ទៅដល់អាស៊ីកណ្តាល ប្រមុខការទូតអាមេរិក អំពាវនាវឱ្យជួយជនជាតិភាគតិចនៅស៊ីនជាំង
ចុះផ្សាយនៅថ្ងៃ៖
ស្តាប់ - ០៦:៤០
រដ្ឋមន្ត្រីការបរទេសអាមេរិក លោក មាឃ ប៉ុមប៉េអូ (Mike Pompeo) កំពុងបំពេញទស្សនកិច្ចមួយជុំនៅតំបន់អាស៊ីកណ្តាល។ បន្ទាប់ពីអ៊ុយក្រែន និងបេឡារុស នៅថ្ងៃអាទិត្យទី ២កុម្ភៈ ២០២០ លោកប៉ុមប៉េអូ បានទៅដល់ កាហ្សាក់ស្ថាន និងអ៊ូសបេគីស្ថាន ដែលជាអតីតសហភាពសូវៀត ស្និទ្ធនឹងរុស្ស៊ី តែរំពឹងខ្លាំងលើចិនក្នុងផ្នែកសេដ្ឋកិច្ច។ គឺពីទីនោះហើយ ដែលលោកប្រមុខការទូតអាមេរិក បានអំពាវនាវហៅសហគមន៍អន្តរជាតិឱ្យប្រឹងជួយជនជាតិភាគតិចកាន់សាសនាអ៊ីស្លាម នៅតំបន់ស៊ីជាំង បន្ថែមទៀត ពីការគាបសង្កត់របស់អាជ្ញាធរចិន។
បន្ទាប់ពីបានបំពេញទស្សនកិច្ចនៅអ៊ុយក្រែន កាលពីថ្ងៃសុក្រ និងនៅបេឡារុស ក្នុងថ្ងៃសៅរ៍ នៅថ្ងៃអាទិត្យនេះ ជាលើកទីមួយ គិតចាប់តាំងពីឆ្នាំ២០១៥មក លោក ប៉ុមបេអូ បានមកដល់កាហ្សាក់ស្ថាន រួចនឹងបន្តទៅអ៊ូសបេគីស្ថានទៀតក្នុងថ្ងៃដដែល។ ក្រៅអំពីជំនួបទ្វេភាគី លោកប៉ុមប៉េអូ បានជួបពិភាក្សាជាមួយរដ្ឋមន្ត្រីក្រសួងការបទេស ទាំង៥ប្រទេស ក្នុងតំបន់អាស៊ីកណ្តាល ដែលជាអតីតសហភាពសូវៀតទាំងអស់ គឺ កាហ្សាក់ស្ថាន អ៊ូសបេគីស្ថាន តាហ្ស៊ីគីស្ថាន តួកម៉េនីស្ថាន និងកៀហ្ស៊ីស៊ីស្ថានទៀត។
ឯករាជ្យនិងអធិបតេយ្យ
កម្មវត្ថុនៃទស្សនកិច្ច គ្មានអ្វីក្រៅអំពីការចង់ពង្រឹងទំនាក់ទំនងជាមួយ ក្រុមប្រទេសដែល ស្ថិតក្រោមដែនឥទ្ធិពលរបស់រុស្ស៊ីឡើយ។ លោក ប៉ុមប៉េអូ បានប្រកាសជួយប្រទេសទាំងអស់នេះ ដែលបានទទួលឯករាជ្យ ដោយសារការដួលរលំទៅនៃរបបសហភាពសូវៀត ឱ្យមានឯករាជភាព និងអធិបតេយ្យភាព ពេញលេញ។
ប៉ុន្តែ សហរដ្ឋអាមេរិក មានឥទ្ធិពលតិចតួចណាស់នៅក្នុងតំបន់អាស៊ីកណ្តាល។ ថ្វីបើអាមេរិកធ្លាប់បានប្រើទឹកដីនេះ ក្នុងនាមអង្គការអូតង់ ជាទីតាំងរក្សាទុកនូវរាល់សម្ភារៈបរិក្ខារដ៏សន្ធឹកសន្ធាប់ក្នុងពេលមានសង្គ្រាមខ្លាំងនៅអាហ្វហ្កានីស្ថានក្តី ក៏បច្ចុប្បន្ននេះ អាមេរិកគ្មានបន្សល់ទុកអ្វីសោះក្នុងតំបន់។
ផ្ទុយទៅវិញ រុស្ស៊ីបានរក្សាទុកមូលដ្ឋានទ័ពជាច្រើនផង និងបានក្លាយជាប្រមុខដឹកនាំសម្ព័ន្ធយោធា សហភាពសេដ្ឋកិច្ចនិងពន្ធគយ ដែលមានប្រទេសជាច្រើនក្នុងតំបន់ជាសមាជិកទៀត។ ពោលគឺក្រៅអំពីចំណងទំនាក់ទំនងប្រវត្តិសាស្ត្រ និងវប្បធម៌ រុស្ស៊ីបានរក្សាឥទ្ធិពលរបស់ខ្លួនថាយ៉ាងឋិតថេរ លើតំបន់អាស៊ីកណ្តាល។
ទទួលជនជាតិភាគតិចកាន់សាសនាអ៊ីស្លាមឱ្យជ្រកកោននយោបាយ
លោក ប៉ុមប៉េអូ បានទទួលស្គាល់ថា ចិនបង្ហាញវត្តមានខ្លាំងសម្បើមណាស់នៅក្នុងតំបន់ ដែលពុំចែកជា៥ប្រទេស ក្រោមការដឹកនាំរបស់រដ្ឋាភិបាល ដែលមានទំនោរបែបផ្តាច់ការ និងមិនសូវគោរពសិទ្ធិមនុស្ស។
អ៊ូសបេគីស្ថាន ទើបដើរចេញពីភាពឯកា មានប្រមុខដឹកនាំថ្មី ធ្វើកំណែទម្រង់បើកទ្វារទទួលទេសចរ និងអ្នកវិនិយោគ។ កាហ្សាក់ស្ថាន ជាប្រទេសដែលសម្បូរទៅដោយធនធានធម្មជាតិក្រោមដី ជាប្រភពប្រេង រ៉ែអ៊ុយរ៉ានីញ៉ូម និងជាប្រទេសដែលមានសេដ្ឋកិច្ចលូតលាស់ខ្លាំងជាងគេក្នុងតំបន់ និងមានព្រំដែនជាប់ជិតនឹងចិន។ អំណោយទានផ្នែកទីតាំងភូមិសាស្ត្រនេះ បានចងភ្ជាប់សេដ្ឋកិច្ចតំបន់អាស៊ីកណ្តាលជាមួយចិន យ៉ាងតឹងម៉ឺង។ ចិនបានបញ្ចូលអាស៊ីកណ្តាល ទៅក្នុងផែនការសេដ្ឋកិច្ចដ៏មហាសាល “ផ្លូវមួយខ្សែក្រវ៉ាត់មួយ”។
កាហ្សាក់ស្ថាន មានទំនាក់ទំនងស្អិតល្មួតខ្លាំងណាស់ជាមួយចិន ប៉ុន្តែ ប្រទេសជាអតីតសហភាពសូវៀតមួយនេះ ក៏បានក្លាយជាកន្លែងប្រមូលផ្តុំរបស់អង្គការ សង្គមស៊ីវិលផ្សេង ដែលការពារជនជាតិភាគតិចកាន់សាសនាអ៊ីស្លាមដែរ។ ហេតុដូច្នេះហើយបានជាក្នុងឱកាសបំពេញទស្សនកិច្ចនៅកាហ្សាក់ស្ថាន និងជាពិសេសក្នុងពេលធ្វើសន្និសីទកាសែតរួមជាមួយសមភាគីកាហ្សាក់ស្ថាន លោក ប៉ុមប៉េអូ បានលើកអំពីបញ្ហាសិទ្ធិមនុស្សមកនិយាយ និងបានធ្វើសេចក្តីអំពាវនាវឱ្យសហគមន៍អន្តរជាតិ ប្រឹងប្រែងជួយជនជាតិភាគតិចកាន់សាសនាអ៊ីស្លាម ដែលរងទុក្ខបុកម្នេញនៅចិន។
ដើម្បីបិទបញ្ចប់សកម្មភាពគាបសង្កត់របស់អាជ្ញាធរចិនលើជនជាតិភាគតិច ការពារភាពជាមនុស្ស យើងត្រូវធ្វើអ្វីដែលត្រឹមត្រូវ ! នេះជាប្រសាសន៍របស់ លោកប៉ុមប៉េអូ ដែល បានទទូចឱ្យ គ្រប់ប្រទេសទាំងអស់ ចូលរួម ជាមួយសហរដ្ឋអាមេរិក ព្រមទទួលយកជនជាតិភាគតិចកាន់សាសនាអ៊ីស្លាម ណាដែលចង់រត់ចេញពីចិន និងស្វែងជម្រកថ្មី ឱ្យមកជ្រកកោននយោបាយ។
បើតាមអង្គការការពារសិទ្ធិមនុស្ស មានពលរដ្ឋចិនជាអ្នកកាន់សាសនាអ៊ីស្លាម (ភាគច្រើនជាជនជាតិភាគតិចអ៊ុយហ្គួរនៅស៊ីនជាំង និងខ្លះជាជនជាតិកាហ្សាក់ស្ថាន) មិនតិចជាងមួយលាននាក់ទេ ដែលត្រូវបានគេចាប់បញ្ជូនទៅកាន់ មណ្ឌលអប់រំនិងកែប្រែ របស់អាជ្ញាធរកុម្មុយនិស្តចិន។ ប៉េកាំងបានបដិសេធតួលេខខាងលើ និងនិយាយតែអំពីការបើក មជ្ឈមណ្ឌលអប់រំវិជ្ជាជីវៈ ដែលមានទិសដៅជួយប្រជាពលរដ្ឋឱ្យរកការងារធ្វើ និងជួយពលរដ្ឋកុំឱ្យធ្លាក់ក្នុងអន្លង់សាសនាជ្រុលនិយម។
ចំណែកសភាអ្នកតំណាងអាមេរិក បានចេញរបាយការណ៍ កាលពីដើមខែមករា ចោទប្រកាន់ចិន ថាបានប្រព្រឹត្តអំពើឧក្រិដ្ឋកម្មប្រឆាំងនឹងមនុស្សជាតិនៅស៊ីនជាំង ដោយប្រកាន់យកនយោបាយការពារសន្តិសុខកំរិតខ្ពស់បំផុត ដើម្បីឆ្លើយតបទៅនឹងសកម្មភាពភេរវកម្មសម្លាប់ជនស៊ីវិល ពីសំណាក់ក្រុមផ្តាច់ទឹកដីនិយមអ៊ុយហ្គួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ