កូរ៉េខាងជើងប្រកាសជោគជ័យលើការទប់ស្កាត់កូវីដ១៩ ហើយព្រមានសងសឹកកូរ៉េខាងត្បូង
នៅចំពោះមុខបុគ្គលិក ក្នុងពេលដឹកនាំជំនួបប្រជុំក្រុមបុគ្គលិកសុខាភិបាលនិងអ្នកវិទ្យាសាស្ត្រ នាថ្ងៃពុធទី ១០សីហា ម្សិលមិញ ប្រមុខដឹកនាំកូរ៉េខាងជើង លោក គីម ជុងអ៊ុន បានប្រកាសកោតសរសើរជោគជ័យ លើសង្គ្រាមប្រយុទ្ធប្រឆាំងនឹងជំងឺរាតត្បាតកូវីដ១៩។ ចំណែកលោកស្រី គីម យ៉ូជុង ជាប្អូនស្រី និងជាទីប្រឹក្សាដ៏មានឥទ្ធិពល បានចោទកូរ៉េខាងត្បូងជាអ្នកបង្កឲ្យមានវិបត្តិកូវីដ ដែលកូរ៉េខាងជើងត្រូវសងសឹកវិញ។
ចុះផ្សាយនៅថ្ងៃ៖
ស្តាប់ - ០២:១៩
តាំងពីថ្ងៃទី ២៩ កក្កដាមក កូរ៉េខាងជើងគ្មានករណីឆ្លងថ្មីទេ ! “កូរ៉េខាងជើងបានយកឈ្នះជំងឺកូវីដ១៩។ ចំណាត់ការទប់ស្កាត់ជំងឺរាតត្បាត ជាអភិនិហាដែលមិនធ្លាប់កើតមាននៅក្នុងប្រវត្តិសុខភាពសាធារណៈ។ នេះជាជោគជ័យរបស់ប្រជាពលរដ្ឋកូរ៉េខាងជើង និងជាព្រឹត្តិការណ៍ប្រវត្តិសាស្ត្រដែលអាចប្រាប់ពិភពលោកជាថ្មីម្តងទៀតថា កូរ៉េខាងជើងជារដ្ឋខ្លាំង ពលរដ្ឋមានភាពអត់ធ្មត់ និងប្រកាន់ទំនៀមទម្លាប់ប្រពៃណីបានល្អគួរជាទីមោទនៈ”។ នេះជាប្រសាសន៍របស់លោកគីម ជុងអ៊ុន ទៅកាន់អង្គប្រជុំ និងដែលស្រង់មកចុះផ្សាយដោយទីភ្នាក់ងារសារព័ត៌មានផ្លូវការកូរ៉េខាងជើងKCNA។
ជាប្រទេសដំបូងគេបំផុតមួយដែលបានបិទព្រំដែនភ្លាម គ្រាន់តែលេចឮមានវីរុសនៅចិន នៅខែមករាឆ្នាំ២០២០ កូរ៉េខាងជើងបានប្រកាសរកឃើញអ្នកវិជ្ជមានកូវីដករណីដំបូង នៅថ្ងៃទី ១២ឧសភា២០២២។ ហើយលោក គីម ជុងអ៊ុនបានដឹកនាំយុទ្ធនាការទប់ស្កាត់កូវីដដោយផ្ទាល់តែម្តង។ ជាសរុបកូរ៉េខាងជើងមានករណី “ពលរដ្ឋក្តៅខ្លួន” (អាជ្ញាធរព្យុងយ៉ាងប្រើពាក្យក្តៅខ្លួន ជំនួសពាក្យអ្នកឆ្លងកូវីដ) ចំនួន ជិត៤លាន៨សែននាក់ និងស្លាប់តែ៧៤នាក់ប៉ុណ្ណោះ ពោលគឺមានអត្រាមរណៈជាផ្លូវការត្រឹមតែ០,០០២%ទេ។ នេះបើតាមសារព័ត៌មានKCNAដដែល។ ប៉ុន្តែអ្នកជំនាញ និងអង្គការសុខភាពពិភពលោក មិនទុកចិត្តលើស្ថិតិរបស់កូរ៉េខាងជើងនេះទេ ព្រោះកូរ៉េខាងជើងគ្មានប្រព័ន្ធសុខាភិបាលរឹងមាំ ហើយគ្មានថ្នាំបង្ការប្រឆាំងកូវីដទៀត។ ជាការប្រៀបធៀប កូរ៉េខាងត្បូង មានអត្រាមរណៈដោយកូវីដ១៩ដល់ទៅ ០,១២%។
ក្នុងពេលកំពុងប្រយុទ្ធប្រឆាំងនឹងកូវីដ លោក គីមជុងអ៊ុន ផ្ទាល់ ក៏បានឆ្លងវីរុស និងមានអាការៈក្តៅខ្លួនខ្លាំងជាច្រើនថ្ងៃ។ នេះបើតាមសេចក្តីប្រកាសរបស់លោកស្រី គីម យ៉ូជុង ដោយព្រមានសងសឹកកូរ៉េខាងត្បូង យ៉ាងចាស់ដៃ។ ជាប្អូនស្រីបង្កើតនិងជាទីប្រឹក្សាផ្ទាល់របស់លោក គីម ជុងអ៊ុន ដ៏មានឥទ្ធិពលបំផុត លោកស្រី គីម យ៉ូជុង បានចោទប្រកាន់កូរ៉េខាងត្បូងថា ជាអ្នកចម្លងវីវុសកូវីដ១៩ មកកូរ៉េខាងជើង តាមរយៈខិត្តបណ្ណបង្ហោះតាមប៉េងប៉ោងឆ្លងព្រំដែន។
សម្រាប់អ្នកវិភាគ ពាក្យគំរាមរបស់ គីម យូជុង ពិតជាមានន័យគួរឱ្យព្រួយបារម្ភ ព្រោះកូរ៉េខាងជើងមិនត្រឹមតែប៉ុនប៉ងទម្លាក់កំហុសលើកូរ៉េខាងត្បូងក្នុងករណីមានរលកចម្លងកូវីដថ្មីក្នុងប្រទេសទេ តែជាការស្វែងរកលេសយោធាបង្កហេតុផង។ ប្រកាសទទួលជោគជ័យលើកូវីដ១៩ ជាសារបញ្ជាក់ថាកូរ៉េខាងជើងកំពុងងាកទៅរកអាទិភាពផ្សេង ដូចជា ផ្តល់សន្ទុះដល់សេដ្ឋកិច្ច ឬ ធ្វើការសាកល្បងនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ