លោកម៉ាក្រុងប្រកាសបើកប្រតិបត្តិការយោធាដើម្បីប្រយុទ្ធប្រឆាំងនឹងកូវីដ ១៩
ចុះផ្សាយនៅថ្ងៃ៖
ស្តាប់ - ០៧:០៤
នៅប្រទេសបារាំង លោកប្រធានាធិបតី អេម៉ានុយអែល ម៉ាក្រុងកាលពីថ្ងៃពុធទី ២៥មីនា បានប្រកាសបើកប្រតិបត្តិការយោធា ដើម្បីប្រយុទ្ធប្រឆាំងនឹងជំងឺកូវីដ ១៩ ដែលបានសម្លាប់មនុស្ស ជាង១៣០០នាក់ និងឆ្លងទៅមនុស្សជាង២ម៉ឺន ៥ពាន់នាក់ នៅទឹកដីបារាំង។
នៅប្រទេសបារាំង កងទ័ពបានអន្តរាគមក្នុងវិបត្តិកូវីដ ១៩ តាំងពីជាង ១សប្តាហ៍មកហើយ ដូចជាចេញដឹកផ្ទេរអ្នកជំងឺចេញពីមន្ទីរពេទ្យ នៅតំបន់ភាគខាងកើតប្រទេស ដែលកំពុងជួបបញ្ហា សំបូរអ្នកជំងឺ ដើម្បីយកទៅដាក់នៅមន្ទីរពេទ្យនៅភាគខាងលិច ឬខាងត្បូងប្រទេស ដែលគ្មានជួបបញ្ហាខ្វះគ្រែ ព្យាបាលអ្នកជំងឺ កូវីដ១៩។ នៅសប្តាហ៍នេះ កងទ័ពបារាំង បានបោះតង់ ជាមន្ទីរពេទ្យ ដែលអាចដាក់អ្នកជំងឺ ៣០នាក់ នៅទីក្រុង Mulhouse ក្បែរព្រំដែនអាល្លឺម៉ង់។ ចំណែកកងទ័ពជើងទឹកបារាំងបានចេញទៅដឹកអ្នកជំងឺពីមន្ទីរពេទ្យនៅកោះ Corse ក្បែរអ៊ីតាលី មកដាក់នៅមន្ទីរពេទ្យ នៅទីក្រុងម៉ាសីយ៍ជាដើម។
កងទ័ពបារាំង បានចេញធ្វើការងាររបស់ខ្លួនរួចហើយ គឺនៅមុនការប្រកាសបើកប្រតិបត្តិការយោធា របស់លោកប្រធានាធិបតីបារាំង កាលពីយប់ថ្ងៃពុធម្សិលមិញ ទៅទៀត។
លោកប្រធានាធិបតី បារាំង បានឆ្លៀត ប្រកាស បើកជាផ្លូវការ ប្រតិបត្តិការយោធា ដែលមានឈ្មោះថា ប្រតិបត្តិការRésilience នៅពេលលោកចុះទៅពិនិត្យ មើលមន្ទីរពេទ្យ យោធា ដែលបានសង់ឡើង ជាបន្ទាន់ សម្រាប់ អ្នកជំងឺកូវីដ ១៩។ តាមលោកប្រធានាធិបតី បារាំង ប្រតិបត្តិការ យោធាលើកនេះ មានគោលដៅ ជួយ និងការពារជីវិតប្រជាជនបារាំង ទាំងក្នុងប្រទេស និងនៅឯទឹកដីបារាំង ឯនាយសមុទ្រ ដែលកំពុងប្រឈមនឹងការឆ្លងរាតត្បាតខ្លាំងនៃជំងឺកូវីដ ១៩។
ជាក់ស្តែងទៅ កងទ័ពបារាំងនឹងបន្តបេសកកម្មរបស់ខ្លួន ក្នុងការចេញទៅជួយដឹកជញ្ជូន អ្នកជំងឺ ដើម្បីសម្រាលបន្ទុករបស់មន្ទីរពេទ្យ ដែលខ្វះសម្ភារៈ គ្រែសម្រាប់ដាក់អ្នកជំងឺធ្ងន់ធ្ងរ។ បន្ថែមពីប្រតិបត្តិការយោធាបច្ចុប្បន្ន កងទ័ពបារាំងនឹងបញ្ជូនផងដែរ កប៉ាល់ដឹកឧទ្ធម្ភាគចក្រ ពីរគ្រឿង ទៅកាន់ទឹកដីបារាំង នៅឯនាយសមុទ្រ ដូចជា កោះReunions នៅ មហាសមុទ្រឥណ្ឌា ឬទឹកដីGuyane Antilles ជាដើម។
តាមក្រសួងការពារជាតិបារាំង នាវាដឹកឧទ្ធម្ភាគចក្រ២គ្រឿងនឹងត្រូវប្រែក្លាយជាមន្ទីរពេទ្យ សម្រាប់ទទួលព្យាបាលអ្នកជំងឺ ដើម្បី សម្រាលបន្ទុករបស់មន្ទីរពេទ្យ លើដីគោក ដែលគេទុកសម្រាប់តែអ្នកជំងឺកូវីដ ១៩។
ក្រសួងការពារជាតិ បារាំង កាលពីថ្ងៃពុធ ទី ២៥មីនា បានបញ្ជាក់សាជាថ្មីម្តងទៀត បេសកកម្មរបស់កងទ័ព គឺដើម្បីជួយទ្រទ្រង់ការងារមន្ទីរពេទ្យ ប៉ុន្តែ នឹងគ្មានគោលដៅ ទៅជួយពង្រឹងការងាររបស់ប៉ូលិស ដែលរឹតបន្តឹងការអនុវត្ត វិធានការស្ថិតនៅក្នុងផ្ទះ ដូចដែលទាហានអ៊ីតាលីកំពុងតែធ្វើនោះទេ។
កងទ័ពបារាំងខ្វះមធ្យោបាយ ដោយសាររដ្ឋាភិបាលវិធានការរឹតបន្តឹងថវិកា
សព្វថ្ងៃនេះ កងទ័ពបារាំង មានមនុស្សជាង ១ម៉ឺន ៤ពាន់នាក់ ដែលធ្វើការក្នុងផ្នែកសុខាភិបាល ដែលនៅក្នុងនោះ មាន២៤០០នាក់ ជាគ្រូពេទ្យ។ អាចថា កងទ័ពមានធនធានមនុស្ស ច្រើន ប៉ុន្តែ មិនសូវមានមធ្យោបាយនោះទេ។ ដោយសារវិធានការកាត់បន្ថយថវិកាយោធា ផ្នែកជាច្រើននៅក្នុងវិស័យកងទ័ព បានជួបបញ្ហាខ្វះខាត។ មន្ទីរពេទ្យ យោធា ដ៏ល្បីឈ្មោះ នៅទីក្រុងប៉ារីស Val de Grâce បានបិទទ្វារ កាលពីឆ្នាំ ២០១៧ បន្ទាប់ពី រដ្ឋាភិបាលវាយតម្លៃថា ការជួសជុល ដែលមានតម្លៃ ២៥០ លានអឺរ៉ូ គឺជាការចាយលុយខ្ជះខ្ជាយ គ្មានប្រយោជន៍។
លោកប្រធានាធិបតី អេម៉ានុយអែល ម៉ាក្រុង បានប្រកាសបើកប្រតិបត្តិការយោធា ប្រាប់ឲ្យកងទ័ពជួយជីវិតប្រជាជន នៅក្នុងស្ថានភាពដែលប្រទេសកំពុងវិបត្តិកូវីដ ១៩។ ប៉ុន្តែ លោកមិនបានផ្តល់មធ្យោបាយឲ្យកងទ័ពនោះទេ។ នៅប៉ុន្មានឆ្នាំចុងក្រោយនេះ បារាំងផ្តោតតែទៅលើប្រតិបត្តិការយោធា នៅបរទេស។ ការងារចំបងរបស់កងទ័ពបារាំង គឺ ចូលរួមប្រយុទ្ធនៅស៊ីរី អ៊ីរ៉ាក់ នៅតំបន់អាហ្វ្រិក ចំណែករឿងចូលរួម ក្នុងអន្តរាគមន៍ជួយអ្នករងគ្រោះ ដោយសារគ្រោះមហន្តរាយ ធម្មជាតិ គឺមានតិចតួចណាស់។
ជាក់ស្តែង នៅមុនរដ្ឋាភិបាលប្រកាសបើកប្រតិបត្តិការResilience នេះទៅទៀត មន្រ្តីយោធាជាច្រើនបានលើកឡើងរួចហើយ ពីការខ្វះខាត សម្ភារៈ ដូចជា បំពង់អុកស៊ីហ្សែន និងគ្រែពិសេសសម្រាប់អ្នកជំងឺដែលមានបញ្ហាផ្លូវដង្ហើម ដូចក្នុងករណី កូវីដ ១៩។ គ្រូពេទ្យទាហាន មានឧបករណ៍ សម្រាប់ព្យាបាលអ្នកដែលរងរបួស នៅក្នុងសង្រ្គាម ប៉ុន្តែ នៅពេលនេះ ត្រូវមកប្រឈមនឹងការព្យាបាល អ្នកជំងឺផ្លូវដង្ហើមកូវីដ ១៩។ ស្ថិតក្នុងស្ថានភាពដែលជំងឺ កូវីដ ១៩កំពុងរាតរាលដាលខ្លាំង យ៉ាងដូច្នេះ កង្វះសំភារៈ មធ្យោបាយ គឺជារឿងដ៏ឈឺក្បាលសម្រាប់ពេទ្យទាហាន។
ដោយសារតែកូវីដ១៩ រដ្ឋាភិបាលបារាំងនឹងដកកងទ័ពចេញពីប្រទេសអ៊ីរ៉ាក់
បន្ទាប់ពីអាមេរិក និងអង់គ្លេសដែលប្រកាសកាត់បន្ថយវត្តមានទ័ពរបស់ខ្លួន ក្នុងប្រទេសអ៊ីរ៉ាក់ ក្រសួងការពារជាតិបារាំង កាលពីថ្ងៃពុធម្សិលមិញ បានប្រកាសថា បារាំង នឹងកងទ័ពរបស់ខ្លួន ចេញពីទឹកដីអ៊ីរ៉ាក់ ដោយសារតែវិបត្តិកូរ៉ូណាវីរុសលើកនេះ។ តាមទីបញ្ជាការកងទ័ពបារាំង កងទ័ពបារាំង ប្រមាណ២០០នាក់ ដែលកំពុងបណ្តុះបណ្តាលទាហានអ៊ីរ៉ាក់ និងកំពុងធ្វើការក្នុងទីបញ្ជាការកងទ័ពអ៊ីរ៉ាក់ នឹងចាកចេញពីអ៊ីរ៉ាក់ ចាប់ពីថ្ងៃព្រហស្បតិ៍នេះ។
សូមបញ្ជាក់ថា ដើម្បីទប់ស្កាត់ការរីករាលជំងឺកូវីដ ១៩ ដែលបានសម្លាប់មនុស្ស២០នាក់ និងឆ្លងទៅមនុស្ស២៣៣នាក់ នៅអ៊ីរ៉ាក់ រដ្ឋាភិបាលក្រុងបាដដាតបានផ្អាករាល់ការហ្វឹកហាត់ សម្រាប់ទាហានរបស់ខ្លួន។ សម្រាប់អ្នកនាំពាក្យរបស់ទីបញ្ជាការកងទ័ពបារាំង បារាំង ដកកងទ័ព មួយរយៈ ពីអ៊ីរ៉ាក់ ដោយសារកូវីដ ១៩។ ប៉ុន្តែ យ៉ាងណាក៏ដោយ បារាំងនៅមិនទាន់សម្រេចយ៉ាងណានៅឡើយទេ ទាក់ទងនឹងវត្តមានទ័ពបារាំង ជាង ៥ពាន់នាក់ ដែលកំពុងចូលរួមក្នុងប្រតិបត្តិការប្រយុទ្ធប្រឆាំងនឹងក្រុមភេរវនិយម នៅតំបន់សាហែល ក្នុងទឹកដីអាហ្វ្រិក។
ការសម្រេចដកកងទ័ពពីអ៊ីរ៉ាក់ លើកនេះ អាចជាការខាតបង់មួយ សំខាន់សម្រាប់បារាំង ដែលបានចូលរួមក្នុងប្រតិបត្តិការប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាមនៅទឹកដីស៊ីរី និងអ៊ីរ៉ាក់។ គេកំពុងបារម្ភថា នៅអ៊ីរ៉ាក់ ក្រុមជីហាតអង្គការរដ្ឋអ៊ីស្លាមដែលបាក់ស្បាត ទាំងស្រុងដោយសារប្រតិបត្តិការរបស់សម្ព័ន្ធអន្តរជាតិ ហាក់ចាប់កំរើកខ្លួនឡើងវិញ។ បារាំងព្រួយបារម្ភខ្លាំងពីបញ្ហានេះ ព្រោះថា ក្រុមមជីហាតអង្គការរដ្ឋអ៊ីស្លាមជាក្រុមគោលដៅ ដែលតែង គំរាមកំហែង វាយប្រហារភេរវកម្ម នៅទឹកដីបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ