អ៊ីរ៉ាក់-អ៊ីរ៉ង់ ចុះកិច្ចព្រមព្រៀងការពារគ្នានៅព្រំដែន
ថ្ងៃអាទិត្យ ទី១៩មីនា អ៊ីរ៉ាក់ និង អ៊ីរ៉ង់ បានសម្រេចចុះកិច្ចព្រមព្រៀងការពារគ្នាទៅវិញទៅមកនៅតាមបន្ទាត់ព្រំដែន។ ព្រំដែនរវាងអ៊ីរ៉ាក់-អ៊ីរ៉ង់ ដែលជាមូលដ្ឋានមានជ្រកកោន របស់ពួកជនជាតិគួក សត្រូវរបស់អ៊ីរ៉ង់។ កិច្ចព្រមព្រៀងថ្មី ជាប្រវត្តិសាស្ត្រនេះ បានចុះហត្ថលេខា នៅរដ្ឋធានីបាកដាដ (Bagdad)។ នេះបើតាមការប្រកាសរបស់ការិយាល័យនាយករដ្ឋមន្ត្រីអ៊ីរ៉ាក់។
ចុះផ្សាយនៅថ្ងៃ៖
ស្តាប់ - ០២:០២
កិច្ចព្រមព្រៀងថ្មីនេះ គឺមានចែងពីកិច្ចសហការរួមគ្នាដើម្បីការពារសុវត្ថិភាពតាមព្រំដែន ហើយនិងជួយសម្របសម្រួលគ្នាទៅលើទិដ្ឋភាពសន្តិសុខ។ នេះបើតាមព័ត៌មានផ្លូវការពីភាគីអ៊ីរ៉ាក់ ដែលឲ្យដឹងដែរថា អ្នកតំណាងក្នុងពិធីចុះហត្ថលេខា គឺ មន្ត្រីជាន់ខ្ពស់នៃឧត្តមក្រុមប្រឹក្សាសន្តិសុខអ៊ីរ៉ង់ លោក Ali Shamkhani និងសមភាគី Qassem al-Arji ទីប្រឹក្សាសន្តិសុខជាតិអ៊ីរ៉ាក់។
អ៊ីរ៉ាក់ និង អ៊ីរ៉ង់ គឺជាអតីតបងប្អូនគូសត្រូវ ពិសេសនៅពេលដែល អ៊ីរ៉ាក់ នៅឋិតក្រោមឥទ្ធិពលខ្សែញាក់របស់សហរដ្ឋអាមេរិក ដ្បិតចំពោះអ៊ីរ៉ង់ សហរដ្ឋអាមេរិក ជាគូសត្រូវសួពូជ ចាប់តាំងពីបដិវត្តន៍អ៊ីស្លាម១៩៧៩។ អាស្រ័យហេតុដូច្នេះ ការយល់ព្រមចុះកិច្ចសន្យាការពារគ្នានេះ គឺបង្ហាញឲ្យឃើញរឹងរឹតតែច្បាស់ពីការខិតទៅរកគ្នាកាន់តែកៀក រវាងរដ្ឋាបាលទីក្រុងបាកដាដ និងរដ្ឋបាលក្រុងតេហេរ៉ង់។ ការរឹងចំណងសុវត្ថិភាពរួមគ្នានេះ ក៏មិនចម្លែកដែរ ព្រោះវាធ្លាក់មក ជួនចាំពេលដែល រដ្ឋបាលក្រុងបាកដាដ ត្រូវប្រារព្ធខួប ២០ ឆ្នាំ នៃសង្គ្រាមឈ្លានពានរបស់សហរដ្ឋអាមេរិក នៅអ៊ីរ៉ាក់។
ផលប្រយោជន៍ចំពោះអ៊ីរ៉ាក់ គឺអ៊ីរ៉ាក់រំពឹងបានចំណេញខាងសេដ្ឋកិច្ច-ពាណិជ្ជកម្ម។ ដ្បិតថាក្នុងដំណើរចុះហត្ថលេខាសហការតាមព្រំដែនលើកនេះ គឺថ្នាក់ដឹកនាំអ៊ីរ៉ង់ បាននាំយកអ្នកតំណាងក្រុមហ៊ុនឯកជន អគ្គទេសាភិបាលធនាគារជាតិ និង អនុរដ្ឋមន្ត្រីក្រសួងសេដ្ឋកិច្ច អមដំណើរទៅជាមួយផង។ អ៊ីរ៉ាក់ សព្វថ្ងៃ ពឹងផ្អែកច្រើនប្រភពថាមពល ឧស្ម័ន និងអគ្គិសនីពីប្រទេសជិតខាង។
ចំណែកផលចំណេញសម្រាប់អ៊ីរ៉ង់វិញ គឺអ៊ីរ៉ង់មានឱកាសនិងមធ្យោបាយកាន់តែច្រើន ដើម្បីតាមកម្ទេចក្រុមប្រឆាំងអំណាចអ៊ីរ៉ង់ គឺពួកជនជាតិគួដ ដែលរស់នៅជ្រកកោនតាមព្រំដែនប៉ែកខាងអ៊ីរ៉ាក់។ ជនជាតិនេះធ្លាប់បម្រើកិច្ចការច្រើនឲ្យសហរដ្ឋអាមេរិក នៅក្នុងសង្គ្រាមអ៊ីរ៉ាក់។ ម្យ៉ាងទៀត បាតុកម្មប្រឆាំងនៅក្នុងប្រទេសអ៊ីរ៉ង់ ដែលអូសបន្លាយជាច្រើនខែមកនេះ គឺដើមហេតុព្រោះតែមរណភាពនាង ម៉ាស្ហា អាមីនី វ័យ២២ឆ្នាំ ជាអ៊ីរ៉ង់ដើមកំណើតគួដ នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ