Covid-19៖ ក្រៅពីបំបិទការរិះគន់ក្នុងស្រុក ចិនបណ្តេញអ្នកកាសែតបរទេស៣នាក់
ចុះផ្សាយនៅថ្ងៃ៖
ស្តាប់ - ០៧:៣៩
ក្រសួងការបរទេសចិន បានសម្រេចនៅថ្ងៃពុធ ទី១៩កុម្ភៈ ដោយបានដកអាជ្ញាបណ្ណការងារ ពីអ្នកកាសែត៣នាក់ របស់កាសែត The Wall Street Journal របស់សហរដ្ឋអាមេរិក។ ចិន បានចោទប្រកាន់ អ្នកកាសែតទាំង៣នាក់ ថាបានសរសេរបង្កាច់បង្ខូចកិត្តិយសរបស់ប្រទេសចិន ទាក់ទិននឹងវិបត្តិកូរ៉ូណាវីរុស ព្រមទាំងមិនព្រមធ្វើការសុំទោសប្រទេចចិន ជាសាធារណៈថែមទៀតផង។ យើងឃើញថា ជាមួយនឹងការផ្ទុះឡើងនូវមេរោគកូរូណាវីរុសនេះ រដ្ឋាភិបាលចិន បានរិតបន្តឹងយ៉ាងខ្លាំង ចំពោះការរិះគន់នានា មិនថានៅក្នុងស្រុក ឬមកពីក្រៅប្រទេស ទាក់ទិននឹងចំណាត់ការរបស់ខ្លួន ក្នុងការទប់ការឆ្លងរាលដាល។
“ចិន៖ មនុស្សមានជំងឺប្រចាំអាស៊ី”
មានអត្ថបទមួយចុះផ្សាយ ដោយកាសែត The Wall Street Journal នៅថ្ងៃទី៣កុម្ភៈ ដែលមានចំណងជើងថា « ចិន៖ មនុស្សមានជំងឺប្រចាំទ្វីបអាស៊ី »។ លោក Geng Shuang អ្នកនាំពាក្យក្រសួងការបរទេសចិន បានលើកឡើងថា ចំណងជើង ព្រមទាំងខ្លឹមសាររបស់អត្ថបទនេះ មានលក្ខណៈមើលងាយ និងបង្កប់ដោយការរើសអើងប្រកាន់ពូជសាសន៍មកលើប្រទេសចិន។ អ្នកនាំពាក្យរូបនេះ បន្ថែមទៀតថា ចំណងជើងអត្ថបទនេះ មានលក្ខណៈពន្យុះបង្អើល។
ក្រសួងការបរទេសចិន បានទាមទារឲ្យ ម្ចាស់អត្ថបទ ព្រមទាំងកាសែត The Wall Street Journal ធ្វើការសុំទោសចិន តែគ្មានការសុំទោស ដូច្នេះ អាជ្ញាធរចិនបានដកហូតបណ្ណអ្នកកាសែត ពីអ្នកកាសែត៣នាក់ដែលជាអ្នកសរសេរ និងបោះផ្សាយអត្ថបទនេះ។ អ្នកកាសែតទាំង៣នាក់ គឺឈ្មោះ Chao Deng និង John Chin ជនជាតិអាមេរិកដើមកំណើតចិន និងម្នាក់ទៀតឈ្មោះ Philip Wen ជនជាតិអូស្ត្រាលី។ អ្នកកាសែតទាំង៣នាក់ មានពេល៥ថ្ងៃ ដើម្បីចាកចេញឲ្យផុតពីទឹកដីចិន។
តាមពិតទៅ ពាក្យថា « ចិន៖ មនុស្សមានជម្ងឺប្រចាំទ្វីបអាស៊ី » ជាពាក្យគេធ្លាប់និយាយ និងសរសេរដោយអ្នកកាសែតប្រទេសលោកខាងលិច យូរយាមកហើយ។ ឃ្លានេះ តែងតែត្រូវបានចិនចាត់ទុកថាជាការមើលងាយ។ សម្រាប់អត្ថបទ របស់កាសែត The Wall Street Journal គឺគេបានសរសេរលើកឡើង អំពីបញ្ហាធ្ងន់ធ្ងរជាច្រើន ដែលចិនកំពុងប្រឈម ជាមួយនឹងការផ្ទុះឡើង នូវមេរោគកូរ៉ូណាប្រភេទថ្មី។
អត្ថបទ បានលើកឡើងថា អាជ្ញាធរចិន គ្មានវិធានការឆ្លើយតប ឲ្យមានប្រសិទ្ធិភាព ឬមានភាពយឺតយ៉ាវ ដោយសារតែប្រព័ន្ធសុខាភិបាលចិន នៅមានកម្រិត ហើយបូកផ្សំជាមួយនឹងប្រព័ន្ធរដ្ឋបាលប្រមូលផ្តុំ មានអំពើពុករលួយថែមទៀត។ មិនត្រឹមតែប៉ុណ្ណោះ សេដ្ឋកិច្ចចិនទាំងមូលកំពុងតែប្រឈមនឹងមាត់ជ្រោះគ្រោះថ្នាក់ ដោយសារមេរោគនេះ។ ចំណែកសេដ្ឋកិច្ចពិភពលោកទាំងមូល ក៏នឹងជួបវិបតិ្តផងដែរ ព្រោះ កម្លាំងចលករសេដ្ឋកិច្ចចិន ត្រូវឈប់គាំងមិនដំណើរការ។ ក៏ប៉ុន្តែខ្លឹមសារសរសេរទាំងអស់នេះ ត្រូវបានក្រសួងការបរទេសចិន ចាត់ទុកថាជាការមើលងាយដល់ការប្រឹងប្រែង របស់អាជ្ញាធរចិនគ្រប់ជាន់ថ្នាក់ ក្នុងការទប់ស្កាត់ការឆ្លងរាលដាលមេរោគកូរ៉ូណាប្រភេទថ្មី។
អាមេរិកចាត់ទុកបណ្តាញព័ត៌មានចិន ជាឧបករណ៍ឃោសនារបស់បក្សកុម្មុយនីស្តចិន
ដោយឡែក កាលពីថ្ងៃអង្គារទី១៨កុម្ភៈ រដ្ឋាភិបាលសហរដ្ឋអាមេរិក បានរិតបន្តឹងវិធានច្បាប់ ដោយបានដាក់កំហិតមួយចំនួន ទៅលើបណ្តាញសារព័ត៌មានចិន ប្រចាំការនៅសហរដ្ឋអាមេរិក។ ចិនបានចាត់ទុកវិធានការនេះ ថាជាការរំលោភ លើសិទ្ធិសេរីភាពសារព័ត៌មាន។
តើការដែលចិនដកបណ្ណការងារ ពីអ្នកកាសែតអាមេរិកនាពេលនេះ អាចចាត់ទុកថាជាការសងសិកដែរឬទេ? តាមពិតទៅវាជារឿងចៃដន្យច្រើនជាង។ រឿងទាំងពីរនេះ មិនទាក់ទងគ្នាទេ។ តែយើងក៏អាចនិយាយបានដែរថា ការសម្រេចរបស់រដ្ឋាភិបាលអាមេរិក កាលពីថ្ងៃអង្គារ អាចជំរុញទឹកចិត្ត ឲ្យរដ្ឋាភិបាលចិន សម្រេចនៅថ្ងៃពុធ ដកបណ្ណអ្នកកាសែតរបស់ The Wall Street Journal។
ទាក់ទិននឹងនឹងវិធានការរិតបន្តឹងថ្មីរបស់រដ្ឋាភិបាលអាមេរិក គឺគេបានដាក់កំហិត ទៅលើបណ្តាញព័ត៌មានចិនទាំង៥ ដែលធ្វើការនៅសហរដ្ឋអាមេរិក ក្នុងនោះមាន ទីភ្នាក់សារព័ត៌មានចិនXinhua ស្ថានីយទូរទស្សន៍ចិនជាភាសាអង់គ្លេស CGTN វិទ្យុចិនអន្តរជាតិ កាសែតChina Daily និងការសែតដំណឹងប្រជាជនចិន។ រដ្ឋាភិបាលអាមេរិក បានដាក់កំហិតថា បណ្តាញព័ត៌មានចិនទាំង៥នេះ ត្រូវសុំការអនុញ្ញាតពីក្រសួងការបរទេសអាមេរិក មុននឹងអាចមានសិទ្ធិ ទិញកាន់កាប់អចលនទ្រព្យណាមួយ នៅក្នុងទឹកដីអាមេរិក។
លោក Geng Shuang អ្នកនាំពាក្យក្រសួងការបរទេសចិន រិះគន់ថា ការដាក់កំហិតនេះ ជាវិធានការរារាំងដំណើរការងារ របស់បណ្តាញសារព័ត៌មានចិន។ អ្នកនាំពាក្យដដែលអះអាងទៀតថា តាំងពីដើមរៀងមកបណ្តាញសារព័ត៌មានចិន បានធ្វើការប្រកបដោយការគោរពក្របខណ្ឌវិជ្ជាជីវៈច្បាស់លាស់ មិនលំអៀងទៅភាគីណាមួយឡើយ។
ដោយឡែក មន្ត្រីម្នាក់របស់ក្រសួងការបរទេសអាមេរិក បានលើកឡើង ថាការដាក់កំហិតថ្មីទៅលើបណ្តាញសារព័ត៌មានចិន គឺមិនមានអ្វីប៉ះពាល់ដល់ការអនុវត្តការងារ ជាក់ស្តែងរបស់អ្នកកាសែតចិន ដែលធ្វើការនៅសហរដ្ឋអាមេរិកឡើយ។ ដូច្នេះការចោទថា អាមេរិកបំពានសិទ្ធិសេរីភាពសារព័ត៌មាន គឺជារឿងមិនសមហេតុផល។
មន្ត្រីអាមេរិកដដែលបន្ថែមថា ជាយូរយាមកហើយ នរណាក៏ដឹងដែរ ថាបណ្តាញព័ត៌មានចិន គឺជាឧបករណ៍ឃោសនា របស់បក្សកុម្មុយនីស្តចិន។ តួនាទីឃោសនា អួតបំប៉ោងនេះ កាន់តែរឹងមាំខ្លាំងឡើង បន្ទាប់ពីលោកស៊ី ជីនពីង បានឡើងកាន់តំណែង។ បណ្តាញព័ត៌មានចិនដែលធ្វើការនៅក្រៅស្រុក ទទួលបញ្ជាដោយផ្ទាល់ ពីបក្សកុម្មុយនីស្តចិន និងធ្វើការឃោសនាបើកចំហរ។
“ពីក្រោយមានមេរោគកូរ៉ូណា ពីមុខមានបក្សកុម្មុយនីស្តចិន”
ទាក់ទិននឹងសេរីភាពសារព័ត៌មាននេះដែរ នៅក្នុងស្រុកឯនោះវិញ គេសង្កេតឃើញថា រដ្ឋាភិបាលចិន បាន ចាត់វិធានការកាន់តែតឹងតែង ដើម្បីរិតត្បិត មិនឲ្យមានព័ត៌មានរិះគន់ណាមួយ ជុំវិញវិបត្តិមេរោគកូរ៉ូ។ មានមតិខ្លះ បានលើកថាមុខមាត់ កិត្តិយសរបស់បក្សកុម្មុយនីស្តចិនកំពុងតែប្រឡាក់ប្រឡូស ដោយការរិះគន់ ពីសំណាក់ប្រជាជនចិនខ្លួនឯង។
ជាការពិតមែន ក្រោយការផ្ទុះមេរោគកូរ៉ូណាថ្មីនេះ យើងសង្កេតឃើញ ប្រជាជនចិន ជាពិសេសអ្នកដែលរស់នៅក្រុងវូហានតែម្តង ដែលបានចេញមុខរិះគន់អាជ្ញាធរ ក៏ដូចជាបក្សកុម្មុយនីស្តិចិន។ វិធីតែមួយ ដើម្បីបញ្ចេញមតិ គឺប្រើប្រាស់បណ្តាញសង្គម។ គេសង្កេតឃើញថា ដោយខ្វះតម្លាភាព ពីសំណាក់អាជ្ញាធររដ្ឋចិន ប្រជាជនចិនខ្លះ បានប្រមូលសេចក្តីក្លាហាន ធ្វើជាអ្នកផ្សព្វផ្សាយព័ត៌មានដោយខ្លួនឯង តាមរយៈការថតរូបភាព ថតវីដេអូ ផ្សាយផ្ទាល់នៅតាមមន្ទីរពេទ្យ និងផ្សាយពីជីវិតប្រចាំថ្ងៃនៅក្រុងវូហាន។
ក្នុងចំណោមនោះ គឺមានបុរសម្នាក់ឈ្មោះ Chen Qiushi ដែលបានធ្វើវីដេអូជាច្រើន ផ្សាយតាមបណ្តាញសង្គមនៅចិន។ វីដេអូទាំងនោះ រៀបរាប់ពីការលំបាករបស់ប្រជាជន ដែលជាប់នៅវូហាន រៀបរាប់ពីភាពអសកម្ម គ្មានសមត្ថភាពរបស់អាជ្ញាធរចិន ពីការខ្វះខាតសម្ភារៈពេទ្យ និងពីភាពរញ៉ៃរញ៉ៃ គ្មានការរៀបចំត្រឹមត្រូវ នៅតាមមន្ទីរពេទ្យ ដែលពោរពេញដោយអ្នកជំងឺផ្ទុកមេរោគកូរ៉ូណា។ ក្រោយមក លោកChen Qiushi បានធ្វើវីដេអូមួយទៀត ថាលោកមានការភ័យខ្លាច ហើយបារម្ភពីសុវត្ថិភាព “ពីក្រោយមានមេរោគកូរ៉ូណា ពីមុខមានបក្សកុម្មុយនីស្តចិន”។ ទីបំផុតទៅ នៅថ្ងៃទី៦កុម្ភៈ លោកChen Qiushi បានបាត់ខ្លួន បាត់ដំណឹងឈឹងតែម្តង។ តាមការសង្ស័យគឺគាត់ច្បាស់ជាត្រូវគេចាប់ខ្លួន។
បន្ទាប់មក ក្រោយការស្លាប់របស់លោកវិជ្ជបណ្ឌិត Li Wenliang ក៏បង្កើតឲ្យមានចិត្តតវ៉ា ខឹងសម្បារនិងអាជ្ញាធរដែរ។ នៅតាមបណ្តាញសង្គមចិន ឈ្មោះលោក Li Wenliang ត្រូវបានគេផ្សព្វផ្សាយប្រៀបបាននឹងវិរៈបុរស ព្រោះគឺលោកនេះហើយ ដែលបានទាញសញ្ញាអាសន្នកាលពីចុងខែធ្នូ ប្រាប់ទៅថ្នាក់លើ ថាមានមេរោគប្រភេទថ្មី។ តែទីបំផុតអាជ្ញាធរចិន មិនត្រឹមតែមិនជឿលោកទេ ថែមទាំងបានបង្ខំលោក ឲ្យផ្តិតមេដៃសុំទោស ចំពោះការបំផុតព័ត៌មានបង្ករអស្ថិរភាពសង្គមទៀតផង។
បញ្ហាទាំងអស់នេះ វាបានធ្វើឲ្យប្រជាជនចិន លែងទុកចិត្តអាជ្ញាធររដ្ឋ។ អ្វីដែលគេសង្កេតឃើញប៉ុន្មានថ្ងៃចុងក្រោយនេះ គឺអាជ្ញាធរចិន បានចាត់វិធានការតឹងតែងណាស់ ដោយបានលុបចោល សារទាំងអស់ នៅលើបណ្តាញអ៊ីនធ័រនិត ដែលពាក់ព័ន្ធនឹងលោក Li Wenliang ក៏ដូចជាលោក Chen Qiushi។ ព័ត៌មានរិះគន់គ្រប់ទំរង់ ត្រូវបានគេលុបចោលទាំងអស់តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ