ចូកូវីដូដូ ប្រធានាធិបតីដែលបានលើកឥណ្ឌូណេស៊ីឱ្យត្រដែតលើពិភពលោក
ឥណ្ឌូណេស៊ី ត្រូវរៀបចំការបោះឆ្នោតជ្រើសរើសប្រធានាធិបតីនៅថ្ងៃទី១៤កុម្ភៈ២០២៤។ ស្របតាមរដ្ឋធម្មនុញ្ញជាតិ ប្រធានាធិបតីផុតអាណត្តិលោក ចូកូវីដូដូ មិនអាចឈរឈ្មោះជាថ្មីទេ ប៉ុន្តែប្រជាប្រិយភាពរបស់លោកនៅខ្ពស់ត្រដែត ក្នុងកំរិតចន្លោះពី៧៥ទៅ៨០% គួរជាទីច្រណែនសម្រាប់មេដឹកនាំផ្សេងទៀតនៅលើពិភពលោក។ ក្នុងរយៈពេល១០ឆ្នាំ លោកចូកូវី បានប្រែក្លាយឥណ្ឌូណេស៊ី ឱ្យទៅជាប្រទេសមហាសេដ្ឋកិច្ចលំដាប់ពិភពលោក មិនមែនតែត្រឹមថ្នាក់តំបន់ទេ។ តើលោកចូកូវីដូដូ បានបន្សល់ទុកនូវស្នាដៃយ៉ាងណាខ្លះសម្រាប់ប្រទេស?
ចុះផ្សាយនៅថ្ងៃ៖
ស្តាប់ - ០៤:០៩
តាំងពីជាប់ឆ្នោតក្លាយជាប្រធានាធិបតីលើកដំបូងបំផុតនៅឆ្នាំ២០១៤ លោក ចូកូវីដូដូ មិនបញ្ឈប់សារជំរុញទឹកចិត្តប្រជាពលរដ្ឋឥណ្ឌូណេស៊ីទាំងអស់ថា អាចនិងត្រូវតែមានទំនុកចិត្តលើឥណ្ឌូណេស៊ីខ្លួនឯងទើបជាតិមានវឌ្ឍនភាពទេ។ លោកចង់ឃើញឥណ្ឌូណេស៊ី មានបដិវត្តខួរក្បាល ដើម្បីភាពរីកចម្រើន ក្លាយជាប្រទេសដ៏ធំ ទាំងផ្នែកទំហំប្រទេសបើនិយាយក្នុងន័យចំ ឬក្នុងផ្នែកអភិវឌ្ឍលើគ្រប់វិស័យបើនិយាយន័យធៀប។
ពីរអាណត្តិក្រោមការដឹកនាំរបស់លោក ឥណ្ឌូណេស៊ីពិតបានក្លាយប្រទេសដ៏ធំមែន! នៅឆ្នាំ២០២៤ ឥណ្ឌូណេស៊ីត្រូវមានសេដ្ឋកិច្ចលំដាប់ទី៥ពិភពលោក ដោយវ៉ារឈ្នះប្រទេសអង់គ្លេសទៅទៀត។ នេះបើតាមក្តីរំពឹងរបស់ធនាគារពិភពលោក និងអង្គការមូលនិធិរូបិយវត្ថុអន្តរជាតិ។ កាលពី៨ឆ្នាំមុន ឥណ្ឌូណេស៊ីមិនស្ថិតក្នុងចំណោម៣០ប្រទេសដំបូងគេផង។
សន្ទុះដ៏លឿនស្លេវនេះ បានមកពីកំណើននៃប្រជាពលរដ្ឋស្រទាប់កណ្តាល ដែលស្ទើរគ្មានសោះកាលពី១៥ឆ្នាំមុន។ ៣ភាគបួននៃប្រជាជនឥណ្ឌូណេស៊ីជាជនក្រីក្រ មួយភាគជាអ្នកមានកំពូលក្តោបគ្រប់ធនធានសេដ្ឋកិច្ចជាតិ។
គ្មានហេរដ្ឋារចនាសម្ព័ន្ធត្រឹមត្រូវកាលពី១០ឆ្នាំមុន រដ្ឋធានីហ្សាការតាបច្ចុប្បន្នមានបណ្តាញរថភ្លើងក្រោមដី រថភ្លើងក្រុងដើរដោយអគ្គិសនី។ មានតែមួយខ្សែឆ្លងកាត់ក្រុងមែន តែជាមធ្យោបាយដឹកជញ្ជូនដ៏ល្អសម្រាប់មកជំនួសម៉ូតូឌុប។ ឥណ្ឌូណេស៊ីជាប្រទេសនៅអាស៊ីអាគ្នេយ៍តែមួយគត់ដែលមានរថភ្លើងល្បឿនលឿន ភ្ជាប់ពីក្រុងហ្សាការតាទៅក្រុងBandung ដោយចំណាយពេលតែ៤៥នាទីទល់នឹងការជិះឡាន៤ម៉ោង។
លោកចូកូវី រហ័សនាមរបស់លោកប្រធានាធិបតី ផ្តល់តម្លៃពិសេសដល់ការអភិវឌ្ឍហេដ្ឋារចនាសម្ព័ន្ធ កិច្ចការពារសង្គម ទន្ទឹមនឹងការទ្រទ្រង់ឱ្យមានកំណើនសេដ្ឋកិច្ចថេរកំរិត ៥% (លើកលែងតែឆ្នាំកូវីដ២០២០)។ គម្រោងលើរដ្ឋធានីទៅភាគខាងជើងកោះJava ក៏ស្ថិតក្នុងទស្សនវិស័យអភិវឌ្ឍគោលនេះដែរ។ ដូច្នេះសន្ទុះកំណើនសេដ្ឋកិច្ច បានហុចផលដល់គ្រប់ខេត្តដែលមានបណ្តាញផ្លូវថ្នល់-ផ្លូវដែកល្បឿនលឿន តាំងពីអាឆេ ដល់ស៊ូមាត្រានិងប៉ាពូអាស៊ីខាងកើត។
លោកចូកូវីដូដូ មានជំនឿថាឥណ្ឌូណេស៊ីត្រូវតែក្លាយជាប្រទេសមានសេដ្ឋកិច្ចខ្លាំងជាងគេបំផុតមួយនៅលើពិភពលោក នៅខួប១០០ឆ្នាំនៃការទទួលឯករាជ្យ (១៩៤៥) ដោយបានចារកម្មវត្ថុ ក្នុងផែនទីចង្អុលផ្លូវឈ្មោះថា« Golden Indonesia”។ មហិច្ឆតារបស់ចូកូវីមិនហួសប្រមាណទេ ព្រោះបើតាមការព្យាកររបស់អង្គការសហប្រតិបត្តិការសេដ្ឋកិច្ចនិងអភិវឌ្ឍ(OECD) ផលិតផលសរុបក្នុងស្រុកឥណ្ឌូណេស៊ីនឹងឡើងដល់ជិត៩០០០ពាន់លានដុល្លារនៅឆ្នាំ២០៤៥។ ហើយកាន់តែប្រសើរទៀត ចំនួនប្រជាជននឹងឡើងលើស៣០០លាននាក់ ក្នុងនោះ៦៥%ជាពលរដ្ឋពេញអាយុសកម្ម(ធ្វើការ)។
ប្រជាប្រិយភាពរបស់លោកចូកូវីដូដូ ក៏បានមកពីជំហរនយោបាយធ្វើកំណែទម្រង់ច្បាប់ការងារ គិតគូរដល់សង្គម អោបក្រសោបរួមរស់ជាមួយគ្រប់សាសនា ដោយមិនភ្លេចក្រុមមូលធននិយម ពោលគឺលោកជាអ្នកសង្គមនិយមផង ជាអ្នកសេរីនិយមផង ដែលបែងចែកផលសេដ្ឋកិច្ចដល់អ្នកក្រីក្រ និងសម្រួលការវិនិយោគបរទេសក្នុងប្រទេស។
ជាមួយនឹងប្រជាប្រិយភាព៨១% នៅមុនថ្ងៃបោះឆ្នោតប្រធានាធិបតីអាណត្តិថ្មី បក្សប្រឆាំងហាក់ពិបាកបំពងលទ្ធផលអវិជ្ជមាននៃការដឹកនាំរបស់លោកចូកូវីដូដូណាស់។ តែស្នាដៃមិនល្អក៏មានច្រើនដែរ ដូចជាក្នុងវិស័យសិទ្ធិមនុស្ស អង្គការHuman Rights Watch មិនសរសើរលោកប្រធានាធិបតីក្នុងរបាយការណ៍ប្រចាំឆ្នាំ២០២៤ទេ ព្រោះរដ្ឋាភិបាលនេះមិនបានប្រឹងប្រែងប្រយុទ្ធប្រឆាំងនឹងការរើសអើងឬការរំលោភក្រុមសាសនាភាគតិច ក្រុមអ្នកស្រលាញ់ភេទដូចគ្នា។ ចំពោះសិទ្ធិស្ត្រីវិញ ឥណ្ឌូណេស៊ីអាចធ្វើបានប្រសើរជាងនេះ។
រដ្ឋាភិបាលលោកចូកូវីដូដូរងការបន្ទោសគួរឱ្យកត់សម្គាល់មួយ គឺមិនអាចជំរុញមេដឹកនាំសឹកភូមាឱ្យអនុវត្តកិច្ចព្រមព្រៀង៥ចំណុច កាលខ្លួនជាប្រធានផ្លាស់វេនអាស៊ាន។ លទ្ធផលដ៏អាក្រក់បំផុត សម្រាប់លោកចូកូវី គឺអំពើពុករលួយ។ លោកបានចាកចេញពីតំណែង ដោយបន្សល់ទុកនូវឥណ្ឌូណេស៊ីជាប្រទេសពុករលួយខ្លាំងមួយ ដោយធ្លាក់ចំណាត់ថ្នាក់ពី៩៦មកទី១១០ក្នុងចំណោម១៨០ប្រទេស។ កាលពីឆ្នាំ២០១៤ ឥណ្ឌូណេស៊ីស្ថិតនៅលំដាប់លេខ១០៧លើ១៧៥ប្រទេស។ នេះបើតាមអង្គការTransparency International ដែលបញ្ជាក់ថារដ្ឋបាលលោកចូកូវីដូដូ មិនពុករលួយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ