ម៉ាឡេស៊ី៖អតីតនាយករដ្ឋមន្រ្តីត្រូវបានឃាត់ខ្លួនភ្លាមៗនៅក្រោយការសួរនាំពីអង្គភាពប្រឆាំងអំពើពុករលួយ
នៅក្នុងប្រទេសម៉ាឡេស៊ី អតីតនាយករដ្ឋមន្រ្តីលោកមូយីដឌីន យ៉ាស៊ីនត្រូវបានចាប់ខ្លួនភ្លាមៗនាថ្ងៃព្រហស្បតិ៍ ទី៩ មីនាក្រោយពីការសួរនាំរបស់អង្គភាពប្រឆាំងអំពើពុករលួយហៅកាត់ MACC។ សំណុំរឿងដែល MACC បានចោទសួរលោកមូយីដឌីន យ៉ាស៊ីន គឺទាក់ទងនឹងការកេងបន្លំថវិការដ្ឋដែលសម្រាប់ចាយវាយប្រយុទ្ធប្រឆាំងនឹងជំងឺកូវីដ១៩។ តែ MACC មិនភ្លេចបញ្ជាក់ថា អតីតនាយករដ្ឋមន្រ្តីរូបនេះអាចនឹងរងបទចោទប្រកាន់ច្រើនទៀតក្នុងថ្ងៃសុក្រ ទី១០ មីនានេះ។ យ៉ាងណាក៏ដោយ ក្រុមសកម្មជនគាំទ្រលោកមូយីដឌីន យ៉ាស៊ីនបានចាត់ទុកចំណាត់ការរបស់ MACC ថាមានលក្ខណៈនយោបាយ។
ចុះផ្សាយនៅថ្ងៃ៖
ស្តាប់ - ០២:២៨
មានអាយុ ៧៥ឆ្នាំ លោកមូយីដឌីន យ៉ាស៊ីនធា្លប់បានអង្គុយកៅអីនាយករដ្ឋមន្រ្តីរយៈពេល ១៧ខែនៅចន្លោះឆ្នាំ ២០២០ និងឆ្នាំ ២០២១ ពោលក្នុងពេលដែលម៉ាឡេស៊ីបានរងការវាយប្រហារពេញទំហឹងដោយកូវីដ១៩។ បច្ចុប្បន្ន លោកមូយីដឌីន យ៉ាស៊ីនជាប្រធានគណបក្សជនជាតិភាគតិចម៉ាឡេស៊ីហៅកាត់ Bersatu ដែលជាគណបក្សប្រឆាំង។ តាមអង្គភាពប្រឆាំងអំពើពុករលួយហៅកាត់ MACC លោកមូយីដឌីនត្រូវបានសួរនៅក្នុងក្របខណ្ឌនៃការស៊ើបអង្កេតទាក់ទងនឹងវិធានការផ្តល់សន្ទុះសេដ្ឋកិច្ចនៅក្រោយកូវីដ១៩ ដែលលោកបានសម្រេចក្នុងនាមជានាយករដ្ឋមន្រ្តីពេលនោះ រួមទាំងរឿងរ៉ាវពាក់ព័ន្ធផ្សេងទៀត។
នៅពេលទៅដល់ទីស្នាក់ការ MACC លោកមូយីដឌីនមិនបានថ្លែងអ្វីទាំងអស់។ តែក្រុមអ្នកគាំទ្រលោកប្រមាណជា ១០០នាក់នៅពីមុខ MACC បានថ្លែងថា ការកោះហៅលោកមូយីដឌីនទៅសួរនាំជាទង្វើយាយីផ្លូវនយោបាយ ដើម្បីបំបាក់មុខមាត់ប្រធានគណបក្ស Bersatu និងក៏ដើម្បីបំផ្លិចបំផ្លាញប្រជាប្រិយភាពរបស់គណបក្សក្នុងចំណោមអ្នកបោះឆ្នោតវ័យក្មេងដែរ។ គួរបញ្ជាក់ថា នៅប៉ុន្មានសប្តាហ៍មុនការចាប់ខ្លួនលោកមូយីដឌីន MACC បានបើកការស៊ើបអង្កេតស្តីពីការសង្ស័យកេងបន្លំថវិកាពាក់ព័ន្ធនឹងកូវីដ១៩ ដោយគណបក្ស Bersatu ដែលលោកមូយីដឌីនជាប្រធាន។
ការស៊ើបអង្កេតកាលណោះបានឈានដល់ការបង្កកលុយនៅធនាគាររបស់គណបក្ស Bersatu និងការផ្តន្ទាទោសអ្នកទទួលខុសត្រូវគណបក្សចំនួន ២នាក់ពីបទពុករលួយដែលជាប់ជំពាក់វាក់វិននឹងវិធានការផ្តល់សន្ទុះសេដ្ឋកិច្ចនៅក្រោយកូវីដ១៩ របស់លោកមូយីដឌីន។ តែលោកមូយីដឌីនធា្លប់បានច្រានចោលទាំងអស់ ហើយក្រុមសកម្មជនរបស់លោកបានបញ្ជាក់ថា ការស៊ើបអង្កេតរបស់ MACC មានគោលដៅបំផ្លាញកិត្តិយសគណបក្ស Bersatu នៅមុនការបោះឆ្នោតសភានាខែកក្កដាខាងមុខ។ គួររម្លឹកថានៅម៉ាឡេស៊ី នេះមិនមែនជាលើកទី១ ទេដែលមានអតីតនាយករដ្ឋមន្រ្តីម្នាក់ជាប់ជំពាក់វាក់វិននឹងរឿងពុករលួយ។
នៅមុនលោកមូយីដឌីន យ៉ាស៊ីន គឺលោកណាជីប រ៉ាហ្សាក់ដែលត្រូវបានតុលាការកាត់ទោសឲ្យជាប់ពន្ធនាគារចំនួន ១២ឆ្នាំ។ តែគេនៅមិនទាន់ដឹងពីជោគវាសនារបស់លោកមូយីដឌីន យ៉ាស៊ីននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ