របបសឹកភូមាប្រកាសបន្ធូរច្បាប់ចុះឈ្មោះបោះឆ្នោត តែបន្តដាក់ប្រទេសក្នុងភាពអាសន្ន
នៅថ្ងៃពុធទី ៣១មករា២០២៤នេះ របបសឹកភូមាបានប្រកាសបន្ធូរបន្ថយច្បាប់ចុះឈ្មោះគណបក្សនយោបាយក្នុងបញ្ជីបោះឆ្នោត។ ក៏ប៉ុន្តែកាលបរិច្ឆេទបោះឆ្នោតត្រូវលើកពេលជាថ្មីទៀត ព្រោះនៅតែប៉ុន្មានម៉ោងមុនផុតឱសានវាទ មេដឹកនាំយោធាភូមាបានប្រកាសបន្តដាក់ប្រទេសភាពអាសន្នចំនួន៦ខែបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:៣៥
ពុំមានការបញ្ជាក់អំពីមូលហេតុដែលជំរុញឱ្យប្រមុខដឹកនាំរបបសឹកភូមា លោក មីន អ៊ុងឡាំង ចុះហត្ថលេខាសម្រេចបន្ធូរបន្ថយច្បាប់ចុះឈ្មោះគណបក្សនយោបាយក្នុងបញ្ជីបោះឆ្នោតទេ។ អ្វីដែលគេដឹងសម្រាប់ពេលនេះ គឺគ្រប់គណបក្សដែលមានសមាជិកត្រឹម៥ម៉ឺននាក់ មិនមែន១០ម៉ឺននាក់ដូចពីមុន អាចចុះឈ្មោះចូលរួមបោះឆ្នោតថ្នាក់ជាតិ និងនិងថ្នាក់ឃុំសង្កាត់ បានហើយ។
ប៉ុន្តែតើការបោះឆ្នោតនឹងប្រព្រឹត្តទៅនៅថ្ងៃណាឱ្យប្រាកដ?
១កុម្ភៈ២០២៤ ជាខួបគម្រប់បីឆ្នាំគត់ដែលក្រុមឧត្តមសេនីយ៍ភូមាបានធ្វើរដ្ឋប្រហារថ្ងៃ១កុម្ភៈ២០២១-ទម្លាក់រដ្ឋាភិបាលស៊ីវិលភូមា ក្រោមហេតុផលមានការលួចបន្លំសន្លឹកក្នុងសម័យបោះឆ្នោតឆ្នាំ២០២០។ ក្រុមយោធាបានប្រកាសដាក់ប្រទេសក្នុងភាពអាសន្នភ្លាមនាពេលនោះ ហើយសន្យារៀបចំការបោះឆ្នោតឡើងវិញ ជាមួយនឹងការតាក់តែងច្បាប់បោះឆ្នោតថ្មី ដ៏តឹងរ៉ឹង ផ្តល់ប្រៀបដល់ខ្លួន។ ប៉ុន្តែប្រឈមនឹងកម្លាំងប្រឆាំងដ៏ខ្លាំងក្លា និងការរីករាលដាលនៃជម្លោះស៊ីវិលនៅតាមតំបន់ជាច្រើនក្នុងផ្ទៃប្រទេស ពោលគឺរវាងក្រុមប្រដាប់អាវុធជាមួយសកម្មជនបក្សប្រឆាំងផង និងជាមួយក្រុមជនជាតិភាគតិចប្រដាប់អាវុធផង របបសឹកបានលេសពន្យារពេលដាក់ប្រទេសក្នុងភាពអាសន្ន ម្តងហើយម្តងទៀត ដែលធ្វើឱ្យការបោះឆ្នោតមិនអាចប្រព្រឹត្តទៅបាន។
ហើយនៅថ្ងៃទី៣១មករា២០២៤នេះ ប៉ុន្មានម៉ោងមុនផុតឱសានវាទ និងក្រោយជំនួបប្រជុំក្រុមប្រឹក្សាសន្តិសុខជាតិ មេដឹកនាំយោធាភូមាបានប្រកាសបន្តដាក់ប្រទេសក្នុងភាពអាសន្នជាថ្មី និងបន្ថែមចំនួន៦ខែទៀត។ ប្រធានាធិបតីភូមាបានពន្យល់អំពីភាពចាំបាច់នៃការបន្តដាក់ប្រទេសភាពអាសន្នថា ស្ថានភាពមិនទាន់ត្រលប់មករកភាពធម្មតា និងដើម្បីអាចបន្តប្រយុទ្ធប្រឆាំងនឹងភេរវនិយម។ ក្រុមប្រឹក្សាការពារនិងសន្តិសុខជាតិបានពិភាក្សាអំពីដំណើររៀបចំបោះឆ្នោតជាតិ និងអំពីការធ្វើជំរឿនថ្នាក់ជាតិមុនបោះឆ្នោតជាមួយគណបក្សជាច្រើន។ នេះបើតាមខ្លឹមសារនៃសេចក្តីថ្លែងការណ៍ដោយគ្មានផ្តល់ព័ត៌មានលម្អិតជាងនេះទេ។
សម្រាប់អ្នកវិភាគឯករាជ្យដូចយ៉ាងលោក David Mathierson របបដែលចុះខ្សោយរួញអំណាចស្ទើរអស់ ត្រូវតែបន្តដាក់ប្រទេសក្នុងភាពអាសន្នទៀត។ រដ្ឋធម្មនុញ្ញភូមាឆ្នាំ២០០៨ តាក់តែងដោយក្រុមយោធា និងដែលមេដឹកនាំសឹកគោរពតាម បានចែងឱ្យអាជ្ញាធរត្រូវរៀបចំការបោះឆ្នោតសភា នៅរវាង៦ខែក្រោយការលើកប្រទេសចេញពីភាពអាសន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ