ឆ្នាំនេះ ពិភពលោកប្រើប្រាស់ធ្យូងថ្ម អស់ចំនួនច្រើនខ្លាំងបំផុត មិនធ្លាប់ជួប
ក្នុងឆ្នាំ២០២៣ ពិភពលោកទាំងមូល បានកើនកម្តៅក្តៅបំផុត មិនធ្លាប់មាន ហើយស្របគ្នានេះដែរ ប្រទេសក្នុងពិភពលោក ក៏បានប្រើប្រាស់ធ្យូងថ្ម អស់ចំនួនច្រើនខ្លាំងបំផុត មិនធ្លាប់ជួបដែរ។ ក្នុងឆ្នាំនេះ តម្រូវការប្រើប្រាស់ធ្យូងថ្ម បានកើនដល់ចំនួន ៨,៥៣ ពាន់លានតោន ដែលជាចំនួនកើនឡើងខ្លាំងបំផុតនៅក្នុងប្រវត្តិសាស្ត្រពិភពលោក។ នេះបើតាមរបាយការណ៍អង្កេតថ្មី របស់ ទីភ្នាក់ងារថាមពលអន្តរជាតិ Agence internationale de l'énergie (AIE) ចេញផ្សាយថ្ងៃសុក្រ ទី១៥ ធ្នូ។
ចុះផ្សាយនៅថ្ងៃ៖
ស្តាប់ - ០២:៣៥
ធ្យូងថ្ម ជាប្រភពសំខាន់សម្រាប់ផលិតថាមពលអគ្គិសនី និងប្រើប្រាស់ក្នុងឧស្សាហកម្ម ក៏ប៉ុន្តែ ចំហេះធ្យូងថ្ម ជាបញ្ហាចម្បងខ្លាំងជាងគេ ដែលជំរុញឲ្យមានកំណើនកម្តៅផែនដី។ ២០២៣ ជាឆ្នាំដែលក្តៅបំផុតមិនធ្លាប់ជួប ហើយ ប្រទេសក្នុងពិភពលោក ក៏បានប្រើប្រាស់ធ្យូងថ្ម អស់ចំនួនច្រើនខ្លាំងបំផុត មិនធ្លាប់មានដែរ។ ឆ្នាំនេះ ចំនួនប្រើប្រាស់ធ្យូងថ្ម កើនឡើងខ្លាំងជាងឆ្នាំទៅមិញ ហើយក៏បានកំបែកកំណត់ត្រា ឆ្នាំ២០១៦ ទៀតផង។
ប្រទេសដែលប្រើប្រាស់ធ្យូងថ្ម ច្រើនជាងគេ គឺនៅក្នុងតំបន់អាស៊ី ជាអាទិ៍ ឥណ្ឌា ចិន និងឥណ្ឌូនេស៊ី។ ក្នុងឆ្នាំ២០២៣នេះ ចិន ប្រើធ្យូងថ្មកើនឡើង ២២០ លានតោន ស្មើនឹងជិត៥% កើនឡើងច្រើនជាងឆ្នាំទៅមិញ។ មហាយក្ស ចិន ជាប្រទេសដែលប្រើប្រាស់ធ្យូងថ្ម ស្ទើរតែច្រើនជាងគេលើលោក ពោលគឺស្មើនឹងជាងពាក់កណ្តាលនៃការប្រើប្រាស់ក្នុងពិភពលោក ហើយក្នុងនោះ ជាង៦០% គឺ ចិន ប្រើសម្រាប់វិស័យឧស្សាហកម្ម និងផលិតថាមពលអគ្គិសនី។ ក្នុងឆ្នាំនេះ រដ្ឋអំណាចចិន បានអនុម័តសម្រេចគម្រោង ឲ្យបង្កើនមជ្ឈមណ្ឌលធ្យូងថ្ម ថែមទៀតផង។
បន្ទាប់ពីចិន គឺ ឥណ្ឌា។ មហាយក្សអាស៊ីខាងត្បូងនេះ ប្រើប្រាស់ធ្យូងថ្មកើនឡើង ៩៨ លានតោន ស្មើនឹង ៨% កើនឡើងជាងឆ្នាំ ២០២២។
ចំណែក ឥណ្ឌូនេស៊ី ប្រើប្រាស់ធ្យូងថ្ម កើនឡើង ២៣ លានតោន ស្មើនឹង ១១% ច្រើនជាងឆ្នាំមុន។ ឥណ្ឌូនេស៊ី ប្រើចំហេះធ្យូងថ្មច្រើន គឺដើម្បីឧស្សាហកម្មនីស្សារណកម្ម ផលិតចម្រាញ់រ៉ែ ដូចជា រ៉ែនីកែល ដែលកំពុងតែពេញនិយមក្នុងទីផ្សារ ព្រោះគេយកវាទៅប្រើប្រាស់សម្រាប់ផលិតថ្មអាគុយរថយន្តអគ្គិសនី។
តួលេខទាំងនេះ បើយោងតាមរបាយការណ៍អង្កេត របស់ ទីភ្នាក់ងារថាមពលអន្តរជាតិ និងដែលបានលម្អិតដែរ ថា ប្រទេសខាងបច្ចិមលោក ប្រើប្រាស់ធ្យូងថ្ម ថយចុះខ្លាំង។ ប្រទេសក្នុងសហភាពអឺរ៉ុប ថយចុះ ១០៧ លានតោន ស្មើនឹង ថយ២៣% ធៀបនឹងឆ្នាំ ២០២២ ហើយនៅ សហរដ្ឋអាមេរិក ថយចុះ ៩៥ លានតោន ថយជាង២១% ធៀបនឹងឆ្នាំមុន។
ផ្ទុយទៅវិញ រុស្ស៊ី ដែលជាប្រទេសផលិតធ្យូងថ្ម ច្រើនលំដាប់ទី៤លើពិភពលោក គឺទីភ្នាក់ងារថាមពលអន្តរជាតិ បានសារភាពថា លំបាករកទិន្នន័យសម្រាប់វាយតម្លៃ ពីព្រោះតែ រុស្ស៊ី កំពុងតែជាប់ដៃផុងក្នុងសង្គ្រាមនៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ