ឥណ្ឌូណេស៊ីសម្ពោធរថភ្លើងល្បឿនលឿន "Whoosh" ក្នុងតម្លៃជាង ៧ ០០០លានដុល្លារ
នៅថ្ងៃចន្ទ ទី២ តុលា ប្រទេសឥណ្ឌូណេស៊ីបានសម្ពោធដាក់ឲ្យប្រើប្រាស់នូវរថភ្លើងល្បឿនលឿនឈ្មោះ « Whoosh »។ ពិធីបើកសម្ពោធនេះបានចូលរួមដោយប្រធានាធិបតីលោកយ៉ូកូ វីដូដូ រួមទាំងថ្នាក់ដឹកនាំជាច្រើនរូបទៀតនៅក្នុងរដ្ឋាភិបាល។ « Whoosh » ជារថភ្លើងល្បឿនលឿនទី១ នៅអាស៊ីអាគ្នេយ៍ដោយមានការចូលរួមសាងសង់ពីប្រទេសចិនតាមរយៈគម្រោងផ្លូវ និងខ្សែក្រវ៉ាត់របស់ប្រធានាធិបតីចិនលោកស៊ី ជីនពីង។
ចុះផ្សាយនៅថ្ងៃ៖
ស្តាប់ - ០៣:០៧
« Whoosh » ជារថភ្លើងល្បឿនលឿនដែលតភ្ជាប់ទីក្រុងហ្សាការតា និងទីក្រុងធំមួយឈ្មោះ « បង់ឌុង » ក្នុងចម្ងាយផ្លូវប្រវែង ១៥០គីឡូម៉ែត្រ។ ជាមួយនឹងរថភ្លើង « Whoosh » ដែលអាចរត់ក្នុងល្បឿន ៣៥០គីឡូម៉ែត្រក្នុងមួយម៉ោង និងអាចដឹកអ្នកដំណើរបានជាង ៦០០នាក់ពេលនេះ ការធ្វើដំណើរពីក្រុងហ្សាការតាទៅក្រុងបង់ឌុងត្រូវចំណាយពេលប្រមាណតែ ៤៥នាទីប៉ុណ្ណោះ ពោលតិចជាងការធ្វើដំណើរតាមរថភ្លើងធម្មតាដែលត្រូវចំណាយពេលជិត ៣ម៉ោង។ « រថភ្លើងល្បឿនលឿន ហ្សាការតា បង់ឌុងគឺជានិមិត្តរូបនៃទំនើបនីយកម្មក្នុងវិស័យដឹកជញ្ជូនសាធារណៈដោយមានការតភ្ជាប់យ៉ាងល្អឥតខ្ចោះជាមួយនឹងមធ្យោបាយដឹកជញ្ជូនផ្សេងទៀត » នេះជាការថ្លែងរបស់ប្រធានាធិបតីលោកយ៉ូកូ វីដូដូ។
គួរបញ្ជាក់ថា រថភ្លើងល្បឿនលឿន « Whoosh » នេះត្រូវបានចាប់ផ្តើមសាងសង់ក្នុងឆ្នាំ ២០១៥ គ្រោងបញ្ចប់ដាក់ឲ្យប្រើប្រាស់ក្នុងឆ្នាំ ២០១៩ និងត្រូវចំណាយលុយតិចជាង ៥ ០០០លានដុល្លារ។ តែភាពយឺតយ៉ាវក្នុងការសាងសង់ និងវិបត្តិកូវីដ១៩បានធ្វើឲ្យការសាងសង់អូសបន្លាយពេលដល់ឆ្នាំ ២០២៣។ ចំណែកទំហំនៃចំណាយក្នុងការសាងសង់វិញគឺមានរហូតជាង ៧ ០០០លានដុល្លារ ពោលមិនមែនតិចជាង ៥ ០០០លានដុល្លារដូចដែលបានគ្រោងទុកទេ។ ពិតណាស់ រថភ្លើងល្បឿនលឿន « Whoosh » ជាជោគជ័យមួយរបស់ឥណ្ឌូណេស៊ីក្នុងនាមជាប្រទេសមហាអំណាចសេដ្ឋកិច្ចទី១ នៅអាស៊ីអាគ្នេយ៍។ តែចិនក៏មានចំណែកនៅក្នុងជោគជ័យនេះដែរ ព្រោះចិនបានចេញលុយ និងបានចូលរួមសាងសង់ជាមួយឥណ្ឌូណេស៊ី។
រដ្ឋមន្រ្តីឥណ្ឌូណេស៊ីម្នាក់បានប្រាប់ឲ្យដឹងថា លោកវីដូដូគ្រោងអញ្ជើញប្រធានាធិបតីចិនលោកស៊ី ជីនពីងដើម្បីជិះរថភ្លើងល្បឿនលឿន « Whoosh » នាឱកាសទស្សនកិច្ចរបស់លោកស៊ីនៅឥណ្ឌូណេស៊ីនាពេលខាងមុខ។ តាមពិត ការវិនិយោគរបស់ចិននៅក្នុងរថភ្លើងល្បឿនលឿន « Whoosh » នៅឥណ្ឌូណេស៊ីជាផ្នែកមួយនៃមហាគម្រោងផ្លូវ និងខ្សែក្រវ៉ាត់របស់ប្រធានាធិបតីចិនលោកស៊ី ជីនពីង។ អ្វីដែលលោកស៊ីចង់បាននៅក្នុងមហាគម្រោងនេះ គឺការសាងសង់ហេដ្ឋារចនាសម្ព័ន្ធ ដូចជាកំពង់ផែ ផ្លូវថ្នល់ ឬផ្លូវដែកនៅក្រៅទឹកដីចិនដើម្បីតភ្ជាប់រវាងចិនជាមួយជាមួយតំបន់ផ្សេងៗក្នុងលោក។ ឥណ្ឌូណេស៊ីក៏ដូចជាប្រទេសផ្សេងមិនបានលាក់បាំងពីការពឹងលើវិនិយោគរបស់ចិនឡើយ។ ក្នុងខែកក្កដាកន្លងទៅ លោកយ៉ូកូ វីដូដូ និងសមភាគីចិនលោកស៊ី ជីនពីនបានបង្ហាញគម្រោងច្រើនដំណាក់កាល ដែលមានទឹកប្រាក់រាប់សិបពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ