សិង្ហបុរីនិងម៉ាឡេស៊ី ត្អូញត្អែរខ្លាំងអំពីការដុតរានដីចំការ នៅឥណ្ឌូណេស៊ី ដែលបង្កជាផ្សែងពុល
អាជ្ញាធរសិង្ហបុរី និងម៉ាឡេស៊ី បានចេញប្រតិកម្មផ្ទួនៗគ្នា ត្អូញត្អែរ អំពីផ្សែងពុលក្នុងបរិយាកាស បង្កហានិភ័យដល់សុខភាពមនុស្ស ដោយសារតែការដុតរានដីចំការ នៅកោះស៊ូម៉ាត្រា ប្រទេសឥណ្ឌូណេស៊ី។ ថ្ងៃសៅរ៍ទី៧តុលា អាជ្ញាធរបរិស្ថានសិង្ហបុរី បានជូនដំណឹងថាខ្យល់ពុលបានគ្របដណ្តប់ ពាសពេញសិង្ហបុរី ក្នុងកម្រិតមួយ លើសពីកម្រិតស្តង់ដារ ដែលអាចបង្កគ្រោះថ្នាក់ដល់សុខភាព។ អាជ្ញាធរសិង្ហបុរី បានជូនដំណឹងប្រាប់ទៅពលរដ្ឋ ឲ្យសំងំនៅក្នុងផ្ទះ ប្រសិនបើពុំមានការចាំបាច់ត្រូវចេញក្រៅ។
ចុះផ្សាយនៅថ្ងៃ៖
ស្តាប់ - ០៣:៤២
ផ្សែងពុលលាយឡំដោយផេះផង់ ត្រូវបានអាជ្ញាធរសិង្ហបុរី អះអាងថា គឺហោះចេញមកពីកោះស៊ូម៉ាត្រាឥណ្ឌូណេស៊ី ជាទីដែលគេដុតរានដីចំការនិងដីព្រៃ ដើម្បីធ្វើកសិកម្ម។ យោងតាមរូបភាពផ្កាយរណប ចំណុចភ្លើងព្រៃប្រមាណ ជា២១២កន្លែង ត្រូវបានគេប្រទះឃើញ នៅភាគកណ្តាលនិងខាងត្បូងកោះស៊ូម៉ាត្រា នៅថ្ងៃសៅរ៍ទី៧តុលា។ អាជ្ញាធរបរិស្ថានសិង្ហបុរី លើកឡើងថា ជាធម្មតាក្នុងអំឡុងពេលនេះ គឺជារដូវប្រាំង ដែលនៅឥណ្ឌូណេស៊ី តែងតែមានការដុតរានដីចំការ ដីព្រៃ ដើម្បីធ្វើកសិកម្ម តែឆ្នាំនេះ គឺលើកទី១ហើយបើគិតពីឆ្នាំ២០១៩មក ដែលកម្រិតផ្សែងពុល បានឡើងលើសកម្រិតអនុញ្ញាតស្តង់ដារសុខភាព។
គួរបញ្ជាក់ថា មិនមែនមានតែសិង្ហបុរីទេ ដែលបានត្អូញត្អែរទាក់ទិននឹងផ្សេងពុលនេះ។ ក្រសួងបរិស្ថានម៉ាឡេស៊ី ក៏បានចេញលិខិតមួយដែរ ដោយបានស្តីបន្ទោសប្រទេសឥណ្ឌូណស៊ី ដោយចំៗតែម្តង ថាជាអ្នកធ្វើឲ្យគុណភាពខ្យល់ដកដង្ហើមត្រូវធ្លាក់ចុះខ្លាំង ហើយបង្កហានិភ័យដល់សុខភាពពលរដ្ឋម៉ាឡេស៊ី។ យោងតាមលិខិតដែលបានចេញ កាលពីថ្ងៃទី៣០កញ្ញា គឺអាជ្ញាធរម៉ាឡេស៊ី បានអះអាងថា ដោយផ្អែកតាមទិន្នន័យរបស់ ទីភ្នាក់ងារឧតុនិយមអាស៊ាន គឺមានភ្លើងឆេះចំនួន ៥២ចំណុច នៅលើកោះស៊ូម៉ាត្រា និងប្រមាណ២៦៤ចំណុច នៅលើកោះប័រណេអូ របស់ឥណ្ឌូណេស៊ី។
ប្រតិកម្មចំពោះការចោទពីសំណាក់ ក្រសួងបរិស្ថានម៉ាឡេស៊ីនេះ លោកស្រី Siti Nurbaya Bakar រដ្ឋមន្ត្រីក្រសួងបរិស្ថានឥណ្ឌូណេស៊ី បានច្រានចោលទាំងស្រុង និងបានអះអាងថា គ្មានផ្សែងពុលរសាត់ឆ្លងព្រំដែនចូលទៅប្រទេសក្បែរខាងឡើយ។ តែយ៉ាងណា លោកស្រីបានបញ្ជាក់ថានឹងស្រាវជ្រាវ ចាប់អ្នកទទួលខុសត្រូវក្រុមហ៊ុនមកទទួលទោស ប្រសិនបើគេរកឃើញថា ក្រុមហ៊ុនកសិកម្មទាំងនោះ បានដុតរានដីចំការនិងដីព្រៃ។
សូមបញ្ជាក់ដែរថា កាលពីថ្ងៃទី៣តុលា អាជ្ញាធរក្រុងJambi លើកោះស៊ូម៉ាត្រា បានចេញបញ្ជាឲ្យបិទសាលារៀនជាច្រើនថ្ងៃ ដោយសារតែផ្សែងពុលអួរអាប់ គ្របដណ្តប់ពិបាកដកដង្ហើម បង្កឡើងដោយភ្លើងព្រៃនៅក្នុងខេត្តPalembang ប្រមាណជិត១ខែមកហើយ។ នៅតំបន់នេះ កម្រិតល្អងធូលីក្នុងខ្យល់ គឺលើសកម្រិតអនុញ្ញាតនៃអង្គការសុខភាពពិភពលោក ដល់ទៅ១០។
គួររំលឹកថា ជារៀងរាល់ឆ្នាំ ក្នុងរដូវប្រាំងនិងក្តៅស្ងួត នៅឥណ្ឌូណេស៊ីដែលជាប្រទេសដាំដំណាំដូងប្រេងច្រើនជាងគេបង្អស់ តែងតែមានការដុតរានដីចំការ ហើយឆេះរាលដាលជាភ្លើងឆេះព្រៃទប់មិនឈ្នះ។ យោងតាមអាជ្ញាធរម៉ាឡេស៊ី ភ្លើងឆេះឆ្នាំនេះនៅឥណ្ឌូណេស៊ី គឺធ្ងន់ជាងឆ្នាំ២០១៩ទៅទៀត។ កាលពីឆ្នាំ២០១៦ យោងតាមការសិក្សាមួយ ធ្វើឡើងដោយសកលវិទ្យាល័យ Colombia និងសកលវិទ្យាល័យ Haward បានសន្និដ្ឋានថា ផ្សែងពុលលាយឡំដោយផេះល្អងធូលី បានបណ្តាលឲ្យមនុស្សស្លាប់មុនអាយុ ចំនួន១សែននាក់ នៅអាស៊ីអាគ្នេយ៍ ដែលក្នុងចំណោមនេះ មានប្រមាណ៦៥០០នាក់នៅម៉ាឡេស៊ី និង ២២០០នាក់ នៅសិង្ហបុរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ