ម៉ាឡេស៊ី បន្ធូរបន្ថយទោសអតីតនាយករដ្ឋមន្ត្រី ណាជីប រ៉ាហ្សាក់
អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ ដែលតុលាការកាត់ទោសឲ្យជាប់ពន្ធនាគារចំនួន១២ឆ្នាំ នៅពេលនេះ ត្រូវព្រះមហាក្សត្រម៉ាឡេស៊ី ព្រះរាជានុញ្ញាតបន្ធូរបន្ថយទោស ចំនួនពាក់កណ្តាល មកត្រឹម៦ឆ្នាំ។ នេះបើតាម ក្រុមប្រឹក្សាលើកលែងទោស ដែលបានផ្សាយបញ្ជាក់នៅថ្ងៃសុក្រ ទី២កុម្ភៈ។
ចុះផ្សាយនៅថ្ងៃ៖
ស្តាប់ - ០២:៤២
ក្រោយពីបានពិនិត្យសំណុំរឿងនិងបានពិភាក្សាគ្នារួចមក ក្រុមប្រឹក្សាលើកលែងទោសសហព័ន្ធម៉ាឡេស៊ី បានសម្រេចអនុញ្ញាតលើកលែងទោសទណ្ឌកម្មនិងការផាកពិន័យ ចំនួន ៥០% ចំពោះអតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់។ កិច្ចប្រជុំពិភាក្សាអំពីលើកលែកទោសនេះ មានវត្តមានអគ្គព្រះរាជអាជ្ញា បានធ្វើឡើងនៅដើមសប្តាហ៍ ក្រោមព្រះរាជាធិបតី ព្រះចៅស៊ូតង់ អាប់ឌូឡា ស៊ូតង់ អាហ្មាដ ស្សាហ៍។ ពោលគឺ២ថ្ងៃមុនទ្រង់ដល់វេនដាក់រាជ្យថ្វាយព្រះមហាក្សត្រថ្មី។ (នៅម៉ាឡេស៊ី រាជាធិបតេយ្យអាស្រ័យសភា ហើយ ព្រះមហាក្សត្រប្តូរវេនសោយរាជ្យ៥ឆ្នាំម្តង។)
ដោយមិនពន្យល់ប្រាប់ហេតុផលលម្អិត ក្រុមប្រឹក្សាលើកលែងទោស គ្រាន់តែបានបញ្ជាក់ថា ទណ្ឌិតលោក ណាជីប រ៉ាហ្សាក់ ត្រូវសម្រាលទោស មកត្រឹម៦ឆ្នាំតែប៉ុណ្ណោះ ហើយនៅជាប់ពិន័យប្រាក់ត្រឹមតែ ៥០លានរីងហ្គីត ស្មើប្រមាណនឹង ១០,៥ លានដុល្លារ។ អាស្រ័យហេតុនេះ លោក ណាជីប រ៉ាហ្សាក់ អាចនឹងត្រូវរួចទោសមានសេរីភាព នៅឆ្នាំ២០២៨។ ចំពោះការសងថវិកាផាកពិន័យវិញ ប្រសិនបើលោកគ្មានលទ្ធភាពនឹងសងទេ តុលាការអាចនឹងបន្ថែមទោស១ឆ្នាំទៀត។
ជុំវិញសំណុំរឿងនេះ ទីភ្នាក់ងារព័ត៌មានបារាំងអាអេហ្វប៉េ ពុំអាចទាក់ទងសុំការបំភ្លឺបន្ថែមពីសំណាក់មេធាវីរបស់ទណ្ឌិតនិងតំណាងរដ្ឋាភិបាល បានភ្លាមៗនោះឡើយទេ កាលពីថ្ងៃសុក្រ។
គួររំឭកជម្រាបថា លោកអតីតនាយករដ្ឋមន្ត្រី ណាជីប រ៉ាហ្សាក់ បានកាន់អំណាច នៅចន្លោះឆ្នាំ ២០០៩ ដល់ ឆ្នាំ២០១៨។ នៅឆ្នាំ២០២០ ថ្នាក់ដឹកនាំប្រទេសរូបនេះ ត្រូវតុលាការក្រុងកូឡាឡាំពួរ ផ្តន្ទាទោសដាក់ពន្ធនាគារចំនួន ១២ឆ្នាំ ពីបទរំលោភអំណាច បទលាងលុយកខ្វក់ និងបទប្រព្រឹត្តអំពើពុករលួយ។ បទអំពើពុករលួយ ក៏ពីព្រោះតែលោកត្រូវជាប់សង្ស័យថាបានគៃបន្លំលុយពីគម្រោងអភិវឌ្ឈសាធារណរបស់រដ្ឋ បង្វិលមកដាក់ធនាគារផ្ទាល់ខ្លួន ចំនួនយ៉ាងតិច ក៏ប្រមាណជិត ៩ លានដុល្លារ។ សំណុំរឿងអាស្រូវពុករលួយនេះ បានបណ្តាលឲ្យរូបលោកធ្លាក់ប្រជាប្រិយភាព និងចាញ់ការបោះឆ្នោតនៅឆ្នាំ២០១៨។ ចំណែកភរិយារបស់លោក ក៏ត្រូវជាប់បទសង្ស័យជាមួយស្វាមីដែរ។
អ្នកជំនាញកិច្ចការអាស៊ី នៅសកលវិទ្យាល័យអូស្ត្រាលី Tasmania សាស្ត្រាចារ្យ James Chin បានចាត់ទុកថា ការលើកលែងទោសនេះ ស្រដៀងគ្នានឹងករណីលើកលែងទោសទៅនាយករដ្ឋមន្ត្រី អានវ៉ា អ៊ីប្រាហ៊ីម។ ការណ៍នេះបង្ហាញឲ្យឃើញថា នៅម៉ាឡេស៊ី មានច្បាប់ស្តង់ដារ២។ ១គឺច្បាប់សម្រាប់ពួកអ្នកនយោបាយមានអំណាច អ្នកវណ្ណៈអភិជនខ្ពង់ខ្ពស់ ហើយនិង១ទៀត ច្បាប់សម្រាប់ប្រជារាស្ត្រសាមញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ