របបសឹកភូមាដាក់ច្បាប់កាតព្វកិច្ចយោធាចំពោះយុវជនចន្លោះពី ១៨ ទៅ ៣៥ ឆ្នាំ
នៅភូមា របបសឹកបានដាក់ច្បាប់កាតព្វកិច្ចយោធាចំពោះយុវជន។ ច្បាប់ថ្មីនេះ មិនប្រកាន់ភេទឡើយ និងតម្រូវឲ្យ យុវជនភូមា ទាំងប្រុសនិងទាំងស្រី វ័យពេញកម្លាំង ត្រូវបំពេញករណីយកិច្ចយោធា យ៉ាងតិចរយៈពេលចំនួន ២ ឆ្នាំ។ បើតាមប្រព័ន្ធឃោសនាផ្សព្វផ្សាយផ្លូវការរបស់របបសឹកភូមា, ច្បាប់កាតព្វកិច្ចយោធា នេះ ប្រកាសភ្លាមហើយនិងចូលជាធរមានភ្លាមតែម្តង នៅថ្ងៃទី១០ ខែកុម្ភៈ ឆ្នាំ២០២៤។
ចុះផ្សាយនៅថ្ងៃ៖
ស្តាប់ - ០៣:០១
អំណឺះតទៅ នៅភូមា ប្រុស អាយុចន្លោះពី ១៨ ទៅ ៣៥ឆ្នាំ ហើយ ស្រី វ័យចន្លោះពី ១៨ ទៅ ២៧ ឆ្នាំ ត្រូវតែបម្រើការនៅក្នុងវិស័យកងទ័ព យ៉ាងហោច ២ ឆ្នាំ។ នេះបើតាមប្រព័ន្ធឃោសនាព័ត៌មាននៃរបបសឹកភូមា ដោយបញ្ជាក់ថា ក្រសួងការពារជាតិ នឹងផ្សព្វផ្សាយលម្អិត អំពីបទដ្ឋាននានា រួមទាំង នីតិវិធីចាំបាច់ ហើយនិង បែបបទណែនាំ ជាក់លាក់ល្អិតល្អន់បន្ថែម នៅពេលខាងមុខ។ ខណៈពេលភ្លាមៗនេះ របបសឹកភូមា នៅពុំទាន់ឲ្យដឹងអំពី កាតព្វកិច្ចយោធា ថាតម្រូវឲ្យ ពួកយុវជន ទៅធ្វើអ្វីខ្លះនៅឡើយទេ។ អ្នកនាំពាក្យរបបសឹកភូមា លោក Zaw Min Tun គ្រាន់តែបានអះអាងថា «នៅក្នុងប្រព័ន្ធយោធារបស់ជាតិមួយ តម្រូវឲ្យរួមបញ្ចូលកម្លាំងពលរដ្ឋទាំងអស់គ្នា ដើម្បីទប់ទល់នឹងស្ថានការណ៍ជាក់ស្តែង ដែលប្រទេសជាតិភូមា កំពុងតែប្រឈមមុខ»។
ស្ថានការណ៍ប្រឈមជាក់ស្តែងចំពោះមុខ បើតាមអ្នកវិភាគជំនាញកិច្ចការភូមា គឺនៅម្ខាង កងយោធារបបសឹក ហាក់កំពុងតែទន់ដៃ ប្រឈមប្រយុទ្ធនឹង ចលនាតស៊ូរំដោះជាតិ ដែលជាកងកម្លាំងសម្ព័ន្ធយោធា ចំនួនបីរួមគ្នា ភាគច្រើនជាជនជាតិភាគតិចប្រដាប់អាវុធ។ សម្ព័ន្ធចលនាតស៊ូយោធានេះ បានវាយប្រហារដណ្តើមកាន់កាប់យកទីតាំងយុទ្ធសាស្ត្រចំនួន ២ ដ៏សំខាន់ របស់របបសឹក នៅប៉ែកខាងជើងប្រទេស ក្នុងរដ្ឋស្សាន។ ទីនោះជាដង្ហើមពាណិជ្ជកម្មភូមា នាំទំនិញចេញ ទៅស្រុកចិន។ ម្យ៉ាងវិញទៀត កងកម្លាំងយោធាភូមាខ្លួនឯង អ្នកមួយចំនួនបានរត់ចោលជួរ ហើយខ្លះទៀត រត់ចូលទឹកដីឥណ្ឌា និងទឹកដីចិន។ ត្រង់ចំណុចនេះ មិនធ្វើឲ្យ ចិន សប្បាយចិត្តប៉ុន្មានទេ។ នាពេលថ្មីៗកន្លងទៅនេះ មន្ត្រីជាន់ខ្ពស់រដ្ឋអំណាចចិន បានទៅដល់រដ្ឋធានីណៃពិដោ ដើម្បីប្រាប់ឲ្យថ្នាក់ដឹកនាំរបបសឹក ឲ្យដោះស្រាយរកផ្លូវសម្របសម្រួល និងធ្វើបទឈប់បាញ់ នៅប៉ែកខាងជើងប្រទេស។
ប្រភពយោធាដែលសុំលាក់ឈ្មោះ បានប្រាប់ទីភ្នាក់ងារព័ត៌មានបារាំងអាអេហ្វប៉េ ថា ស្មារតីកងទ័ពភូមា កំពុងតែមិនសូវល្អទេ រាប់តាំងពីទាហានថ្នាក់តូចតាច ដល់នាយយោធាថ្នាក់ខ្ពស់។
សូមជ្រាបថា ច្បាប់ចាស់ភូមា ចេញពីឆ្នាំ២០១០ តែមិនដែលអនុវត្តទេ គឺធ្លាប់ចែងពីកាតព្វកិច្ចយោធាភូមា កម្រិតរយៈពេលរហូតដល់ ៥ ឆ្នាំ ហើយនិងត្រូវដាក់ទោសពន្ធនាគារ ចំពោះជនណា ដែលចង់គេចវេសមិនព្រមទៅបំពេញកាតព្វកិច្ច តាមការកោះហៅ។
របបសឹកភូមា ឡើងកាន់អំណាចដោយរដ្ឋប្រហារយោធា នៅដើមខែកុម្ភៈឆ្នាំ២០២១ ដែលបានបិទបញ្ចប់សម័យកាលប្រជាធិបតេយ្យពេលដ៏ខ្លី ក្រោមការដឹកនាំរបស់ជ័យលាភីណូបែល លោកស្រី អ៊ុង សានស៊ូជី។ ប៉ុន្មានឆ្នាំចុងក្រោយនេះ រដ្ឋអំណាចភូមាបានគាបសង្កត់លើកក្រុមអ្នកប្រឆាំង បានបណ្តាលឲ្យមនុស្សយ៉ាងហោច ៤ ៥០០ នាក់ ស្លាប់បាត់បង់ជីវិត ហើយជាង ២៦ ០០០ នាក់ត្រូវចាប់ឃុំខ្លួន។ នៅចុងឆ្នាំ២០២៣ ថ្ងៃទី៣១ធ្នូ អគ្គមេបញ្ជាការយោធាភូមា ក៏បានដាក់ចេញវិធានការប្រកាសភាពអាសន្នជាតិ ចំនួន ៦ ខែបន្ថែម ហើយនិង លើកពេលបោះឆ្នោត ជាថ្មីទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ