គ្រោះរញ្ជួយដី៖ អង្គការសហប្រជាជាតិអំពាវនាវរកថវិកា ១ពាន់លានដុល្លារសម្រាប់ជួយតួកគី និងស៊ីរី
នៅចំពោះមុខគ្រោះមហន្តរាយធម្មជាតិ គ្រោះរញ្ជួយដី ដែលបានសម្លាប់មនុស្សយ៉ាងតិច ៤ម៉ឺននាក់ នៅប្រទេសតួកគី និងនៅស៊ីរី អគ្គលេខាធិការអង្គការសហប្រជាជាតិបានអំពាវនាវស្វែងរកថវិកា ១ពាន់លានដុល្លារដើម្បីជួយប្រជាជនរងគ្រោះ ដោយសារការរញ្ជួយដី។ នៅតួកគី និងស៊ីរី ប្រតិបត្តិការស្វែងរកជនរងគ្រោះ ដោយសារនៅតែបន្ត ប៉ុន្តែ ក្តីសង្ឃឹមរកឃើញអ្នកមានជីវិត នៅក្រោមគំនរអគារថ្មបាក់បែក នៅ១១ថ្ងៃក្រោយ គ្រោះរញ្ជួយដី មានកាន់តែតិចតួច។ តាមប្រភពមន្រ្តីសុខាភិបាលរបស់តួកគីនិងស៊ីរី ជនរងគ្រោះស្លាប់ដោយសារគ្រោះរញ្ជួយដី បានសម្លាប់មនុស្ស ៤១ ៧៣២នាក់ ដែលនៅក្នុងនោះ ៣៨ ០៤៤នាក់ ជាប្រជាជនតួកគី និង៣៦៨៨នាក់ ស្ថិតក្នុងប្រទេសស៊ីរី។
ចុះផ្សាយនៅថ្ងៃ៖
ស្តាប់ - ០១:៤៤
នៅក្នុងសេចក្តីថ្លែងការណ៍ កាលពីថ្ងៃព្រហស្បតិ៍ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គូទែរស៍ អំពាវនាវស្វែងរកថវិកា១ពាន់លានដុល្លារ សម្រាប់ជួយប្រជាជនរងគ្រោះដោយសារការរញ្ជួយដី នៅក្នុងប្រទេសតួកគី និងស៊ីរី។
សម្រាប់ប្រមុខអង្គការសហប្រជាជាតិ ថវិកាជំនួយ ១ពាន់លានដុល្លារ អាចជួយមនុស្សជាង ៥លាននាក់ និងអនុញ្ញាតឲ្យអង្គការមនុស្សធម៌អាចផ្តល់ជំនួយគាំទ្រសកម្មភាពរបស់រដ្ឋាភិបាលរដ្ឋាភិបាល តួកគី សម្រាប់រយៈពេល ៣ខែ។
នៅចំពោះមុខគ្រោះរញ្ជួយដីដ៏មហន្តរាយប្រចាំសតវត្សរ៍ ដែលបានសម្លាប់ជីវិតមនុស្សជាង ៤ម៉ឺននាក់ និងបង្កការខូចខាត រំលំបំផ្លាញអគារបាក់រាបដល់ដី នៅតួកគី និងស៊ីរី អគ្គលេខាធិការអង្គការសហប្រជាជាតិបានអំពាវនាវសុំឲ្យសហគមន៍អន្តរជាតិមានសាមគ្គីភាព និងចិត្តសុប្បរស ជួយតួកគី។
តួកគីដែលធ្លាប់តែជាប្រទេសមានសណ្តានចិត្តល្អ ធ្លាប់ជួយយកអាសារផ្តល់ជំរកដល់ប្រជាជនភៀសខ្លួនស៊ីរី ច្រើនជាងគេ នៅក្នុងពិភពលោក។
សង្រ្គាមស៊ីវិលដែលផ្ទុះឡើងនៅស៊ីរី កាលពី១២ឆ្នាំមុន បានធ្វើឲ្យប្រជាជនស៊ីរីប្រមាណ ៤លាននាក់រត់ភៀសខ្លួនចេញពីប្រទេស ទៅជ្រកកោននៅតួកគី ប្រទេសជិតខាង។ នៅថ្ងៃសុក្រ នៅច្រកព្រំដែនតួកគី និងស៊ីរី គេសង្កេតឃើញលំហូរប្រជាជនភៀសខ្លួនស៊ីរី ដែលតម្រង់ជួរ ធ្វើដំណើរត្រលប់ចូលទឹកដីស៊ីរី។
តាមអង្គការសហប្រជាជាតិ ខេត្តចំនួន១១របស់តួកគី ដែលរងការបំផ្លិចបំផ្លាញដោយសារគ្រោះរញ្ជួយដី កម្រិត ៧,៨មាត្រដ្ឋានរិចទែរ កាលពីថ្ងៃទី ៦កុម្ភៈ ធ្លាប់ជាកន្លែងជ្រកកោនរបស់ជនភៀសខ្លួនប្រមាណ ១លាន ៧សែននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ