លោកគីម ជុងអ៊ុន បញ្ជាឲ្យកងទ័ពចេញប្រតិបត្តិការគ្រប់គ្រងវិបត្តិកូវីដ
នៅកូរ៉េខាងជើង ចំនួនអ្នកឆ្លងកូវីដបានកើនឡើងដល់ជាង១លាននាក់ ស្លាប់យ៉ាងហោចណាស់ ៥០នាក់ នេះបើតាមតួលេខផ្លូវការផ្តល់ដោយរបបព្យុងយ៉ាង គិតត្រឹមថ្ងៃអាទិត្យទី ១៥ ឧសភា២០២២។ ដោយរិះគន់យ៉ាងខ្លាំង រដ្ឋាភិបាល និងអាជ្ញាធរសុខាភិបាល ថាខ្វះទំនួលខុសត្រូវ លោក គីម ជុងអ៊ុន បានដាក់បញ្ជាឱ្យកងទ័ពចេញធ្វើប្រតិបត្តិការគ្រប់គ្រងវិបត្តិកូវីដ។
ចុះផ្សាយនៅថ្ងៃ៖
ស្តាប់ - ០១:៥៧
កូរ៉េខាងជើងខ្វះធនធានថ្នាំពេទ្យ គ្មានអ្វីគួរឱ្យភ្ញាក់ផ្អើលទេ ប៉ុន្តែនៅពេលដំណឹងស្តីពីការខ្វះថ្នាំសង្កូវ ចេញពីបបូរមាត់របស់លោកប្រមុខដឹកនាំ គីម ជុងអ៊ុន ផ្ទាល់ មានន័យថាស្ថានភាពធ្ងន់ធ្ងរខ្លាំងមែនទែនហើយ។
បើតាមភ្នាក់ងារសារព័ត៌មានផ្លូវការកូរ៉េខាងជើងKCNA នៅក្នុងជំនួបប្រជុំ លោក គីម ជុងអ៊ុន បានរិះគន់រដ្ឋាភិបាលនិងអាជ្ញាធរសុខាភិបាលថាគ្មានទំនួលខុសត្រូវ មិនអាចវាយតម្លៃវិបត្តិកូវីដបានត្រឹមត្រូវ មន្ត្រីទទួលបន្ទុកគ្រប់គ្រងការផ្គត់ផ្គង់ថ្នាំ ធ្វើការយឺតមិនអាចឬក្រចែកចាយថ្នាំដល់ដៃប្រជាជន ហើយឱសថស្ថានមិនអាចបើកលក់បម្រើប្រជាពលរដ្ឋបាន២៤ម៉ោងលើ២៤ម៉ោង។ ហេតុដូច្នេះហើយបានជាលោក គីម ជុងអ៊ុន ចេញក្រិត្យប្រមូលកងកម្លាំងយោធា ដោយបញ្ជាឱ្យកងទ័ពជាអ្នកធ្វើប្រតិបត្តិការគ្រប់គ្រងចែកចាយថ្នាំសង្កូវឱ្យនៅក្រុងព្យុងយ៉ាង ដែលមានលេចករណីកូវីដជាលើកដំបូងនិងជាផ្លូវការកាលពីសប្តាហ៍មុន។
ដោយយល់ថាកូវីដកំពុងធ្វើឱ្យស្ថានភាពប្រទេសក្រឡាប់ចាក់ព្រោះពលរដ្ឋគ្មានចាក់វ៉ាក់សាំងសោះ លោក គីម ជុងអ៊ុន បានចេញមុខគ្រប់គ្រងយុទ្ធនាការប្រយុទ្ធប្រឆាំងនឹងកូវីដដោយផ្ទាល់ ដោយដឹកនាំប្រជុំដោះស្រាយវិបត្តិជារៀងរាល់ថ្ងៃ និងបានចុះទៅត្រួតពិនិត្យមើលឱសថស្ថានមួយដោយផ្ទាល់ទៀតផង នៅថ្ងៃអាទិត្យម្សិលមិញ។
ទោះបីជាបានបិទខ្ទប់ប្រទេសយ៉ាងជិតឈឹងអស់រយៈពេលពីរឆ្នាំក្តី ក៏ដោយចៀសមិនរួច វីរុសនៅតែអាចជ្រៀតចូលក្នុងប្រទេសបាន ជាពិសេសវីរុសបំប្លែងខ្លួនអូមីក្រុងដែលមានអំណាចចម្លងខ្លាំង។ បើតាមភ្នាក់ងារផ្លូវការកូរ៉េខាងជើង ដែលមិនប្រើពាក្យថាកូវីដ ចំនួនអ្នកឆ្លងមានអាការៈក្តៅខ្លួន បានឡើងដល់១លានពីរសែន៣៥៥០នាក់ ស្លាប់៥០នាក់ និងជាង៥សែន៦ម៉ឺននាក់កំពុងទទួលការព្យាបាល។
ប្រឈមនឹងស្ថានភាពបែបនេះ កូរ៉េខាងជើងទំនងជាបានស្នើសុំជំនួយពីចិន។ នេះបើតាមភ្នាក់ងារសារព័ត៌មានកូរ៉េខាងត្បូង ប៉ុន្តែគេមិនដឹងថាតើជាការស្នើសុំថ្នាំបង្ការ ប្រដាប់ធ្វើតេស្ត ឬថ្នាំព្យាបាលទេ។ អ្វីដែលប្រាកដ គឺព្យុងយ៉ាងមិនបានឆ្លើយតបជាផ្លូវការនូវសំណើរបស់លោកប្រធានាធិបតីកូរ៉េខាងត្បូង នាថ្ងៃចន្ទទី ១៦ឧសភានេះ សុំដឹកវ៉ាក់សាំងទៅឱ្យទេ។ លោក យូន ស៊ុកយោល ដែលត្រូវទទួលលោកប្រធានាធិបតីអាមេរិកចូបៃដិន នៅថ្ងៃសុក្រខាងមុខនៅទីសេអ៊ូល បានប្រកាសត្រៀមផ្តល់ជំនួយជាថ្នាំ ជាវ៉ាក់សាំង ព្រមទាំងបុគ្គលិកសុខាភិបាលទៅជួយផង តែព្យុងយ៉ាងប្រហែលជ្រើសរើសយកជំនួយពីដៃគូសេដ្ឋកិច្ចរបស់ខ្លួនគឺចិន ហើយត្រៀមប្រកាន់យកយុទ្ធសាស្ត្រដូចចិនទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ