ដើម្បីទប់ស្កាត់កូវីដ១៩ បារាំងត្រូវរង់ចាំយូរទៀត ទើបអាចមានជីវិតធម្មតាឡើងវិញ
ចុះផ្សាយនៅថ្ងៃ៖
ស្តាប់ - ០៦:១២
រដ្ឋាភិបាលបារាំង នឹងលម្អិតអំពីដំណើរការដកប្រទេសចេញពីការបិទខ្ទប់ នៅចុងមេសាទេ។ ប៉ុន្តែនៅល្ងាចថ្ងៃអាទិត្យទី ១៩ មេសា ម្សិលមិញ ក្នុងសន្និសីទកាសែតរួមជាមួយរដ្ឋមន្ត្រីក្រសួងសុខាភិបាល នាយករដ្ឋមន្ត្រីបារាំងបានបង្ហាញគម្រោងគោលនៃការចាប់បើកប្រទេសឡើងវិញ នៅក្រោយថ្ងៃ១១ឧសភា។ តើរដ្ឋាភិបាលបារាំងមានយុទ្ធសាស្ត្រគោលយ៉ាងណាខ្លះ ?
ពលរដ្ឋបារាំងមិនទាន់អាច ត្រលប់មកមានជីវិតធម្មតាដូចពីមុនបានវិញភ្លាម ក្រោយថ្ងៃទី ១១ឧសភាទេ។ ពលរដ្ឋបារាំងត្រូវរង់ចាំយូរថ្ងៃទៀតណាស់ ព្រោះពេលនេះពិភពលោកពុំទាន់រកឃើញថ្នាំព្យាបាល និងថ្នាំបង្ការនៅឡើយទេ។ នេះជាប្រសាសន៍របស់លោកនាយករដ្ឋមន្ត្រី អេដ័រ ហ្វីលីព ដោយបានពញ្ជាក់អារម្មណ៍ពលរដ្ឋជាថ្មីទៀត ឱ្យគិតលើកពេលចំពោះការធ្វើដំណើរផ្លូវឆ្ងាយ តាមយន្តហោះ នៅខែក្តៅ (កក្កដាសីហា)ខាងមុខ ព្រោះការហោះហើរនឹងពុំអាចដំណើរការពេញលេញបានឡើយ។ ការចូល និងត្រលប់ចូលទឹកដីបារាំងបន្ទាប់ពីស្នាក់នៅបរទេស នឹងត្រូវតឹងតែងខ្លាំង។
ថ្ងៃទី ១១ឧសភា ដែលប្រធានាធិបតីប្រកាសកំណត់ជាកាលបរិច្ឆេទបើកប្រទេសវិញ ក្នុងសុន្ទរកថាជាតិកាលពីថ្ងៃទី ១៣មេសា ជាពេលវេលាគោលនៃការដកប្រទេសចេញពីការបិទខ្ទប់ និងជាថ្ងៃចាប់ផ្តើមជីវិតថ្មី « ក្រោយកូវីដ”។ នេះបើតាមអះអាងរបស់លោកហ្វីលីព។
បើតាមលោកប្រមុខរដ្ឋាភិបាល ថ្វីបើពេលនេះស្ថានភាពចម្លងរាតត្បាត ចាប់បន្ថយល្បឿន ចំនួនអ្នកស្លាប់ ចំនួនអ្នកឆ្លងថ្មីនិងចូលមន្ទីរពេទ្យ ក៏ចាប់ថយចុះជាលំដាប់និងជារៀងរាល់ថ្ងៃមែន តែមិនមែនបានន័យថាលែងមានការរាតត្បាតទេ។ ដូច្នេះ គម្រោងបើកប្រទេសវិញ ត្រូវធ្វើឡើងដោយសន្សឹមៗ ខ្លាំងជាទីបំផុត និងដោយរំពឹងលើគោលការណ៍ ធ្វើតេស្តវិភាគរកអ្នកមានផ្ទុកមេរោគ រួចដាក់ពួកគេឱ្យនៅដាច់ដោយឡែក ដើម្បីទប់ស្កាត់ការចម្លង។
ធ្វើតេស្តទ្រង់ទ្រាយធំ
ក្រោយថ្ងៃទី ១១ឧសភា បារាំងមានកម្មវត្ថុ ធ្វើតេស្តទ្រង់ទ្រាយធំ និងទូលំទូលាយជាងមុន ឱ្យបានដល់ កន្លះលាននាក់ក្នុងមួយសប្តាហ៍ លើគ្រប់បុគ្គលណាដែលមានរោគសញ្ញាសង្ស័យកូវីដ១៩ និងបុគ្គលណាដែលបានជួបទាក់ទងនឹងអ្នកជំងឺកូវីដ១៩ ទោះបីជាគ្មានរោគសញ្ញាក៏ដោយ។ បើតាមរដ្ឋមន្ត្រីក្រសួងសុខាភិបាល រហូតមកទល់នឹងពេលនេះ ការធ្វើតេស្តកូវីដ១៩នៅបារាំង មានត្រឹមប្រមាណ ២៥០០០នាក់ក្នុងមួយថ្ងៃ ប៉ុណ្ណោះ។
នៅក្នុងសុន្ទរកថាទៅកាន់ប្រជាជាតិកាលពីថ្ងៃចន្ទទី ១៣មេសា ប្រធានាធិបតីម៉ាក្រុង បានលើឡើងអំពីគម្រោងធ្វើតេស្តនេះ តែចំពោះបុគ្កលណាដែលមានរោគសញ្ញាតែប៉ុណ្ណោះ ចំណែកជនបានជួបអ្នកជំងឺតែគ្មានរោគសញ្ញាមិនបាច់ធ្វើទេ។ ប៉ុន្តែតាមរយៈយោបល់របស់ប្រធានក្រុមប្រឹក្សាវិទ្យាសាស្ត្រ និងដោយចាត់ទុកការធ្វើតេស្តជាគោលការណ៍យុទ្ធសាស្ត្រដ៏ចំបងមួយនៃនយោបាយបើកប្រទេសឡើងវិញ រដ្ឋាភិបាលបារាំងសម្រេចបើកផ្លូវឱ្យជនដែលគ្មានរោគសញ្ញាក៏អាចធ្វើតេស្តដែរ។
រក្សាគម្លាតសុវត្ថិភាព និងគោរពក្បួនអនាម័យប្រឆាំងវីរុស
ក្នុងក្របខ័ណ្ឌនៃការដកការបិទខ្ទប់ដោយសន្សឹមៗ ប្រមុខរដ្ឋាភិបាលបារាំង មានគម្រោងចង់ឱ្យបុគ្គលិកបន្តធ្វើការពីផ្ទះ (អនឡាញ) ទៀតសិន បើអាច នៅក្រោយថ្ងៃទី១១ឧសភា។ បើសកម្មភាពការងារណាដែលមិនធ្វើចម្ងាយ ឬពីផ្ទះនិងតាមអនឡាញបាន គ្រប់គ្នាត្រូវមានកាតព្វកិច្ចគោរពគម្លាតសុវត្ថិភាព និងប្រកាន់យកកាយវិការការពារមេរោគ ឱ្យបានខ្ជាប់ខ្ជួនបំផុត។ បានន័យថា ហាងទំនិញណាដែលពុំអាចចាត់វិធានការសុវត្ថិភាពទាំងពីរខាងលើទេ មិនអាចបើកទ្វារបានទេថ្ងៃទី ១១ឧសភាខាងមុខ។ មិនថាហាងទំនិញអ្វីឡើយ ត្រូវរក្សាគម្លាតពីមនុស្សម្នាក់ទៅមនុស្សម្នាក់ឱ្យបានយ៉ាងតិចមួយម៉ែត្រពីគ្នា។ ហាងកាហ្វេ អាហារដ្ឋាន ភោជនីដ្ឋាន មិនអាចបើកឱ្យដំណើរការបានវិញទេ នៅថ្ងៃទី ១១ឧសភានោះ។
ចំណែកការបើកសាលារៀន លោកនាយករដ្ឋមន្ត្រីបានអះអាងកំពុងសិក្សារកដំណោះស្រាយលម្អិតជាមួយសហជីពគ្រូបង្រៀន និងជាមួយចៅហ្វាយក្រុងចៅសង្កាត់ និងមិនពុំទាន់សេចក្តីសម្រេចអ្វី ច្បាស់លាស់ទេក្នុងដំណាក់កាលនេះ។ តែរដ្ឋាភិបាលកំពុងផ្ចង់លើផែនការគោលមួយ គឺការបើកសាលារៀនជាបឋមនៅតំបន់ណាដែលពុំសូវមានការរាតត្បាតចម្លងខ្លាំង ឬ បើកសាលារៀន ដោយចែកថ្នាក់ជាពីរក្រុម។
១៧លានម៉ាស់ ក្នុងមួយសប្តាហ៍
នៅក្នុងសន្និសីទកាសែត លោកនាយករដ្ឋមន្ត្រី បានព្រលយឱ្យដឹងថា ចាប់ពីថ្ងៃទី ១១ឧសភាទៅ ពលរដ្ឋប្រហែលជាចាំបាច់ត្រូវតែពាក់ម៉ាស់ នៅពេលធ្វើដំណើរតាមមធ្យោបាយដឹកជញ្ជូនសាធារណៈ (ឡានក្រុង រថភ្លើងក្រោមដី …) ឬនៅតាមទីសាធារណៈដែលមិនអាចរក្សាគម្លាតសុវត្ថិភាពបាន។
ម៉ាស់ សម្រាប់បម្រើបម្រាស់ទូទៅរបស់ប្រជាពលរដ្ឋ មិនមែនជាម៉ាស់ ការពារមីក្រុបមេរោគ ដែលពេទ្យពាក់ទេប្រភេទ FFP2ទេ។ រដ្ឋមន្ត្រីក្រសួងសុខាភិបាលបារាំងបានទទួលស្គាល់ ម៉ាស់សម្រាប់ប្រជាជន មានប្រសិទ្ធភាពទប់ស្កាត់វីរុសមិនដូចម៉ាស់ពេទ្យមែន តែយ៉ាងហោចណាស់ ក៏ម៉ាស់នេះអាចជួយចម្រោះមេរោគកុំឱ្យខ្ទាតតាមទឹកមាត់មកក្រៅច្រើនពេក។ រដ្ឋាភិបាលគ្រោងនឹងផលិតម៉ាស់ ១៧លានក្នុងមួយសប្តាហ៍ តាមរយៈបណ្តាញក្រុមហ៊ុនវាយនភ័ណ្ឌក្នុងស្រុក។ រដ្ឋាភិបាលគ្រោងនឹងសហការជាមួយក្រុងនិងក្រុមហ៊ុនចែកចាយទំនិញធំៗ ដើម្បីធ្វើយ៉ាងណាផ្តល់ម៉ាស់ដល់ប្រជាពលរដ្ឋឱ្យបានគ្រប់គ្រាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ