ ជន រស់ក្រោមបន្ទាត់នៃភាពក្រីក្រខ្លាំងបំផុតបួននាក់ក្នុងចំណោម៥នាក់ រស់នៅជនបទ បើទោះបីជាអ្នករស់នៅជនបទមានចំនួនតែ៤៨%នៃប្រជាពលរដ្ឋសរុបក្តី។ មួយភាគបីនៃអ្នកក្រថ្មី រស់នៅអាហ្វ្រិក។
ប៉ុន្តែរបាយការណ៍របស់ធនាគារពិភពលោកឆ្នាំនេះបានរំលេចឱ្យឃើញថា រូបភាពថ្មីនៃភាពក្រីក្រ។ ក្នុងចំណោម “អ្នកក្រថ្មី” ១០នាក់ ៨នាក់ (៨២%) ជាពលរដ្ឋរស់ក្នុងប្រទេសដែលមានចំណូលមធ្យម ដូចយ៉ាងប្រទេសឥណ្ឌា កេនយ៉ា ឬឡាវ។ បើប្រៀបធៀបទៅនឹងអ្នកក្រខ្លាំងមុនសម័យកូវីដ “អ្នកក្រថ្មី” ច្រើនតែជាអ្នកក្រុង អ្នកបានទទួលការអប់រំរៀនសូត្រគួរសម និងមិនមែនជាអ្នកប្រុងទៅធ្វើស្រែអ្នកចំការ ទៅធ្វើការក្នុងវិស័យកសិកម្មទេ តែច្រើនតែជាអ្នកធ្វើការនៅក្នុងវិស័យសេវាកម្ម សំណង់ ឧស្សាហកម្ម ឬពាណិជ្ជកម្ម។
ពាក្យថាក្រីក្រ មិនមែនកំរិតត្រឹមតែមានប្រាក់សម្រាប់រស់១,៩ដុល្លារក្នុងមួយថ្ងៃ មួយមុខទេ។ មិនបានទៅសាលារៀន មិនបានទទួលការព្យាបាលថែទាំសុខភាព និងចំណីអាហារ ព្រមទាំងសេវាអ៊ីនធ័រនែត ក៏ជាចំណែកមួយនៃភាពក្រីក្រដែរ។ របាយការណ៍របស់ធនាគារពិភពលោកបានរំលឹកថា មកទល់នឹងចុងខែសីហា កុមារជាង១ពាន់លាននាក់មិនបានទៅសាលា គ្រួសារក្រីក្រគ្មានពេល គ្មានធនធាន និងគ្មានកន្លែងឱ្យកូនរៀនសូត្រពីចម្ងាយបានទេ។ វិបត្តិកូវីដ១៩ដែលបានធ្វើប្រព័ន្ធសុខាភិបាលច្រាល់ អាចនឹងបង្កើនមរណភាពកុមារចំនួន៤៥%។
បើតាមរបាយការណ៍ នៅឆ្នាំ២០១៨ ពាក់កណ្តាលនៃជនក្រីក្រី គឺជាកុមារឬក្មេងក្រោមអាយុ១៥ឆ្នាំ។ តែចំនួនកុមារតំណាងឱ្យតែ១ភាគបួននៃប្រជាជនសរុបសោះ។
ដោយហេតុកូវីដ១៩ សេដ្ឋកិច្ចពិភពលោក នៅឆ្នាំ២០២០ ដាំក្បាលចុះអស់ ៥,២%។ ដំណើរសេដ្ឋកិច្ចដើរថយក្រោយខ្លាំងមិនធ្លាប់មានតាំងពី៨០ឆ្នាំមក នឹងធ្វើការងារចំនួន១៩៥លាន នឹងត្រូវបាត់បង់នៅឆមាសទីពីរ។ នៅក្នុងប្រទេសដែលគ្មានរចនាសម្ព័ន្ធសង្គមរឹងមាំ និងគ្របណ្តប់ដោយប្រព័ន្ធសេដ្ឋកិច្ចក្រៅផ្លូវការ គ្មានប្រព័ន្ធការពារពលរដ្ឋត្រឹមត្រូវ បាត់បង់ការងារ គឺជាការច្រានទម្លាក់ក្នុងស្ថានភាពផុយស្រួយ ទន់ខ្សោយមួយរំពេច។ ធនាគារពិភពលោកសម្គាល់ឃើញថាមានប្រទេសច្រើនណាស់ដែលពលរដ្ឋបានធ្លាក់ប្រាក់ចំណូលការងារយ៉ាងគំហុក ស្ទើរមិនដែលធ្លាប់ជួបប្រទះសោះពីមុនមក។
ការប្រែប្រួលអាកាសធាតុ
បើតាមធនាគារពិភពលោក ក្រៅពីកូវីដ នៅមានកត្តាធំៗពីរផ្សេងទៀត ជាអ្នករួមចំណែកបង្កើនភាពក្រីក្រនៅក្នុងប្រទេសមានចំណូលមធ្យម នោះគឺជម្លោះប្រដាប់អាវុធ និងការប្រែប្រួលអាកាសធាតុ។ កត្តាទាំងពីរនេះ បានពន្យឺតល្បឿននៃការកាត់បន្ថយភាពក្រីក្រនៅពិភពលោក រួចជាស្រេចទៅហើយនៅរវាងពីឆ្នាំ ២០១៣-២០១៧។ ជម្លោះប្រដាប់អាវុធនៅស៊ីវី និងយេម៉ែន បានបង្កើនភាពក្រីក្រនៅតំបន់ដើមបូព៌ា និងអាហ្វ្រិកខាងជើង រួចទៅហើយនៅឆ្នាំ២០១៥-២០១៨។
ចំណែកវិបត្តិអាកាសធាតុវិញ វិបត្តិនេះមួយតែឯង អាចនឹងរុញច្រានមនុស្សដល់ទៅ១៣២លាននាក់ឱ្យធ្លាក់ក្នុងភាពក្រីក្រ ពីពេលនេះ ដល់ឆ្នាំ២០៣០។ តំបន់ពីរងាយរងហានិភ័យជាងគេ អាហ្វ្រិកកណ្តាលនិងអាស៊ីខាងត្បូង។ អ្នកដែលទើបងើបចេញពីភាពក្រីក្រ នឹងគ្មានកំណើនប្រាក់ចំណូល។ ឱ្យតែមានហេតុការណ៍អ្វីកើតឡើងភ្លាម ពួកគេនឹងធ្លាក់ខ្លួនក្រីក្រភ្លាម។
ជាសរុប កម្មវត្ថុលុបបំបាត់ភាពក្រីក្រឱ្យនៅក្រោម៣% នៅឆ្នាំ២០៣០បានទេ។ ធនាគារពិភពលោកបានអំពាវនាវឱ្យគ្រប់ប្រទេសត្រូវចាត់វិធានការជាក់ស្តែងឱ្យបានលឿន ដើម្បីទប់ស្កាត់ភាពក្រីក្រកុំឱ្យផុងជ្រៅពេក ព្រោះតាំងពីមុនកូវីដ១៩ អង្គការOXFAM បានសម្គាល់ឃើញរួចហើយថាគ្មានប្រទេសណាមួយបញ្ចេញសកម្មភាពកាត់បន្ថយភាពក្រីក្របានគ្រប់គ្រាន់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ