ម៉ាឡេស៊ី៖ប្រធានអង្គភាពប្រឆាំងអំពើពុករលួយជាប់សង្ស័យក្នុងរឿងអាស្រូវពុករលួយ
ចុះផ្សាយនៅថ្ងៃ៖
ស្តាប់ - ០៥:២៤
នៅក្នុងប្រទេសម៉ាឡេស៊ី លោកអាហ្សាំ បាគី ប្រធានអង្គភាពប្រឆាំងអំពើពុករលួយបានជាប់សង្ស័យក្នុងរឿងអាស្រូវពុករលួយ។ លោកបានជាប់សង្ស័យក្នុងបទបានទិញភាគហ៊ុនដែលមានទឹកប្រាក់ជាង ២០០ ០០០អឺរ៉ូ។ តែពេលនេះ មេអង្គភាពប្រឆាំងអំពើពុករលួយដ៏មានឥទ្ធិពលរូបនេះហាក់មិនបារម្ភពីការស៊ើបអង្កេតរបស់តុលាការនៅឡើយទេ។ ទោះជាយ៉ាងនេះក្តី មានមនុស្សប្រមាណជា ២០០នាក់បានចុះផ្លូវធ្វើបាតុកម្មក្នុងទីក្រុងគូឡាឡាំពួរកាលពីថ្ងៃសៅរ៍ ទី២២ មករាដើម្បីទាមទារឲ្យលោកបាគីចុះចេញពីតំណែង។ គួរបញ្ជាក់ថានៅម៉ាឡេស៊ី អំពើពុករលួយជាប្រធានបទរសើបខ្លាំងណាស់។
តើវាជារឿងចម្លែក និងគួរឲ្យជឿដែរឬទេដែលមេអង្គភាពប្រឆាំងអំពើពុករលួយជាអ្នកដែលបានប្រព្រឹត្តិអំពើពុករលួយខ្លួនឯងនោះ?។ នៅប្រទេសណាមិនដឹងទេ តែរឿងរ៉ាវមួយនេះកំពុងកើតមាននៅក្នុងប្រទេសម៉ាឡេស៊ី។ ប្រធានអង្គភាពប្រឆាំងអំពើពុករលួយលោកអាហ្សាំ បាគីបានជាប់សង្ស័យពីបទបានទិញភាគហ៊ុនលើសចំនួនកំណត់ដែលច្បាប់បានអនុញ្ញាតសម្រាប់មន្ត្រីរាជការ។ បើគិតជាទឹកប្រាក់ លោកបាគីបានចំណាយជាង ២០០ ០០០អឺរ៉ូ។ ដើម្បីអាចយល់ពីរឿងអាស្រូវពាក់ព័ន្ធនឹងមេអង្គភាពប្រឆាំងអំពើពុករលួយលោកអាហ្សាំ បាគីបាន គេត្រូវត្រឡប់ក្រោយទៅមើលព្រឹត្តិការណ៍កាលពីប៉ុន្មានសប្តាហ៍មុនបន្តិច។
អ្វីៗបានផ្តើមចេញពីការស៊ើបអង្កេតរបស់ស្រ្តីអ្នកកាសែតឯករាជ្យម្នាក់ឈ្មោះឡាលីថា គូណារ៉ាណាមស្តីពីទិន្នន័យហិរញ្ញវត្ថុសាធារណៈ។ កម្មវត្ថុនៃការស៊ើបអង្កេតរបស់ស្រ្តីអ្នកកាសែតឯករាជ្យរូបនេះដើម្បីចង់ដឹងថា តើអាចមានអំពើពុករលួយជាប់ពាក់ព័ន្ធនឹងអង្គភាពប្រឆាំងអំពើពុករលួយដែលមានលោកអាហ្សាំ បាគីជាប្រធានដែរ ឬទេ។ នេះហើយជាចំណុចចាប់ផ្តើមនៃរឿងដ៏គួរឲ្យភ្ញាក់ផ្អើលដែលបានបែកខ្ចរខ្ចាយនៅពេលនេះ។ បែកខ្ចរខ្ចាយដោយសារតែគេហទំព័រដែលបានផ្សព្វផ្សាយការស៊ើបអង្កេតរបស់ស្រ្តីអ្នកកាសែតបានប្រកាសឲ្យដឹងថា ខ្លួនបានរងការវាយប្រហារតាមអ៊ីនធ័រនែតទាក់ទងនឹងការស៊ើបអង្កេតនោះ។
ចំណែកប្រធានអង្គភាពប្រឆាំងអំពើពុករលួយលោកអាហ្សាំ បាគីបានចេញមុខដាក់ពាក្យប្តឹងពីបទប្រហារកេរ្តិ៍ដោយបានទាមទារសំណងជំងឺចិត្តជាលុយចំនួន ២លានអឺរ៉ូពីស្រ្តីអ្នកកាសែតលោកស្រីឡាលីថា គូណារ៉ាណាម។ នៅចំពោះមុខអ្នកកាសែត លោកបាគីបានចេញមុខការពារខ្លួនដែលគ្រប់គ្នាមិនបានរង់ចាំដោយធានាថា ភាគហ៊ុនដែលបានទិញដោយប្រើឈ្មោះលោក និងគណនីរបស់លោកមិនមែនជារបស់លោកទេ តែជារបស់បងប្រុសលោក។ តែបញ្ហានៅត្រង់ថា ការលើកឡើងរបស់លោកបាគីយ៉ាងដូចនេះហាក់មិនសមហេតុផល និងពិបាកទទួលយកណាស់ ព្រោះថា ការប្រើគណនីធនាគារមួយដែលលោកបាគីមិនមែនជាម្ចាស់ត្រូវបានហាមឃាត់។
ទោះជាយ៉ាងនេះក្តីនៅប៉ុន្មានថ្ងៃក្រោយមក ស្រាប់តែស្ថាប័នឃ្លំាមើលការទិញ ដូរភាគហ៊ុនបានចេញមុខការពារលោកបាគីដោយបញ្ជាក់ថា លោកបាគីមិនបានរំលោភលើការហាមឃាត់នោះទេ និងថា លោកបាគីពិតជា និងបន្តជាម្ចាស់គណនីធនាគារនោះមែន។ ដោយមិនបង្អង់យូរ លោកបាគីបានថ្លែងអរគុណស្ថាប័នឃ្លំាមើលការទិញ ដូរភាគហ៊ុនដោយបន្ថែមថា ការបញ្ជាក់របស់ស្ថាប័នមួយនេះជាសក្ខីកម្មបញ្ជាក់ពីការដែលលោកមិនបានប្រព្រឹត្តបទឧក្រិដ្ឋណាមួយទេ។ សំណួរ តើការពិតនៅត្រង់ណាទៅ?។ គេនៅមិនទាន់មានចម្លើយចំពោះសំណួរនេះទេនៅពេលនេះ។
សម្រាប់លោកបាគី ការអះអាងរបស់ស្ថាប័នឃ្លំាមើលការទិញ ដូរភាគហ៊ុនហាក់បានធ្វើឲ្យលោករួចខ្លួន និងមិនបារម្ភខ្លាចពីការស៊ើបអង្កេតរបស់តុលាការទេ។ តែសម្រាប់ក្រុមអង្គការសង្គមស៊ីវិល និងក្រុមគណបក្សប្រឆាំងវិញ រឿងរ៉ាវរបស់ប្រធានអង្គភាពប្រឆាំងអំពើពុករលួយរូបនេះទើបនឹងចាប់ផ្តើមប៉ុណ្ណោះ។ ជាក់ស្តែងក្នុងថ្ងៃសៅរ៍ ទី២២ មករា អង្គការក្រៅរដ្ឋាភិបាល និងអង្គការនយោបាយចំនួន ៣៣អង្គការបានចូលរួមគាំទ្របាតុកម្មទាមទារឲ្យលោកបាគីចុះចេញពីតំណែង។ គួរបញ្ជាក់ថានៅក្នុងប្រទេសម៉ាឡេស៊ី រឿងអាស្រូវពុករលួយជារឿងរសើបខ្លាំងណាស់ ពិសេសតាំងពីក្រោយផ្ទុះរឿងអាស្រូវពុករលួយទាក់ទងនឹងមូលនិធិ 1MDB ដែលបានឈានទៅទម្លាក់នាយករដ្ឋមន្រ្តីលោកណាជីព រ៉ាហ្សាក់ក្នុងឆ្នាំ ២០១៨។
គួររម្លឹកថា រឿងអាស្រូវមូលនិធិ 1MDB របស់ម៉ាឡេស៊ីនេះត្រូវបានគេចាត់ទុកជារឿងអាស្រូវហិរញ្ញវត្ថុដ៏ធំជាងគេក្នុងលោក។ ពីដំបូងឡើយ មូលនិធិ 1MDB ដែលបង្កើតឡើងដោយរដ្ឋាភិបាលរបស់លោក ណាជីព រ៉ាហ្សាក់មានគោលដៅអភិវឌ្ឍន៍សេដ្ឋកិច្ចម៉ាឡេស៊ី។ តែមានលុយចំនួន ៤ ៥០០លានអឺរ៉ូត្រូវបានលួចបង្វែរចេញពីមូលនិធិមួយនេះ។ ក្រោយការធ្លាក់ពីតំណែង តុលាការបានកាត់ទោសលោកណាជីព រ៉ាហ្សាក់ឲ្យជាប់ក្នុងពន្ធនាគារចំនួន ១២ឆ្នាំ និងផាកពិន័យជាលុយចំនួន ៤៤លានអឺរ៉ូក្នុងបទពុករលួយ លាងលុយកខ្វក់ និងរំលោភអំណាច។ តែលោករ៉ាហ្សាក់កំពុងបន្តត តាំងនឹងសាលក្រមមួយនេះ។ គេបានសង្កេតឃើញថា នៅក្រោយមហារឿងអាស្រូវ 1MDB ទំនុកចិត្តរវាងរដ្ឋាភិបាល និងប្រជាជនហាក់ឃ្លាតឆ្ងាយ និងបន្តផុយស្រួយ។
ប្រជាជនមានការជឿទុកចិត្តលើក្រុមអង្គការក្រៅរដ្ឋាភិបាលជាងរដ្ឋាភិបាលខ្លួនឯងក្នុងការរួមចំណែកជួយសង្គម។ ជាក់ស្តែងនៅក្នុងគ្រោះទឹកជំនន់នាដំណាច់ឆ្នាំ ២០២១ កន្លងទៅ មានការចែកចាយលើបណ្តាញសង្គមនូវឃ្លាមួយថា « ចូរអស់លោកកុំឲ្យលុយទៅរដ្ឋាភិបាល »។ តាមរយៈឃ្លាមួយនេះនាំឲ្យគេយល់បានភ្លាមថា ប្រជាជនបារម្ភខ្លាចមន្រ្តីរាជការប្រើជំនួយរបស់ពួកគេដើម្បីប្រយោជន៍ផ្ទាល់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ