ពាណិជ្ជកម្ម និងប្រាក់កម្ចីជាប្រធានបទសំខាន់នៃទស្សនកិច្ចរបស់នាយករដ្ឋមន្រ្តីបង់ក្លាដែសនៅឥណ្ឌា
នៅថ្ងៃអង្គារ ទី៦ កញ្ញា នាយករដ្ឋមន្រ្តីបង់ក្លាដែសលោកស្រីស្ហេក ហាស៊ីណាបានផ្តើមទស្សនកិច្ចរយៈពេល ៤ថ្ងៃនៅក្នុងប្រទេសឥណ្ឌា។ លោកស្រីត្រូវបានទទួលជួបដោយនាយករដ្ឋមន្រ្តីឥណ្ឌាលោកណារិនដ្រា ម៉ូឌីក្នុងទីក្រុងញូដែលី។ កិច្ចព្រមព្រៀងពាណិជ្ជកម្ម និងប្រាក់កម្ចីជាប្រធានបទសំខាន់នៃជំនួបរវាងមេដឹកនាំទាំងពីរ។ តែក៏មានសំណុំរឿងតានតឹងខ្លះដូចជាបញ្ហាជនភៀសខ្លួនរ៉ូហ៊ីងយ៉ា ឬមួយក៏បញ្ហាអ្នកកាន់សាសនាហ៊ីនឌូនៅបង់ក្លាដែស។
ចុះផ្សាយនៅថ្ងៃ៖
ស្តាប់ - ០២:០៤
សន្ធិសញ្ញាចុះហត្ថលេខាដោយបង់ក្លាដែស និងឥណ្ឌានាឱកាសដំណើរទស្សនកិច្ចរបស់នាយករដ្ឋមន្រ្តីបង់ក្លាដែសលោកស្រីស្ហេក ហាស៊ីណាក្នុងទីក្រុងញូដែលី គឺជាកិច្ចព្រមព្រៀងនៃការគុណមួយជាពីរនូវការដោះដូរពាណិជ្ជកម្មរវាងប្រទេសមិត្តទាំងពីរ។ នាយករដ្ឋមន្រ្តីឥណ្ឌាលោកណារិនដ្រា ម៉ូឌីបានរម្លឹកថា បង់ក្លាដែសជាដៃគូពាណិជ្ជកម្មដ៏ធំជាងគេរបស់ឥណ្ឌា។ ក្រៅពីចុះកិច្ចព្រមព្រៀងដើម្បីបង្កើនការដោះដូរពាណិជ្ជកម្មទ្វេដង ឥណ្ឌាអាចផ្តល់ប្រាក់កម្ចីឲ្យបង់ក្លាដែសចំនួនជិត ៩ ៥០០លានដុល្លារ។
គួររម្លឹកថានៅមុនផ្ទុះវិបត្តិកូវីដ១៩ បង់ក្លាដែសមានស្ថានភាពសុខភាពសេដ្ឋកិច្ចល្អ។ តែមិនខុសពីប្រទេសភាគច្រើនក្នុងលោកទេ សេដ្ឋកិច្ចបង់ក្លាដែសបានរងផលប៉ះពាល់ខ្លាំងដោយវិបត្តិកូវីដ១៩ ក្នុងរយៈពេល ២ឆ្នាំកន្លងទៅនេះ។ អ៊ីចឹងហើយបានជាមានការលើកឡើងដោយក្តីបារម្ភថា ការដែលបង់ក្លាដែសបានខ្ចីលុយពីប្រទេសផ្សេង ពិសេសពីឥណ្ឌាអាចនឹងធ្វើឲ្យបង់ក្លាដែសធ្លាក់ខ្លួនដូចប្រទេសស្រីលង្កាដែលកំពុងជំពាក់បំណុលបរទេសវ័ន ក ពិសេសប្រទេសចិនរហូតដល់ប្រគល់កំពង់ផែឲ្យក្រុមហ៊ុនចិនជាអ្នកកាន់កាប់។
តែនៅក្នុងបទសម្ភាសន៍ឲ្យទូរទស្សន៍ឥណ្ឌា លោកស្រីស្ហេក ហាស៊ីណាបានធានាថា បង់ក្លាដែសមិនមែនស្រីលង្កា ហើយបង់ក្លាដែសមានការប្រយ័ត្នប្រយែងក្នុងការចាយវាយដោយមិនខ្ជះខ្ជាយទេ។ ដោយឡែក មានរឿងរ៉ាវតានតឹងសំខាន់ចំនួនពីរដែលឥណ្ឌា និងបង់ក្លាដែសត្រូវពន្លឿនការដោះស្រាយរវាងគ្នា ទី១ រឿងជនភៀសខ្លួនរ៉ូហ៊ីងយ៉ាមកពីភូមាដែលបង់ក្លាដែសស្តីបន្ទោសឥណ្ឌាមិនព្រមជួយទទួលយកខ្លះ និងទី២ ការបែងចែងទឹកនៅតាមខ្សែព្រំដែន ពិសេសទឹកស្ទឹង Kushiyara។ ក្នុងរឿងបែងចែកទឹកនេះត្រូវបានលោកស្រីស្ហេក ហាស៊ីណាអះអាងថា មិនពិបាកដោះស្រាយទេ ព្រោះជាមួយប្រទេសមិត្ត គេអាចដោះស្រាយបានលើគ្រប់បញ្ហាទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ