ថ្នាំពុលជាអាវុធនយោបាយរបស់ភ្នាក់ងារចារកិច្ចរុស្ស៊ី ?
ចុះផ្សាយនៅថ្ងៃ៖
ស្តាប់ - ០៦:៣១
ស្ថានភាពសុខភាពរបស់លោក អាឡិចសី ណាវ៉ាល់នី Alexeï Navalny នៅធ្ងន់ធ្ងរខ្លាំង ទើបក្រុមគ្រូពេទ្យរុស្ស៊ី សម្រេចបដិសេធមិនឱ្យជម្លៀសជនរងគ្រោះទៅព្យាបាលនៅបរទេស តាមសំណើររបស់បារាំងឬអាល្លឺម៉ង់។ ជាសេចក្តីបដិសេធដោយឈរលើស្ថានភាពវេជ្ជសាស្ត្រសុទ្ធសាធ។ នេះបើតាមអ្នកនាំពាក្យវិមានក្រេមឡាំង។ ប៉ុន្តែសម្រាប់ក្រុមគ្រួសារនិងជំនិត លោក ណាវ៉ាល់នី ពេទ្យរុស្ស៊ី រារាំងមិនឱ្យលោក ណាវ៉ាល់នី ទៅព្យាបាលនៅបរទេស ដោយហេតុផលនយោបាយ។
ចង់ដឹងអំពីស្ថានភាពសុខភាពរបស់លោក ណាវ៉ាល់នី មិនមែនជាងាយស្រួលទេ។ មន្ទីរពេទ្យក្រុង អុំ តំបន់ស៊ីបេរី ស្ថិតក្រោមការយាម និងត្រួតពិនិត្យ យ៉ាងតឹងតែង។ សូម្បីតែភរិយារបស់លោក ណាវ៉ាល់នីផ្ទាល់ ក៏ទើបនឹងត្រូវបានអនុញ្ញាតឱ្យមកមើលថែស្វាមី នៅពេលល្ងាចថ្ងៃព្រហស្បតិ៍ តែប៉ុណ្ណោះ។
គេអាចដឹងអំពីស្ថានភាពសុខភាពរបស់លោក ណាវ៉ាល់នី តាមរយៈសេចក្តីថ្លែងការណ៍ និងការជូនដំណឹងរបស់មន្ទីរពេទ្យ ដែលនៅព្រឹកថ្ងៃសុក្រនេះបានប្រកាសថា ពុំមានរកឃើញមានជាតិពុលនៅក្នុងខ្លួន (ក្នុងទឹកនោម ឬឈាម) មេបក្សប្រឆាំងរុស្ស៊ីទេ។ លោក អាណាតូទី កាលីនីឆិនកូ ប្រធានមន្ទីរពេទ្យ Omsk ដ៏ធំជាងគេនៅស៊ីបេរី ដែលទទួលព្យាបាលលោកណាវ៉ាល់នី មិនជឿថាលោក ណាវ៉ាល់នី ត្រូវថ្នាំពុលទេ។ បើតាមលោកប្រធានមន្ទីរពេទ្យដដែល ស្ថានភាពសុខភាពលោក ណាវ៉ាល់នី បានប្រសើរជាងម្សិលមិញបន្តិច តែនៅឡើងចុះខ្លាំងមិនទាន់នឹងទេ។ សន្លប់បាត់ស្មារតីតាំងពេលបញ្ជូនចូលមន្ទីរពេទ្យកាលពីម្សិលមិញ ភ្លាម ដោយបញ្ហាមេតាបូលិក ចុះជាតិស្ករខ្លាំង លោកណាវ៉ាល់នី កំពុងទទួលការព្យាបាលសង្គ្រោះបន្ទាន់ និងមានដង្ហើម ដោយសារមានជំនួយពីម៉ាស៊ីនដកដង្ហើម។ តែលោកមិនអាចលម្អិតអាការៈរោគដោយលម្អិតបានទេ ព្រោះជាការសម្ងាត់ពេទ្យ និងត្រូវគោរពច្បាប់ ប៉ុន្តែ បានផ្តល់ដំណឹងដល់ក្រុមគ្រួសារហើយ។
មន្ទីរពេទ្យមិនព្រមបញ្ជូនលោក ណាវ៉ាល់នី ទៅព្យាបាលនៅបរទេស
សម្រាប់មន្ទីរពេទ្យរុស្ស៊ី ស្ថានភាពសុខភាពលោក ណាវ៉ាល់នី នៅពេលនេះ មិនអនុញ្ញាតឱ្យធ្វើបំលាស់ទី ផ្ទេរបញ្ជូនទៅទីណាបានឡើយ។ វាជាការឆាប់ជ្រុល។ ការផ្ទេរអាចនឹងបង្កឱ្យមានគ្រោះថ្នាក់ជីវិត បើទោះបីជាយន្តហោះបំពាក់គ្រឿងបរិក្ខាពេទ្យ យ៉ាងណាក៏ដោយ។
គ្រាន់តែបានទទួលដំណឹងថាលោកណាវ៉ាល់នី ចូលសង្គ្រោះបន្ទាន់ភ្លាម អាល្លឺម៉ង់និងបារាំង តាមរយៈប្រសាសន៍របស់លោកប្រធានាធិបតីបារាំង ម៉ាក្រុង និងលោកស្រីប្រមុខរដ្ឋាភិបាលអាល្លឺម៉ង់ មែរកិល បានប្រកាសទទួលផ្តល់ជំនួយថែទាំនិងព្យាបាលលោក ណាវ៉ាល់នីភ្លាម។ យន្តហោះពេទ្យរបស់អង្គការក្រៅរដ្ឋាភិបាល បានទៅដល់ក្រុងOmsk ដើម្បីដឹកលោក ណាវ៉ាល់នី យកមកព្យាបាលនៅអាល្លឺម៉ង់។
ក្រោយការបដិសេធរបស់មន្ទីរពេទ្យរុស្ស៊ី អាល្លឺម៉ង់បានទាក់ទងម៉ូស្គូដោយផ្ទាល់ដើម្បីផ្តល់ជំនួយមនុស្សធម៌ចាំបាច់ជួយលោកណាវ៉ាល់នី។ អាល្លឺម៉ង់និងសហភាពអឺរ៉ុបថែមបានជំរុញឱ្យរុស្ស៊ី បើកអង្កេតឯករាជ្យ និងប្រកបដោយតម្លាភាព ជុំវិញការសង្ស័យដែលថាលោក ណាវ៉ាល់នី ត្រូវគេបំពុល។
ប៉ុន្តែសម្រាប់ក្រុមគ្រួសារនិងជំនិតរបស់លោកណាវ៉ាល់នី រុស្ស៊ីមានចេតនារារាំង និងចេញសេចក្តី បដិសេធបែបនយោបាយ មិនមែនដោយឈរលើគោលការណ៍វេជ្ជសាស្ត្រទេ។ “ជីវិតអាឡិចសី កំពុងស្ថិតក្នុងគ្រោះថ្នាក់ហើយ គេបដិសេធមិនព្រមឱ្យបញ្ជូនទៅព្យាបាលនៅបរទេស ព្រោះពេទ្យរុស្ស៊ីទុកឱ្យចាំទាល់ជាតិពុលហូរអស់ វិភាគលែងឃើញ គឺគ្មានការវិនិច្ឆ័យនិងវិភាគអ្វីទេ”។ នេះជាពាក្យបរិហាររបស់លោកVolkoc ដៃស្តាំរបស់លោកណាវ៉ាល់នី។
ហេតុអ្វីលោកណាវ៉ាល់នីអាចត្រូវបានគេបំពុល?
ថ្វីបើពេលនេះ ពុំទាន់មានការវិភាគត្រឹមត្រូវ ឯករាជ្យ និងដូចជាឆាប់ជ្រុលបន្តិចក្នុងការសន្និដ្ឋានថាមេបក្សប្រឆាំងពិតជារងការបំពុលមែនក៏ដោយ ក៏ហេតុការណ៍ដែលកើតឡើងពីមិ្សល វាចំពេលណាស់ ៖ បេឡារុសកំពុងមានវិបត្តិ បក្សប្រឆាំងកំពុងធ្វើបាតុកម្មតវ៉ាខ្លាំង ដែលមានហានិភ័យឆ្លងរាលដាលខ្ពស់។ ហើយ នៅរុស្ស៊ី ចលនាប្រឆាំងនិងបាតុកម្ម ក៏មានកាន់តែញឹកញយៗឡើងផងនាពេលនេះ ជាពិសេសនៅតំបន់បែកខាងកើត។ ហេតុដូច្នេះហើយទើបអាជ្ញាធររុស្ស៊ីចង់ប្រើវិធីបង្ក្រាប បំភិតបំភ័យ ដោយប្រយោលដើម្បីបង្អើល ក្រុមប្រឆាំងបេឡារុស។ នេះបើតាមលោក Michel Eltichaninoff អ្នកជំនាញនយោបាយរុស្ស៊ីម្នាក់ដែលជឿជាក់ថា ហេតុការណ៍កើតលើរូបលោក ណាវ៉ាល់នី មានទម្រង់ ជាការគំរាមកំហែង ក្រុមប្រឆាំង នៅរុស្ស៊ី និងបេឡារុស។
ថ្នាំពុល ជាអាវុធរបស់ភ្នាក់ងារចារកិច្ចរុស្ស៊ី
រុស្ស៊ីធ្លាប់មានប្រវត្តិប្រើថ្នាំពុល តាំងពីសតវត្សរ៍ទី២០មក។ នៅឆ្នាំ១៩២១ លោក លេនីន បានបង្កើតមន្ទីរពិសោធន៍ថ្នាំពុលមួយដែលអាចផលិតសារធាតុពុលផ្សេងៗសម្រាប់យកទៅកម្ចាត់អ្នកនយោបាយប្រឆាំង។ រុស្ស៊ីប្រើវិធីនេះពេញមួយសតវត្សរ៍ទី២០។ ក្នុងសម័យថ្មីនេះ គេក៏សង្កេតឃើញមានករណីចារកិច្ចរុស្ស៊ីប្រើថ្នាំបំពុលច្រើនដែរ។
កាលពីឆ្នាំ២០១៨ អតីតចារកិច្ចរុស្ស៊ី លោក ស៊ែកហ្គៃ ស្គ្រីប៉ាល់ ដែលងាកមកបំរើលោកខាងលិច ត្រូវបានគេបំពុលនៅអង់គ្លេស ដោយប្រើសារធាតុគីមីតាំងពីសម័យសូវៀត។ នៅឆ្នាំ២០០៨ លោក អាឡិចសង់ លីតវីនេនកូ Alexandre Litvinenko អតីតភ្នាក់ងារចារកិច្ចរុស្ស៊ីម្នាក់ទៀត ក៏ត្រូវបានគេបំពុលឱ្យស្លាប់ ដោយប្រើសារធាតុលោហៈវិទ្យុសកម្ម។ កាលពីឆ្នាំ២០០៦ អ្នកកាសែតរុស្ស៊ី Anna Politkoskaïa ត្រូវគេបំពុល ក្នុងទឹកតែ ពេលជិះយន្តហោះពីក្រុងមួយទៅក្រុងមួយផ្ទៃប្រទេសរុស្ស៊ី ដូចករណីលោក ណាវ៉ាល់នី។ ពេលកំពុងជាប់ឃុំឃាំង កាលពីខែកក្កដា ២០១៩ លោកណាវ៉ាល់នី ក៏ធ្លាប់ពុល រហូតដឹកទៅសង្គ្រោះបន្ទាន់ម្តងហើយដែរ។ កាលណោះគេក៏សង្ស័យថាជាការប៉ុនប៉ងដាក់បំពុលដែរ។
បេក្ខជនប្រធានាធិបតីអ៊ុយក្រែន Viktor Iouchtchenko ដែលជាមនុស្សដ៏សង្ហា តែត្រូវខូចមុខខូចមាត់ ក្រោយរងការបំពុល។ ដូច្នេះសរុបទៅថ្នាំបំពុលជាអាវុធដែលភ្នាក់ងារចារកិច្ចរុស្ស៊ី ប្រើជារឿយៗ ជួនដើម្បីសម្លាប់ ជួនគ្រាន់តែជាការបំភិតបំភ័យ។ នេះ បើតាមការយល់ឃើញរបស់អ្នកជំនាញរុស្ស៊ីលោក Michel Eltichaninoff ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ