របបសឹកភូមាយល់ព្រមព្រៀងឈប់បាញ់ជាមួយពួកឧទ្ទាម ក្រោមការសម្របសម្រួលរបស់ចិន
រដ្ឋាភិបាលសឹកភូមា និងក្រុមប្រឆាំងប្រដាប់អាវុធ៣ក្រុមបានយល់ព្រមព្រៀងគ្នាអនុវត្តបទឈប់បាញ់ នៅតំបន់ភាគខាងជើង ជាប់ព្រំដែនជាមួយប្រទេសចិន។ តាមអ្នកនាំពាក្យរបស់របបសឹកភូមា ការចរចាស្តីពីបទឈប់បាញ់រៀបចំឡើងនៅទីក្រុងគុនមីង ក្រោមការជួយសម្របសម្រួលរបស់ប្រទេសចិន កាលពីថ្ងៃ សុក្រ ទី១២ មករា។ ភាគីជម្លោះទាំងពីរមិនបានបញ្ជាក់តំបន់ដែលត្រូវអនុវត្តបទឈប់បាញ់ នៅឡើយទេ ប៉ុន្តែ កាលពីសប្តាហ៍មុន សម្ព័ន្ធប្រដាប់អាវុធ ៣ក្រុមទើបប្រកាសវាយដណ្តើមកាន់កាប់ទីក្រុងឡូកី ដែលជាច្រកសំខាន់សម្រាប់ពាណិជ្ជកម្មនាំចេញរបស់ភូមាទៅកាន់ប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៨
នៅក្រោមជួយសម្របសម្រួលរបស់ចិន ភាគីជម្លោះនៅភូមាបានជួបចរចា និងយល់ព្រមព្រៀងគ្នាអនុវត្តបទឈប់បាញ់ នៅភាគខាងជើងប្រទេសភូមា។ តាមអ្នកនាំពាក្យរបស់របបសឹកភូមា លោក ច មីនទុន ក្រុមឧទ្ទាមប្រដាប់អាវុធ៣ក្រុមបានយល់ព្រមបើកផ្លូវពាណិជ្ចកម្មនៅព្រំដែនជាមួយចិន។
អ្នកនាំពាក្យរបស់ក្រសួងការបរទេសចិន លោកស្រី ម៉ៅ នីងបន្ថែមថា ភាគីជម្លោះនៅភូមាបានយល់ព្រមអនុវត្តបទឈប់បាញ់បន្ទាន់ និងដកកម្លាំងយោធា និងស្វែងរកដំណោះស្រាយ តាមផ្លូវចរចាសន្តិភាព។
ទាំងអ្នកនាំពាក្យចិន មិនបានលម្អិតឈ្មោះក្រុមឧទ្ទាមទាំងអស់ និងតំបន់ដែលត្រូវអនុវត្តបទឈប់បាញ់ នៅភាគខាងជើងភូមានោះទេ។ ប៉ុន្តែ អ្នកនាំពាក្យរបស់របបសឹកភូមាបានបញ្ជាក់ឈ្មោះ កងទ័ពរំដោះជាតិតាអាង (Ta’ang)។ ក្រុមនេះ ស្ថិតនៅក្នុងសម្ព័ន្ធប្រដាប់អាវុធ ជនជាតិភាគតិចបីក្រុមដែលទើបវាយដណ្តើមយកបានទីក្រុងឡូកី ពីកណ្តាប់ដៃគ្រប់គ្រងរបស់កងទ័ពភូមា កាលពីសៅរ៍សប្តាហ៍មុន។ ក្រុមអ្នកជំនាញវាយតម្លៃថា បរាជ័យជាបន្តបន្ទាប់របស់កងទ័បភូមា នៅរដ្ឋស្ហានតាមបណ្តោយព្រំដែនភូមាចិន ជាហេតុផលមួយដែលធ្វើឲ្យរបបសឹកបន្ទន់ជំហរ ចរចាជាមួយក្រុមឧទ្ទាម។
ស្ថិតជាប់ព្រំដែនភូមា-ចិន ទីក្រុងឡូកី ដែលស្ថិតក្រោមការគ្រប់គ្រងរបស់ក្រុមយុទ្ធជនស្និទ្ធនឹងមេដឹកនាំយោធាភូមា ជាទីក្រុងល្បីឈ្មោះខាងមានបនល្បែង បនពេស្យាចារ ហើយនិងមជ្ឈមណ្ឌលរកស៊ីឆបោកអនឡាញ។
ដោយសារតែមជ្ឈមណ្ឌលរកស៊ីឆបោកអនឡាញ ដែលដៅសំខាន់ប្រជាជនចិន ប៉េកាំងធ្លាប់បង្ហាញការមិនសប្បាយចិត្តនឹងរដ្ឋាភិបាលសឹកភូមា ដែលខកខានមិនអាចបង្រ្កាបក្រុមជនពាលដែលប្រើទឹកដីភាគខាងជើងភូមាជាកន្លែងរកស៊ីបោកប្រាស់ប្រជាជនចិន។
មួយវិញទៀត ការប្រយុទ្ធគ្នារវាងកងទ័ពរដ្ឋាភិបាលសឹកភូមា និងក្រុមឧទ្ទាមជនជាតិភាគតិចនៅតំបន់ជាប់ព្រំដែន នៅប៉ុន្មានខែមកនេះ មិនត្រឹមប៉ះពាល់ដល់ការដោះដូរពាណិជ្ជកម្ម ចិន ភូមា តែប៉ុណ្ណោះទេ ប៉ុន្តែ វាប៉ះពាល់ដល់សុខសុវត្ថិភាពរបស់ប្រជាជនចិនរស់នៅភាគខាងជើងភូមា។
នៅដើមខែធ្នូកន្លងទៅ ចិនធ្លាប់សំដែងក្តីត្រេកអរដែលឃើញការចរចារវាងរបបសឹក និងពួកឧទ្ទាមផ្តល់លទ្ធផលជាវិជ្ជមាន។ ប៉ុន្តែ នៅក្រោយមក ភាគីជម្លោះទាំងពីរនៅតែបន្តប្រយុទ្ធគ្នា រហូតធ្វើឲ្យចិនអំពាវនាវឲ្យប្រជាជនខ្លួនចាកចេញពីទឹកដីភូមា។
នៅសប្តាហ៍មុន ប៉េកាំងបានដំឡើងសំឡេងខ្លាំងៗដាក់ភូមា បន្ទាប់ពីគ្រាប់ប្លោងមួយគ្រាប់ហោះទៅធ្លាក់ក្នុងទីក្រុងមួយ នៅជាប់ព្រំដែនជាមួយភូមា រហូតធ្វើឲ្យជនជាតិចិនរងរបួស។ កាលណោះ ប៉េកាំងបានសន្យាចាត់វិធានការចាំបាច់ដើម្បីការពារជនជាតិរបស់ខ្លួន។ នៅក្នុងសន្និសីទកាសែតកាលពីថ្ងៃសុក្រ អ្នកនាំពាក្យរបស់ក្រសួងការបរទេសចិន និយាយថា លើកនេះ ភាគីជម្លោះយល់ព្រម មិនបង្កគ្រោះថ្នាក់ ដល់ជនជាតិចិននៅភូមា ហើយនិងមិនបង្កបញ្ហាអសន្តិសុខ នៅតាមបណ្តោយព្រំដែនចិន។ តើភាគីជម្លោះនៅភូមាអាចរក្សាការសន្យាបានប៉ុណ្ណា? ក្រុមឧទ្ទាមប្រដាប់អាវុធជនជាតិភាគតិច ដែលមានប្រៀប វាយបណ្តេញកងទ័ពភូមា ប្រាកដជាមិនព្រមបណ្តោយរបូតទឹកដីដែលខ្លួនទើបវាយដណ្តើមយកបានពីរបបសឹកភូមានោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ