រញ្ជួយដីនៅតួកគី៖ អ.ស.ប. បានទទួលប្រាក់ជំនួយចំនួន១ភាគ៤ ក្នុងប្រតិបត្តិការមនុស្សធម៌
គ្រោះរញ្ជួយដីកាលពីថ្ងៃទី៦កុម្ភៈ បានប៉ះពាល់ដោយផ្ទាល់ទៅលើប្រជាជនតួកគីប្រមាណ៩លាននាក់។ អង្គការសហប្រជាជាតិបានអំពាវនាវ ប្រមូលប្រាក់វិភាគទានចំនួន១ពាន់លានដុល្លារ ដើម្បីជួយយកអាសារជនរងគ្រោះ ដែលកំពុងរស់នៅ ក្នុងស្ថានភាពលំបាកយ៉ាងខ្លាំង។ គិតត្រឹមពេលនេះ អង្គការសហប្រជាជាតិ បានទទួលប្រាក់ចំនួន ប្រមាណ១ភាគ៤ហើយ ដែលស្មើនឹង ២៦៨លានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
យោងតាមអ្នកនាំពាក្យការិយាល័យសម្របសម្រួលកិច្ចការមនុស្សធម៌ នៃអង្គការសហប្រជាជាតិ លោក Jens Laerke គឺគិតត្រឹមពេលនេះ អង្គការសហប្រជាជាតិបានទទួលប្រាក់ជំនួយ ចំនួន២៦៨លានដុល្លារ។ ក្នុងចំណោមអ្នកដែលបានផ្តល់ប្រាក់វិភាគទាននេះច្រើនជាងគេ គឺមាន សហរដ្ឋអាមេរិក កូវ៉េត សហភាពអឺរ៉ុប អារ៉ាប៊ីសាអូឌីត និងប្រាក់បានមកពីមូនិធិសង្គ្រោះបន្ទាន់នៃអង្គការសហប្រជាជាតិ។
អ្នកនាំពាក្យនេះអះអាងថា ប្រតិបត្តិការជួយសង្គ្រោះដំណាក់កាលទី១ បានចប់សព្វគ្រប់ហើយ ដោយក្រុមជំនាញមនុស្សធម៌នៃអង្គការសហប្រជាជាតិ បានបើកប្រតិបត្តិការរុករកអ្នករស់រានមានជីវិត និងផ្តល់ជំនួយសង្គ្រោះបន្ទាន់ ដល់ជនរងគ្រោះដោយការរញ្ជួយដីនៅតួកគី។ ក្រុមការងារកំពុងតែបោះជំហាន ឈានចូលដល់ដំណាក់កាលបន្ទាប់ ដែលជាដំណាក់ការផ្តល់ជំនួយមនុស្សធម៌បន្ទាន់ ដល់ប្រជាជនរងគ្រោះដែលបាត់បង់ការងារនឹងជម្រក។
គួរបញ្ជាក់ថា យោងតាមតួលេខអង្គការសហប្រជាជាតិ គ្រោះរញ្ជួយដីកាលពីថ្ងៃទី៦កុម្ភៈ បានបណ្តាលឲ្យស្លាប់មនុស្សប្រមាណ៥៥០០០នាក់ និងបានប៉ះពាល់ដោយផ្ទាល់ ដល់ប្រជាជនតួកគីប្រមាណ៩លាននាក់ ក្នុងនោះយ៉ាងហោច៣លាននាក់ ត្រូវក្លាយជាជនភៀសខ្លួន។ ក្រុមការងារមនុស្សធម៌នៃអង្គការសហប្រជាជាតិ បានបើកប្រតិបត្តិការជួយផ្តល់ជាជំនួយសម្ភាៈប្រើប្រាស់ សម្ភារៈធ្វើជម្រកបណ្តោះអាសន្ន ចំណីអាហារ និងថ្នាំសង្កូវ ដល់មនុស្សប្រមាណជាង៤លាននាក់។
យោងតាមអង្គការ FAO ហេដ្ឋារចនាសម្ព័ន្ធកសិកម្ម ទីតាំងស្តុកទិន្នផលដំណាំ ដីចំការ ទីទាំងកសិដ្ឋានចិញ្ចឹមសត្វ និងការនេសាទជាដើម ត្រូវបានខូចខាតយ៉ាងដំណំ។ ២០%នៃផលិតផលកសិកម្មរបស់តួកគី ត្រូវបានខូចខាតដោយសារតែគ្រោះមហន្តរាយនេះ ដែលគិតជាទឹកប្រាក់ខូចខាតសរុប មានទំហំប្រមាណ១៣០០លានដុល្លារ។ អង្គការ FAO បានអំពាវនាវរកប្រាក់ចំនួន ១១២លានដុល្លារ ដើម្បីជួយដល់តំបន់រងគ្រោះ តាមរយៈការផ្តល់ពូជតំណាំ ពូជសត្វចិញ្ចឹម និងសម្ភារៈកសិកម្មចាំបាច់នានា ដល់ប្រជាកសិករ។
គួរបញ្ជាក់ដែរថា ក្រៅពីគម្រោងថវិកាជួយផ្នែកមនុស្សធម៌ ដែលអង្គការសហប្រជាជាតិបានអំពាវនាវចំនួន១ពាន់លានដុល្លារ សហភាពអឺរ៉ុបបានប្រកាសកាលពីថ្ងៃទី២០មីនា សន្យាចំណាយចំនួន១ពាន់លានអឺរ៉ូ ដើម្បីជួយសាងសង់តួកគី ដែលជាជំហានបន្ទាប់នៃប្រតិបត្តិការមនុស្សធម៌។ ដោយឡែក សម្រាប់ជនរងគ្រោះដោយគ្រោះរញ្ជួយដីនេះនៅស៊ីរីវិញ អង្គការសហប្រជាជនបានអំពាវនាវរកថវិកាចំនួន ៤០០លានដុល្លារ សម្រាប់ចំណាយរយៈពេល៣ខែ ជួយដល់ជនរងគ្រោះស៊ីរីចំនួនប្រមាណ៥លាននាក់។ គិតត្រឹមពេលនេះ អង្គការសហប្រជាជាតិបានទទួលប្រាក់ ចំនួន៩២%ហើយ ដែលភាគច្រើន បានមកពីអាល្លឺម៉ង់ សហរដ្ឋអាមេរិក កូវ៉េត អារ៉ាប៊ីសាអូឌីត និងស៊ុយអែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ