បក្សប្រឆាំងបង់ក្លាដែសធ្វើបាតុកម្មទាមទារឱ្យនាយករដ្ឋមន្ត្រីចុះចេញពីតំណែង
ប្រឈមនឹងការឡើងថ្លៃនៃទំនិញ ហ្វូងមនុស្សបាននាំគ្នាចុះពេញក្រុងដាកា រដ្ឋធានីប្រទេសបង់ក្លាដែស ដើម្បីបញ្ចេញកំហឹងនិងទាមទារឱ្យនាយករដ្ឋមន្ត្រីចុះចេញពីតំណែង រួចរៀបចំការបោះឆ្នោតជាថ្មី។ ការប្រមូលផ្តុំធ្វើបាតុកម្មនេះ ផ្តួចផ្តើមឡើងដោយគណបក្សជាតិនិយមបង់ក្លាដែស និងសម្ព័ន្ធបក្សប្រឆាំងផ្សេងទៀត នៅរដ្ឋធានីផង និងនៅតាមក្រុងតូចធំចំនួន៩ផ្សេងទៀត។
ចុះផ្សាយនៅថ្ងៃ៖
ស្តាប់ - ០២:០៥
បើតាមអាជ្ញាធរបង់ក្លាដែស មានបាតុករប្រមាណ៥ម៉ឺននាក់ បានមកប្រមូលផ្តុំគ្នា នៅមុខទីស្នាក់ការគណបក្ស ស្តាប់លោក មៀរស្ហា អាបាស មេដឹកនាំជាន់ខ្ពស់គណបក្សជាតិនិយមបង់ក្លាដែស BNP ដែលទើបត្រូវបានរដ្ឋាភិបាលដោះលែងពីពន្ធនាគារ កាលពីថ្ងៃចន្ទទី ៩មករា២០២៣។ ប៉ុន្តែបើតាមអ្នកទទួលខុសត្រូវបក្សប្រឆាំងវិញ មានបាតុករដល់ទៅរាប់សិបម៉ឺននាក់បានចុះធ្វើបាតុកម្មនៅរដ្ឋធានីដាកា និងជាច្រើនសិបពាន់នាក់ផ្សេងទៀត នៅតាមក្រុងតូចធំនានាស្ទើរពេញផ្ទៃប្រទេស។
មានសកម្មជនបក្សជាតិនិយមបង់ក្លាដែសជាង៣០នាក់ត្រូវបានចាប់ខ្លួន។ នេះបើតាមនាងស្ហាម៉ា អូបាអេដ មេដឹកនាំចលនាបាតុកម្មរបស់គណបក្ស ដែលបន្ថែមថាមានសកម្មជនយ៉ាងហោចណាស់១០០នាក់ផ្សេងទៀតបានរងរបួស ដោយការវាយប្រហាររបស់សកម្មជនបក្សកាន់អំណាច ដូចជា គប់ជាតិផ្ទុះ វាយនឹងដំបង ឬគប់ដុំថ្ម។
កម្មវត្ថុនៃបាតុកម្ម គឺសម្តែងកំហឹងប្រឆាំងនឹងភាពគ្មានទំនួលខុសត្រូវរបស់រដ្ឋាភិបាល នៅចំពោះមុខវិបត្តិប្រាក់ចុះថោក អស់២៥% ទំនិញជាពិសេសស្បៀងអាហារ និងប្រេងឡើងថ្លៃខ្លាំង និងទាមទារឱ្យលោកស្រី នាយករដ្ឋមន្ត្រី ហាស៊ីណាចុះចេញពីតំណែង ដើម្បីទុកឱ្យរដ្ឋាភិបាលអព្យាក្រិត្យរៀបចំការបោះឆ្នោតថ្មី។ បង់ក្លាដែសស្ថិតក្នុងចង្កោមប្រទេសមានកំណើនសេដ្ឋកិច្ចខ្លាំងជាងគេមួយនៅអាស៊ី តែសង្គ្រាមរុស្ស៊ីចូលឈ្លានពានអ៊ុយក្រែន បានជំរុញឱ្យរដ្ឋាភិបាលផ្អាកការនាំចូលប្រេងម៉ាហ្សូតនិងហ្កាសពីរុស្ស៊ី ជាហេតុធ្វើឱ្យមានជនក្រីក្រកាន់តែច្រើនឡើងៗចាំទទួលអំណោយចែកចាយស្បៀងអាហារ និងការកាត់ផ្តាច់ភ្លើងរយៈពេលវែងខ្លាំង កាលពីឆ្នាំទៅ។
ក្រុមបស្ចិមលោក និងអង្គការសហប្រជាជាតិ បានសម្តែងការព្រួយបារម្ភដែរចំពោះស្ថានភាពនយោបាយបង់ក្លាដែសដែលបក្សរបស់លោកស្រី ហាស៊ីណា មានសំឡេងភាគច្រើននៅក្នុងសភា។ កាលពីខែធ្នូ ២០២១ អាមេរិកបានដាក់ទណ្ឌកម្មប្រឆាំងនឹងអង្គភាពប្រយុទ្ធប្រឆាំងនឹងភេរវកម្ម និងឧក្រិដ្ឋកម្មដៃឆើត ព្រមទាំងអ្នកទទួលខុសត្រូវផ្នែកសន្តិសុខ៧នាក់ ក្នុងនោះម្នាក់ជាមេប៉ូលិសជាតិផង ពីបទរំលោភសិទ្ធិមនុស្សយ៉ាងជ្រងោ។ រដ្ឋាភិបាលរបស់លោកស្រី ហាស៊ីណា បានបដិសេធថាមិនមែនជាដើមហេតុនាំឱ្យមានការបាត់ខ្លួនសកម្មភាពនិងប្រមុខបក្សប្រឆាំងទេ តែមានឧក្រិដ្ឋជនជាច្រើនបានស្លាប់ក្នុងបាញ់តតាំងជាមួយភ្នាក់ងាររដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ