បារាំង៖ វិធានការពាក់ម៉ាស់ជាចាំបាច់ តាមទីសាធារណៈ ចូលជាធរមាន
ចុះផ្សាយនៅថ្ងៃ៖
ស្តាប់ - ០៧:១៥
នៅក្នុងប្រទេសបារាំង ដើម្បីប្រយុទ្ធប្រឆាំងនឹងជំងឺកូវីដ១៩ ចាប់ពីថ្ងៃចន្ទ ទី២០ កក្កដា២០២០ទៅ ការពាក់ម៉ាស់នៅតាមទីសាធារណៈបិទជិតជារឿងចាំបាច់។ ពលរដ្ឋអាចជ្រើសរើសការពាក់ម៉ាស់ពេទ្យក៏បាន ម៉ាស់ក្រណាត់ផលិតដោយខ្លួនឯងក៏បាន។ ការបំពានលើវិធានការមួយនេះនឹងត្រូវផាកពិន័យជាប្រាក់ចំនួន ១៣៥អឺរ៉ូ។ ហេតុអ្វីបានជារដ្ឋាភិបាលបង្ខំឲ្យពាក់ម៉ាស់ នៅពេលនេះ ? តើមានទីកន្លែងសាធារណៈបិទជិតណាខ្លះដែលត្រូវអនុវត្តវិធានការនេះ ? ហេតុអ្វីបានជាចាំបាច់ត្រូវពាក់ម៉ាសនៅទីកន្លែងបិទជិត?
បើតាមសេចក្តីប្រកាសរបស់លោកប្រធានាធិបតីបារាំង ក្នុងថ្ងៃបុណ្យជាតិ ថាការពាក់ម៉ាស់ជាដាច់ខាតនៅតាមទីសាធារណៈបិទជិត នឹងចាប់អនុវត្តនៅថ្ងៃទី ១ សីហាទេ ប៉ុន្តែនៅទីបំផុតវិធានការនេះបានចូលជាធរមាន ចាប់ពីថ្ងៃនេះតែម្តង។
បើតាមអាជ្ញាធរសុខាភិបាល គ្រប់ទីកន្លែងបិទជិត ដែលមានទទួលសាធារណជន ត្រូវគោរពវិធានការពាក់ម៉ាស់ជាចាំបាច់ ទាំងអស់។ ទីកន្លែងទាំងនោះមានជាអាទិ៍ ហាងទំនិញ មជ្ឈមណ្ឌលពាណិជ្ជកម្ម មន្ទីរស្ថាប័នរដ្ឋបាល ធនាគារ ឬ ផ្សារដែលមានដំបូល។
ពេលចូលបន្ទប់ប្រជុំ រោងភាពយន្ត ភោជនីដ្ឋាន សណ្ឋាគារ សាលល្បែង-សាលកីឡា វិហារសាសនាសារមន្ទីរ ក្នុងបរិវេណស្ថានីយ៍រថភ្លើង អាកាសយានដ្ឋាន ក្នុងមធ្យោបាយធ្វើដំណើរសាធារណៈ (រថយន្តក្រុង រថភ្លើងក្នុងក្រុង រថភ្លើងផ្លូវឆ្ងាយ តាក់ស៊ី) ពលរដ្ឋគ្រប់រូប ត្រូវបន្តគោរពវិន័យ ពាក់ម៉ាស់ដាច់ខាតទៀត បើមិនចង់រងការផាកពិន័យ១៣៥អឺរ៉ូ។
នៅក្នុងអាហារដ្ឋាន ឬហាងកាហ្វេ អ្នកបំរើការត្រូវពាក់ម៉ាស់ជាដាច់ខាត ឯភ្ញៀវវិញក៏ត្រូវតែពាក់ដែរ ទាល់តែដល់ពេលញ៉ាំទើបអាចដោះបាន។
អ្នកវិទ្យាសាស្ត្របានទាមទារឱ្យបុគ្គលិកធ្វើការនៅតាមការិយាល័យក្រុមហ៊ុនឯកជនសាធារណៈ ដែលភាគច្រើនមានទីតាំងនៅក្នុងអគារទំនើប មានកញ្ចក់បិទជិតនោះ ចាំបាច់ត្រូវតែពាក់ម៉ាស់ដែរ ប៉ុន្តែនាយករដ្ឋមន្ត្រីបារាំងបានសម្រួលវិធានការបន្តិច។ បុគ្គលិកចាំបាច់ត្រូវពាក់ម៉ាស់រហូតក្នុងពេលធ្វើការ ដរាបណាតែនៅក្នុងការិយាល័យនោះគេមិនអាចគោរពពិធីសារសុខភាព រក្សាគម្លាតសុវត្ថិភាព១ម៉ែត្រពីបុគ្គលម្នាក់ទៅបុគ្គលម្នាក់បានតែប៉ុណ្ណោះ។
ហេតុអ្វី ត្រូវពាក់ម៉ាស់នៅកន្លែងបិទជិត ?
កាលពីផ្ទុះកូវីដ១៩ភ្លាមដំបូង និងកំពុងផ្ទុះជំងឺខ្លាំង បារាំងព្រមទាំងបណ្តាលប្រទេសបស្ចិមលោកជាច្រើន មិនណែនាំឱ្យពលរដ្ឋពាក់ម៉ាស់សោះ ស្រាប់តែឥលូវប្រែក្រឡាស់សេចក្តីណែនាំទាំងស្រុង ព្រោះដោយមានហេតុផលច្រើន។
ពីដំបូងភ្លាម គេមិនទាន់ស្គាល់កូវីដ១៩ ហើយខាងបស្ចិមលោកគ្មានទម្លាប់ពាក់ម៉ាស់ ការពារខ្លួន (គេពាក់តែនៅពេលឈឺ) ដូចនៅអាស៊ីទេ។ ម្យ៉ាងវិញទៀត ក្នុងពេលផ្ទុះការរាតត្បាតខ្លាំង អឺរ៉ុប និងជាក់ស្តែងបារាំង គ្មានម៉ាស់ក្នុងស្តុកគ្រប់គ្រាន់សម្រាប់បុគ្គលិកពេទ្យដែលស្ថិតនៅជួរមុខផ្ទាល់នឹងមេរោគជារៀងរាល់ផង តើធ្វើដូចម្តេចនឹងអាចណែនាំឱ្យពលរដ្ឋជាទូទៅពាក់ម៉ាស់បាន។ វាអាចនឹងធ្វើភាពស្លន់ស្លោរញ៉េរញៃខ្លាំង។
តែពេលនេះពិភពលោកស្គាល់កូវីដ១៩ ច្រើនជាងមុន ទើបតម្រូវឱ្យពលរដ្ឋពាក់ម៉ាស់ ដើម្បីផ្តាច់ការចម្លងរាតត្បាត។ បើតាមអ្នកនាំពាក្យ រដ្ឋាភិបាលតម្រូវការពាក់ម៉ាស់ជាចាំបាច់ ដើម្បីបញ្ចៀសកុំឱ្យមានការបិទខ្ទប់ប្រទេសម្តងទៀត។ គេសង្កេតឃើញថាប្រជាពលរដ្ឋហាក់ចាប់ភ្លេចខ្លួន និងមានទំនោរលែងសូវចង់ពាក់ម៉ាស់ទេ តែវីរុសហាក់ចាប់កំរើក ចំនួនអ្នកឆ្លងថ្មីបានកើនឡើង តំបន់មានលេចករណីកូវីដ១៦ច្រើនផ្តុំគ្នាក៏មានកាន់តែច្រើន។ អត្រាចម្លងរបស់វីរុសក៏ឡើងខ្ពស់វិញបន្តិច (អ្នកជំងឺកូវីដ១៩ម្នាក់អាចចម្លង ទៅមនុស្ស ១,២នាក់ជាមធ្យម និងដល់២,៦ជាមធ្យមនៅតំបន់ភាគខាងត្បូង ដែលមានន័យស្មើនឹងការចាប់រាតត្បាតជំងឺ)។
ជាងនេះទៅទៀត សេចក្តីសម្រេចតម្រូវឱ្យពាក់ម៉ាស់នៅទីកន្លែងសាធារណៈបិទជិត ក៏ព្រោះតែអ្នកវិទ្យាសាស្ត្រ និងពិភពអ្នកវេជ្ជសាស្ត្រកាន់តែច្រើនឡើងៗបានទាញអាសន្ន និងប្រាប់អំពីគ្រោះចម្លងកូវីដ១៩ តាមខ្យល់។ អង្គការសហប្រជាជាតិក៏បានទទួលស្គាល់អំពីហានិភ័យចម្លងតាមខ្យល់ដែរ។ កូវីដ១៩អាចចម្លងដូចមេរោគផ្តាសាយ និងមិនអាចទប់ស្កាត់ការចម្លងត្រឹមការលាងដៃនិងការរក្សាគម្លាត១ម៉ែត្រពីគ្នាទេ។ ដូច្នេះទើបត្រូវតែពាក់ម៉ាស់ ដើម្បី ការពារខ្លួនឯងផង និងការពារអ្នកនៅជុំវិញខ្លួនផង។
ម៉ាសអាចទប់ ទឹកមាត់និងចំហាយទឹកមាត់មិនឱ្យខ្ទាតសាយក្នុងខ្យល់ បានមួយភាគធំ និងរារាំងមិនឱ្យវីរុសបាក់តេរីនៅក្នុងខ្យល់ជ្រៀតចូលតាមផ្លូវដង្ហើមបានដោយត្រង់ពេក។ អាជ្ញាធរបារាំងដែលធ្លាប់រងការរិះគន់យ៉ាងខ្លាំង កាលពីផ្ទុះកូវីដ១៩ភ្លាមនោះ ក៏មានកម្មវត្ថុនិងសមត្ថភាពផលិតម៉ាស់បានហើយ អាចបានដល់ទៅ៦០លានពេលនេះដល់ចុងខែកញ្ញាទល់នឹង៣លានកន្លះកាលពីដំបូង។
ក្នុងពេលរង់ចាំរកឃើញថ្នាំព្យាបាលនិងថ្នាំបង្ការ ពិភពលោកគ្មានមធ្យោបាយអ្វីក្រៅអំពីធ្វើតេស្តនិងពាក់ម៉ាស់ជាទូទៅទេ។ មានប្រទេសកាន់តែច្រើនឡើងៗ មិនមែនតែបារាំងទេ ដែលជ្រើសរើសចាត់វិធានការតម្រូវឱ្យពលរដ្ឋពាក់ម៉ាស់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ