ស្ថានការណ៍កូវីដ១៩នៅកូរ៉េខាងជើង៖ ស្លាប់មនុស្ស២១នាក់បន្ថែមទៀត និងជាង៥សែននាក់ «ឈឺក្តៅខ្លួន»
ចុះផ្សាយនៅថ្ងៃ៖
ស្តាប់ - ០៩:០០
ស្ថានការណ៍ឆ្លងរាលដាល ជំងឺកូវីដ១៩ នៅកូរ៉េខាងជើង កំពុងតែបង្កឲ្យមានការព្រួយបារម្ភ កាន់តែខ្លាំង។ បន្ទាប់ពីបានប្រកាសថាមានមនុស្សស្លាប់ ៦នាក់ កាលពីថ្ងៃសុក្រ នៅថ្ងៃសៅរ៍នេះ របបផ្តាច់ការកូរ៉េខាងជើង បានប្រកាសថាមាន២១នាក់ទៀត បានស្លាប់ រីឯអ្នកដែលកំពុងឈឺដោយអាការៈក្តៅខ្លួនខ្លាំងវិញ មានប្រមាណជាង៥សែននាក់។ អ្វីដែលជាការព្រួយបារម្ភបំផុតនោះ គឺក្នុងចំណោមប្រជាជនកូរ៉េខាងជើង ប្រមាណ២៥លាននាក់ គឺគ្មាននរណាបានទទួលការចាក់វ៉ាក់សាំងទេ ហើយជាងនេះទៀត ប្រព័ន្ធសុខាភិបាលប្រទេសនេះ គឺទន់ខ្សោយខ្លាំងណាស់។
ឈឺក្តៅខ្លួនបន្តបន្ទាប់គ្នា ក្រោយថ្ងៃ២៥មេសា
កាលពីថ្ងៃសុក្រទី១៣ឧសភា ទីភ្នាក់ងារព័ត៌មានផ្លូវការកូរ៉េខាងជើង បានប្រកាសថាមានស្លាប់៦នាក់ ដែលក្នុងនោះមាន១នាក់ ដែលមានផ្ទុកកូវីដអូមីក្រុង។ នៅព្រឹកថ្ងៃសៅរ៍ ទីភ្នាក់ងារព័ត៌មានផ្លូវការដដែលនេះ បានផ្សាយថា មានអ្នកស្លាប់ចំនួន២១នាក់បន្ថែមទៀត។ មានន័យថា គិតមកត្រឹមពេលនេះ គឺមានមនុស្សស្លាប់សរុប ចំនួន២៧នាក់។
តែយ៉ាងណា អាជ្ញាធររបបផ្តាច់ការកូរ៉េខាងជើង មិនបានបញ្ជាក់ឲ្យច្បាស់ទេ ថាអ្នកស្លាប់ទាំងនោះ សុទ្ធតែមានផ្ទុកកូវីដឬយ៉ាងណាទេ គ្រាន់តែអះអាងថាសុទ្ធតែឈឺក្តៅខ្លួនខ្លាំង ហើយស្លាប់។ បើតាមលោក Cheong Seong-chang អ្នកជំនាញនៅវិទ្យាស្ថាន Sejong គឺថាវាប្រាកដណាស់ហើយ ដែលអ្នកស្លាប់ទាំងនេះ អាចសុទ្ធតែស្លាប់ដោយកូវីដ។ កូរ៉េខាងជើងមិនបញ្ជាក់ថា មិនមែនថាមិនចង់ទេ តែមកពីគ្មានលទ្ធភាពធ្វើតេស្តរកមេរោគ។
ទាក់ទិននឹងចំនួនមនុស្សធ្លាក់ខ្លួនឈឺវិញ គិតមកត្រឹមពេលនេះ គឺមានចំនួនសរុប ប្រមាណ ជាង៥សែន២ម៉ឺននាក់ហើយ នៅទូទាំងកូរ៉េខាងជើង។ មនុស្សបានធ្លាក់ខ្លួនឈឺតៗគ្នា បន្ទាប់ពីថ្ងៃទី ២៥មេសាមក ជាថ្ងៃដែលរបបផ្តាច់ការនេះ បានរៀបចំកម្មវិធីព្យុហយាត្រកងទ័ព យ៉ាងសម្បើម មានមនុស្សចូលរួមយ៉ាងកកកុញ។ គ្រាន់តែក្នុងថ្ងៃសុក្រ ទី១៣ឧសភា តែមួយថ្ងៃ មានមនុស្សធ្លាក់ខ្លួនឈឺគ្រុនក្តៅ ចំនួន ១៧៤៤៤០នាក់។
ព្រឹកថ្ងៃសៅរ៍ មេដឹកនាំផ្តាច់ការ គីម ជុងអ៊ុន ដែលគឺឃើញបានចាប់ផ្តើមចេញពាក់ម៉ាសនោះ បានដឹកនាំការប្រជុំការិយាល័យនយោបាយបក្សកុម្មុយនីស្ត ជាបន្ទាន់លើកទី២ ដើម្បីដាក់ចេញនូវវិធានការចាំបាច់ ទប់ស្កាត់ការឆ្លងរាលដាលកូវីដ។
ប្រព័ន្ធសុខាភិបាលទន់ខ្សោយខ្លាំង
យោងតាមចំណាត់ថ្នាក់ ដែលស្រាវជ្រាវដោយវិទ្យាស្ថាន Johns Hopkins ក្នុងឆ្នាំ២០២១ ប្រព័ន្ធសុខាភិបាល កូរ៉េខាងជើងស្ថិតនៅលេខរៀងទី១៩៣ ក្នុងចំណោម១៩៥ប្រទេស។ មានន័យថា វាសឹងតែចុងក្រោយគេបង្អស់។ អង្គការក្រៅរដ្ឋាភិបាល អ្នកជំនាញស្រាវជ្រាវគ្រប់គ្នា បានអះអាងថា ប្រព័ន្ធសុខាភិបាលប្រទេសនេះ ទន់ខ្សោយខ្លាំងណាស់។
របបផ្តាច់ការនេះអួតថា ប្រជាជនខ្លួនអាចទទួលបានការព្យាបាលដោយឥតគិតថ្លៃ។ តែធាតុពិត យោងតាមអង្គការក្រៅរដ្ឋាភិបាលជាច្រើន គឺតាមមន្ទីរពេទ្យ គ្មានថ្នាំ គ្មានបរិក្ខាត្រឹមត្រូវទេ គឺមានតែថ្នាំជក់ នឹងទឹកអាកុលតែប៉ុណ្ណោះ សម្រាប់ព្យាបាល។ ប្រជាជនកូរ៉េខាងជើងជាទូទៅ ត្រូវបង្ខំចិត្តស្វែងរកឱសថ តាមរយៈទីផ្សារងងឹតដែលគេលួចនាំចូលទៅ។ គ្រូពេទ្យវិញ ក៏ត្រូវប្រកបរបរ ពិនិត្យព្យាបាលជំងឺ ដោយលួចលាក់ដែរ ដើម្បីបន្ថែមចំណូលបន្តិចបន្តួច។ នេះបើផ្អែកតាមការអះអាង របស់លោក Park Sokeel មន្ត្រីអង្គការ Liberty in North Korea។
ដូចគ្នាដែរ លោក Choi Jung-hun អតីតគ្រូពេទ្យម្នាក់ ហើយដែលបច្ចុប្បន្នបានរត់ភៀសខ្លួនមកកូរ៉េខាងត្បូង បានប្រាប់អ្នកយកព័ត៌មានបារាំង AFP ថា ក្រៅតែក្នុងមន្ទីរពេទ្យធំនៅក្រុងព្យុងយ៉ាង មន្ទីរពេទ្យជនបទ ឬតាមក្រុងតូចៗឯទៀត គឺពុំមានគ្រឿងបរិក្ខា ពុំមានឧបករណ៍សង្គ្រោះបន្ទាន់អ្វីទេ។ បើឈឺធ្ងន់គឺដឹងតែមិនរស់ទេ!
ប្រជាជនកូរ៉េខាងជើងហូបមិនគ្រប់ ខ្វះអាហារូបត្ថម្ភ
ប្រជាជនកូរ៉េខាងជើងជាទូទៅ មានសុខភាពមិនរឹងមាំប៉ុន្មានទេ។ លោកស្រី Lina Yoon អ្នកស្រាវជ្រាវនៅនៅអង្គការ Human Rights Watch បានលើកឡើងថា ប្រជាជនកូរ៉េខាងជើង ភាគច្រើនណាស់ មានបញ្ហាកង្វះអាហាររូបត្ថម្ភជាប្រចាំ ដោយសារតែហូបមិនគ្រប់ គ្មានជីវជាតិ គ្មានប្រូតេអ៊ីន និងវីតាមីនជាដើម។ កាលពីឆ្នាំមុន ប្រព័ន្ធផ្សព្វផ្សាយកូរ៉េខាងជើងខ្លួនឯង ក៏បានផ្សាយដែរថា ប្រជាជនកូរ៉េខាងជើងបានប្រឈមនឹងបញ្ហាខ្វះស្បៀងអាហារ។
អ្នកជំនាញអង្គការសហប្រជាជាតិ បានទាញសញ្ញាអាសន្នផងដែរ ថាអាចប្រជាជនកូរ៉េខាងជើង ច្រើននាក់ ដែលស្លាប់ដោយដាច់ពោះ។ ហើយកាលពីឆ្នាំ២០១៨ អង្គការសុខភាពពិភពលោក បានប្រកាសថា ៨៤% នៃករណីស្លាប់នៅកូរ៉េខាងជើង គឺស្លាប់ដោយបញ្ហាជំងឺ ដែលមិនមែនជាជំងឺឆ្លង តួយ៉ាងដូចជាជំងឺទឹកនោមផ្អែមជាដើម។ ដូច្នេះ កត្តាទាំងអស់នេះ គឺធ្វើឲ្យអ្នកជំនាញបារម្ភណាស់ ព្រោះប្រជាជនកូរ៉េខាងជើង មានសុខភាពទន់ខ្សោយខ្លាំង ងាយប្រឈមនឹងការវាយលុក របស់មេរោគកាចសាហាវ ដូចជាមេរោគជំងឺកូវីដ១៩នេះជាដើម។
២៥លាននាក់ គ្មាននរណាបានចាក់វ៉ាក់សាំង
ពេលផ្ទុះការឆ្លងរាលដាលកូវីដភ្លាមនៅដើមឆ្នាំ២០២០ កូរ៉េខាងជើងបានបិទព្រំដែនភ្លាម ហាមឃាត់ការធ្វើដំណើរចេញចូលជាមួយចិន។ គីម ជុងអ៊ុន បានចេញបញ្ជាឲ្យទាហានព្រំដែន បាញ់សម្លាប់អ្នកណាក៏ដោយ ឲ្យតែហ៊ានលួចឆ្លងព្រំដែនពីចិនចូលមកខាងកូរ៉េខាងជើង។ វិធានការបិទយ៉ាងតឹងតែងនេះ ត្រូវបានរបបនេះអួតថាធ្វើឲ្យគេគ្មានកូវីដសូម្បីមួយករណី។
ចិនបានប្រកាសផ្តល់ជំនួយវ៉ាក់សាំង ចំនួន៣លានដូស តែព្យុងយ៉ាងបានបដិសេធមិនទទួល ហើយថាយកទៅឱ្យអ្នកផ្សេងដែលគេត្រូវការចាំបាច់ទៅ ចំណែកកូរ៉េខាងជើងមិនត្រូវការទេ ព្រោះគ្មានកូវីដផង។ ក្រោយមក យន្តការ Covax របស់អង្គការសុខភាពពិភពលោក ក៏បានស្នើផ្តល់វ៉ាក់សាំង AstraZeneca ឲ្យកូរ៉េខាងជើងដែរ កូរ៉េខាងជើងនៅតែប្រកែកមិនទទួល។ សរុបមក ក្នុងចំណោមប្រជាជនកូរ៉េខាងជើង២៥លាននាក់ គឺគ្មាននរណាបានចាក់វ៉ាក់សាំងបង្ការកូវីដទេ។ នៅតាមប្រទេសខ្លះ ដែលមនុស្សបានចាក់វ៉ាក់សាំង ហើយនៅតែអាចឆ្លងនិងឈឺឈានទៅដល់ស្លាប់ ចុះទម្រាំតែមិនបានចាក់វ៉ាក់សាំងសោះ!
ក្រៅពីមិនបានចាក់វ៉ាក់សាំងឲ្យប្រជាជនហើយ ប្រព័ន្ធសុខាភិបាលកូរ៉េខាងជើងក៏គ្មានលទ្ធភាពធ្វើតេស្តទ្រង់ទ្រាយធំដែរ។ អ្នកជំនាញអះអាងទៀតថា ប្រទេសនេះ ក៏គ្មានលទ្ធភាពរៀបចំទីតាំងធ្វើចត្តាឡីស័ក ដែលត្រឹមត្រូវតាមក្បួនខ្នាតបច្ចេកទេសសុខាភិបាលដែរ ព្រោះគ្មានឧបករណ៍ម៉ាស៊ីនបន្សុទ្ធខ្យល់ សម្លាប់មេរោគ។ ជារួម គឺប្រព័ន្ធសុខាភិបាលទន់ខ្សោយខ្លាំងហើយ សុខភាពប្រជាជនក៏ទ្រុឌទ្រោមងាយធ្លាក់ខ្លួនឈឺ ហើយរដ្ឋមិនបានត្រៀមលក្ខណៈបង្ការទៀត។
សារដោយប្រយោល ដើម្បីសុំជំនួយពីបរទេស
ភ្លាមៗក្រោយដំណឹងថាមានអ្នកស្លាប់ និងអ្នកឈឺច្រើនម៉ឺននាក់នៅកូរ៉េខាងជើងនេះ ចិន កូរ៉េខាងត្បូង និងអង្គការសុខភាពពិភពលោក បានប្រកាសថាគេត្រៀមខ្លួនជួយកូរ៉េខាងជើង ឲ្យតែត្រូវការ។ ក្នុងកិច្ចប្រជុំការិយាល័យនយោបាយបក្ស នៅព្រឹកថ្ងៃសៅរ៍នេះ គីម ជុងអ៊ុន បានលើកឡើងថាត្រូវតែចាត់វិធានការ ដោយយកគម្រូតាមមហាមិត្តចិន ដើម្បីធ្វើយ៉ាងណាការពារអាយុជីវិតប្រជាជន។ គីម ជុងអ៊ុនបានអះអាងទៀតថា នឹងចែកចាយថ្នាំព្យាបាល ឲ្យប្រជាជន។ លោក Leif-Eric Easley សាស្ត្រាចារ្យ នៅសកលវិទ្យាល័យ Ewha ក្រុងសេអ៊ូល លើកឡើងថា សម្តីរបស់លោក គីម ជុងអ៊ុន គឺមានន័យថាស្ថានការណ៍នឹងកាន់តែដុនដាបខ្លាំង។
បើយើងស្តាប់សម្តីប្រកាស របស់ គីម ជុងអ៊ុន ព្រមជាមួយការចុះផ្សាយផ្ទួនៗគ្នា របស់ប្រព័ន្ធផ្សព្វផ្សាយផ្លូវការកូរ៉េខាងជើង គឺវាអាចមានន័យថា កូរ៉េខាងជើងប្រហែលកំពុងតែគ្មានជំរើសទេ ក្រៅតែពីសុំជំនួយពីបរទេស គ្រាន់តែមិនទាន់ដាច់ចិត្តហារមាត់សុំគេ។ ប៉ុន្មានខែដើមឆ្នាំនេះ កូរ៉េខាងជើងប្រឹងអួតសម្បើមណាស់ រឿងបាញ់សាកមីស៊ីលបាលីស្ទីក នុយក្លេអ៊ែរ តែមកដល់រឿងកូវីដជួយជីវិតប្រជាជន បែរជាងាកទៅសុំជំនួយគេ។
លោក Yang Moo-jin សាស្ត្រាចារ្យជំនាញសិក្សាកូរ៉េខាងជើងម្នាក់ទៀត លើកឡើងថា របបព្យុងយ៉ាង អាចនឹងងាកទៅរកទិញថ្នាំ និងបរិក្ខាចាំាបាច់ផ្សេងៗទៀតពីចិន ដូចជាម៉ាស និងឧបករណ៍ធ្វើតេស្តជាដើម។ អ្នកជំនាញរូបនេះ លើកឡើងទៀតថា ការដែលកូរ៉េខាងជើងបានផ្សព្វផ្សាយដំណឹង តាមបណ្តាញព័ត៌មានបរទេស ខ្លះជាភាសាអង់គ្លេសផងនោះ គឺវាជាសារមួយហើយ ដែលបញ្ជាក់ថា កូរ៉េខាងជើងត្រូវការជំនួយ អាចជាវ៉ាក់សាំងពីអាមេរិក និងពីស្ថាប័នអន្តរជាតិផ្សេងទៀត។ ហើយជំនួយមួយទៀតដែលសំខាន់ដែរ គឺស្បៀងអាហារ ព្រោះបើប្រជាជនគ្មានអ្វីបរិភោគ គឺរឹតតែមិនអាចទប់ទល់ឈ្នះកូវីដ!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ