មេរោគកូរ៉ូណាថ្មី៖បារាំងផ្តើមផ្អាកសកម្មភាពចាប់ពីថ្ងៃទី១៧ មីនារហូតដល់ថ្ងៃទី៣១ មីនា
ចុះផ្សាយនៅថ្ងៃ៖
ស្តាប់ - ០៦:២៤
នៅក្នុងប្រទេសបារាំង ការវិវឌ្ឍន៍នៃមេរោគកូរ៉ូណាថ្មីបានបង្ខំឲ្យរដ្ឋាភិបាលពង្រឹងវិធានការបន្ថែមដើម្បីទប់ស្កាត់ការឆ្លងរាលដាល។ វិធានការបន្ថែមនេះត្រូវបានប្រកាសដោយប្រធានាធិបតីលោកម៉ាក្រុងនៅយប់ថ្ងៃចន្ទ ទី១៦ មីនា។ នេះជាអន្តរាគមន៍លើកទី២ របស់លោកម៉ាក្រុង បន្ទាប់ពីអន្តរាគមន៍របស់លោកលើកទី១ កាលពីថ្ងៃព្រហស្បតិ៍ ១២ មីនា។ នៅក្នុងបទអន្តរាគមន៍លើកទី២ រយៈពេល ៣០នាទី លោកម៉ាក្រុងបានប្រកាសឲ្យប្រជាពលរដ្ឋទាំងអស់ស្ថិតនៅតែក្នុងផ្ទះ លើកលែងតែក្នុងករណីចាំបាច់បំផុត។ លោកម៉ាក្រុងបានចាត់ទុកយុទ្ធនាការប្រយុទ្ធប្រឆាំងនឹង Covid-១៩ ដូចជាការធ្វើសង្រ្គាម ហើយពាក្យ « សង្រ្គាម » នេះត្រូវបានលោកម៉ាក្រុងប្រើដល់ទៅ ៦ដង។ វិធានការថ្មីប្រកាសដោយលោកម៉ាក្រុងផ្តើមចូលជាធរមានចាប់ពីម៉ោង ១២ថ្ងៃត្រង់ក្នុងថ្ងៃទី១៧ មីនារហូតដល់ថ្ងៃទី៣១ មីនា។
អន្តរាគមន៍របស់ប្រធានាធិបតីលោកម៉ាក្រុងតាមកញ្ចក់ទូរទស្សន៍នៅយប់ថ្ងៃចន្ទ ទី១៦ មីនាមានការតាមដានមើល និងស្តាប់ដោយពលរដ្ឋបារាំងជាង ២៨លាននាក់។ បន្ទាប់ពីអន្តរាគមន៍របស់លោកម៉ាក្រុង លោករដ្ឋមន្រ្តីក្រសួងមហាផ្ទៃលោក Christophe Castaner បានអន្តរាគមន៍តាមកញ្ចក់ទូរទស្សន៍ដោយដើម្បីលំអិតលើចំណុចនីមួយៗនៃវិធានការថ្មី។ បន្ទាប់មកក្នុងថ្ងៃអង្គារ ទី១៧ មីនា ក្រឹត្យមួយចុះហត្ថលេខាដោយនាយករដ្ឋមន្រ្តី រដ្ឋមន្រ្តីក្រសួងសុខាភិបាល និងរដ្ឋមន្រ្តីក្រសួងមហាផ្ទៃត្រូវបានផ្សព្វផ្សាយនៅក្នុងកាសែតផ្លូវការ។ ចាប់ពីពេលនេះតទៅ និងមានរយៈពេលយ៉ាងតិច ១៥ថ្ងៃ ការចេញពីផ្ទះដែលអនុញ្ញាតរួមមាន៖
ទី១ ការចេញពីផ្ទះទៅកន្លែងធ្វើការ ប្រសិនបើការងារនោះជាការងារចាំបាច់ ហើយមិនអាចធ្វើពីផ្ទះបាន។
ទី២ ការចេញពីផ្ទះទៅទិញម្ហូបអាហារចាំបាច់នៅក្នុងហាងទំនិញដែលអនុញ្ញាតឲ្យបើកទ្វារ។
ទី៣ ការចេញពីផ្ទះក្រោមហេតុផលសុខភាពដើម្បីទៅជួបពេទ្យ។
ទី៤ ការចេញពីផ្ទះក្រោមហេតុផលគ្រួសារមានបញ្ហាដែលត្រូវជួយបន្ទាន់ ពិសេសមនុស្សងាយរងគ្រោះ ឬការមើលកូនក្មេង។ ក្នុងករណីដែលប្តី ប្រពន្ធលែងលះគ្នាដែលមានកូន និងត្រូវមើលកូនម្តងម្នាក់ គេអាចចេញពីផ្ទះយកកូនទៅឲ្យគ្នាម្តងម្នាក់។
ទី៥ ការចេញពីផ្ទះដោយស្ថិតក្បែរផ្ទះ ដូចយ៉ាងដើរហាត់ប្រាណបន្តិចបន្តួច ឬមួយនាំឆ្កែ ឬឆ្មាចេញក្រៅក្នុងរយៈពេលខ្លី។ តែហាមមិនឲ្យមានការហាត់ប្រាណជាក្រុម ជួបជុំជជែកជាមួយអ្នកជិតខាង ឬមួយជាមួយមិត្តភក្តិ។
រដ្ឋាភិបាលដាក់ពង្រាយកម្លាំងប៉ូលិស និងប៉េអឹមចំនួន ១០០ ០០០នាក់
គ្រប់ការចេញពីផ្ទះទាំងអស់ទោះទៅធ្វើការ ទៅផ្សារ ទៅជួបពេទ្យ ទៅមើលក្រុមគ្រួសារឈឺស្កាត់ ឬមួយក៏នាំឆ្កែ ឬឆ្មាចេញក្រៅត្រូវតែបង្ហាញលិខិតបញ្ជាក់ចុះហត្ថលេខាដោយសាម៉ីខ្លួនដែលរដ្ឋាភិបាលបានរៀបរៀងឲ្យស្រាប់។ លិខិតបញ្ជាក់នេះអាចទាញយកបានពីគេហទំព័ររបស់រដ្ឋាភិបាល ហើយពលរដ្ឋណាគ្មានម៉ាស៊ីនកុំព្យូទ័រ ឬគ្មានម៉ាស៊ីនទាញយកអាចសរសេរដៃលើក្រដាស ស ដោយចម្លងដូចច្បាប់ដើម។ នៅក្នុងលិខិតនោះមានកន្លែងគូសពីមូលហេតុចេញពីផ្ទះ។ រដ្ឋាភិបាលគ្មានលទ្ធភាពផ្ទៀងផ្ទាត់លើចម្លើយពិតរបស់មនុស្សណាម្នាក់បានទេ មានន័យថា អ្នកណាចង់គូសមូលហេតុអ្វីក៏គូសទៅ។ តែរដ្ឋាភិបាលបានដាក់សេចក្តីទុកចិត្ត និងជឿលើភាពស្មោះត្រង់របស់មនុស្សម្នាក់ៗ។ សម្រាប់អ្នកចេញទៅធ្វើការត្រូវមានលិខិតបញ្ជាក់ពីកន្លែងធ្វើការ ហើយបើជាអ្នកកាសែតវិញ អាចមានត្រឹមកាតអ្នកកាសែត គឺគ្រប់គ្រាន់។
ដើម្បីអាចត្រួតពិនិត្យលើបម្រាមនេះបាន រដ្ឋាភិបាលបានដាក់ពង្រាយកម្លាំងប៉ូលិស និងប៉េអឹមចំនួន ១០០ ០០០នាក់នៅទូទាំងប្រទេស។ កម្លាំងប៉ូលិស និងប៉េអឹមទាំង ១០០ ០០០នាក់នេះត្រូវចែកជាកម្លាំងប្រចាំការ និងកម្លាំងចល័ត។ កម្លាំងប្រចាំការត្រូវដាក់នៅតាមច្រកផ្លូវចេញ ចូល ឬនៅតាមភ្លើងស្តុកដើម្បីកាក់ឡានឆែកឆេរ ហើយអ្នកដើរក៏នឹងត្រូវសួរនាំដែរ។ ចំពោះអ្នកដែលបានរំលោភលើបម្រាមនឹងត្រូវផាកពិន័យជាប្រាក់ចំនួន ៣៨អឺរ៉ូ ហើយទឹកប្រាក់ពិន័យនេះនឹងអាចឡើងដល់ ១៣៥អឺរ៉ូនាពេលខាងមុខ។ កម្មវត្ថុរបស់រដ្ឋាភិបាលមិនមែនដើម្បីប្រមូលលុយ ចង់ធ្វើបាប ឬដាក់គំនាបលើពលរដ្ឋខ្លួនឯងទេ តែចង់ទប់ស្កាត់ការឆ្លងរាលដាល Covid-១៩ ដើម្បីការពារសុខភាពរបស់ពលរដ្ឋគ្រប់រូបដោយគ្មានការរើសអើង។
នៅក្រោយថ្ងៃទី៣១ មីនា?
នៅក្នុងជំហានដំបូង វិធានការមួយនេះនឹងមានរយៈពេលយ៉ាងតិច ១៥ថ្ងៃ ពោលចាប់ពីម៉ោង ១២ថ្ងៃត្រង់ថ្ងៃទី១៧ មីនារហូតដល់ថ្ងៃទី៣១ មីនា។ តែលោករដ្ឋមន្រ្តីក្រសួងសុខាភិបាលលោកអូលីវីយេ វេរ៉ង់បានបញ្ជាក់នៅថ្ងៃអង្គារ ទី១៧ មីនាថានៅក្រោយថ្ងៃទី៣១ មីនា វិធានការមួយនេះអាចនឹងសម្រាលបន្តិច ឬមួយលើកចេញទាំងស្រុង គឺវាអាស្រ័យលើការវិឌ្ឍន៍របស់ Covid-១៩ នៅពេលខាងមុខ។ បើស្ថានការណ៍នៅបន្តធ្ងន់ធ្ងរ វិធានការមួយនេះអាចនឹងបន្តមាននៅក្រោយពីថ្ងៃទី៣១ មីនាដែរ។ គួររម្លឹកថាគិតត្រឹមថ្ងៃចន្ទ ទី១៦ មីនា បារាំងមានអ្នកស្លាប់ដោយ Covid-១៩ ជាង ១៤៥នាក់ និងអ្នកឈឺជាង ៦ ៥០០នាក់។
លោកវេរ៉ង់បានរម្លឹកសារដដែលដោយអំពាវនាវយ៉ាងទទូចឲ្យពលរដ្ឋបារាំងស្ថិតក្នុងផ្ទះ កាត់បន្ថយរាល់សកម្មភាពទាំងអស់ រួមទាំងកាត់បន្ថយទំនាក់ទំនងផ្ទាល់ជាមួយមនុស្សដោយប្តូរការទាក់ទងតាមមធ្យោបាយផ្សេងវិញ ដូចតាមទូរស័ព្ទ ឬបណ្តាញសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ