បន្ទាប់ពី G២០ ប្រធានាធិបតីបារាំងទៅបង់ក្លាដែសដើម្បីពង្រឹងយុទ្ធសាស្រ្តបារាំងនៅឥណ្ឌូប៉ាស៊ីហ្វិក
បន្ទាប់ពីបានចូលរួមនៅក្នុងកិច្ចប្រជុំកំពូល G២០ ក្នុងប្រទេសឥណ្ឌា ប្រធានាធិបតីបារាំងលោកម៉ាក្រុងបានបន្តដំណើរទៅកាន់ប្រទេសបង់ក្លាដែសនាយប់ថ្ងៃអាទិត្យ ទី១០ កញ្ញា។ កម្មវត្ថុរបស់លោកម៉ាក្រុងគឺដើម្បីបើកទំព័រថ្មីនៅក្នុងទំនាក់ទំនងជាមួយបង់ក្លាដែស និងដើម្បីពង្រឹងយុទ្ធសាស្រ្តរបស់បារាំងនៅឥណ្ឌូប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:២៩
ជម្រើសរបស់ប្រធានាធិបតីបារាំងលោកម៉ាក្រុងទៅកាន់ប្រទេសបង់ក្លាដែសបានធ្វើឡើងចំពេលដែលប្រទេសនៅអាស៊ីខាងត្បូងមួយនេះរកឃើញឡើងវិញបន្តិចម្តងៗនូវកន្លែងរបស់ខ្លួននៅលើឆាកអន្តរជាតិ។ នៅក្នុងអំឡុងពេលទទួលទានអាហារពេលល្ងាចជាផ្លូវការជាមួយនាយករដ្ឋមន្ត្រីបង់ក្លាដែសលោកស្រីឆេក ហាស៊ីណាក្នុងក្រុងដាកា លោកម៉ាក្រុងបានកោតសរសើរពីជោគជ័យដ៏អស្ចារ្យរបស់ប្រទេសបង់ក្លាដែសដែលបានកសាងឡើងដោយផ្អែកលើគោលការណ៍ប្រជាធិបតេយ្យ និងនីតិរដ្ឋ។
លោកម៉ាក្រុងបានសន្យានៅចំពោះមុខលោកស្រីឆេក ហាស៊ីណាថា បារាំងនឹងស្ថិតនៅជាមួយបង់ក្លាដែសនាពេលអនាគត ពិសេសជួយបង់ក្លាដែសឲ្យសម្របខ្លួនទៅនឹងការឡើងកម្តៅលើភពផែនដី។ តែបើតាមមើលទៅ នេះគ្រាន់ជាគោលដៅតូចមួយប៉ុណ្ណោះ ព្រោះអ្វីដែលលោកម៉ាក្រុងចង់បានតាមរយៈទស្សនកិច្ចនៅបង់ក្លាដែសពេលនេះ គឺពង្រឹងយុទ្ធសាស្រ្តរបស់បារាំងនៅតំបន់ឥណ្ឌូប៉ាស៊ីហ្វិកដែលកំពុងស្គាល់កំណើនតានតឹង និងការប្រជែងគ្នាខ្លាំងរវាងអាមេរិក និងប្រទេសចិន។
« នៅក្នុងតំបន់មួយដែលបានប្រឈមនឹងចក្រពត្តិនិយមថ្មី យើងចង់ស្នើផ្លូវទី៣ ដោយគ្មានឆន្ទៈចង់បំភិតបំភ័យដៃគូរបស់យើង ឬមួយក៏ចង់នាំពួកគេឲ្យចូលទៅក្នុងផែនការមួយដែលគ្មាននិរន្តរភាព » នេះជាការថ្លែងរបស់លោកម៉ាក្រុង។ ទោះបីជាលោកម៉ាក្រុងមិនបាននិយាយចំឈ្មោះប្រទេសណាក៏ដោយក៏គេដឹងថាលោកចង់និយាយសំដៅលើចិនដែលបានប្រើជំនួយជាការទូតបំណុលសម្រាប់ប្រទេសក្រីក្រ ដូចយ៉ាងបង់ក្លាដែស។
ជាការឆ្លើយតបវិញ លោកស្រីឆេក ហាស៊ីណាបានសាទរលើការលើកឡើងរបស់លោកម៉ាក្រុងដែលស្របគ្នានឹងគោលនយោបាយការបរទេសរបស់បង់ក្លាដែស។ តាមវិមានប្រធានាធិបតីបារាំងអេលីហ្សេ វត្តមានរបស់លោកម៉ាក្រុងនៅបង់ក្លាដែសជាឱកាសដើម្បីពង្រឹងទំនាក់ទំនងទ្វេភាគី ខណៈដែលបង់ក្លាដែសកំពុងស្គាល់ការអភិវឌ្ឍន៍សេដ្ឋកិច្ចឆាប់រហ័ស និងកំពុងស្វែងរកដៃគូពីគ្រប់ទីសទី។ លោកម៉ាក្រុងបានថ្លែងក្នុងថ្ងៃចន្ទ ទី១១ កញ្ញាថា បង់ក្លាដែសសន្យាទិញយន្តហោះ Airbus ប្រភេទ A350 ចំនួន ១០គ្រឿងក្នុងតម្លៃសរុបជាង ៣ ២០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ