អ.ស.ប. ៖ អាមេរិកលើកគម្រោងផ្តល់ជំនួយ រយៈពេលមួយឆ្នាំ ដល់អាហ្វហ្កានីស្ថាន
នៅល្ងាចថ្ងៃចន្ទទី ២០ធ្នូ២០២១ សហរដ្ឋអាមេរិកបានលើកសំណើសេចក្តីសម្រេចចិត្តថ្មីមួយទៅក្រុមប្រឹក្សាសន្តិសុខអង្គការសហប្រជាជាតិ ស្តីពីការសម្រួលជំនួយមនុស្សធម៌ ដល់អាហ្វហ្កានីស្ថាន រយៈពេលមួយឆ្នាំ។ គម្រោងនេះ ត្រូវឆ្លងកាត់ការបោះឆ្នោត នៅក្រុមប្រឹក្សាសន្តិសុខ ប៉ុន្តែមិនដឹងថាតើចិនដែលជាសមាជិកអចិន្ត្រៃយ៍មានសិទ្ធិប្រឆាំងវេតូ ព្រមគាំទ្រឬយ៉ាងណាទេ។
ចុះផ្សាយនៅថ្ងៃ៖
ស្តាប់ - ០១:៥២
សំណើថ្មីនេះ បានកំណត់ថា ក្នុងរយៈពេលមួយឆ្នាំ ជំនួយមនុស្សធម៌ និងរាល់គ្រប់សកម្មភាពដែលមានពាក់ព័ន្ធនឹងសេចក្តីត្រូវការជាចាំបាច់របស់មនុស្ស នៅអាហ្វហ្កានីស្ថាន មិនមែនជាការរំលោភសេចក្តីសម្រេចចិត្តរបស់ក្រុមប្រឹក្សាសន្តិសុខលេខ ២២៥៥ កាលពីឆ្នាំ២០១៥ ដាក់ទណ្ឌកម្មលើពួកតាលីបង់ទេ។ គម្រោងសេចក្តីសម្រេចចិត្ត ក៏បានបើកផ្លូវឱ្យមានសកម្មភាពគ្រប់គ្រង និងទូទាត់មូលនិធិ បំណុល ហិរញ្ញវត្ថុ ឬធនធានសេដ្ឋកិច្ច ព្រមទាំងការផ្តល់ទំនិញ និងសេវាកម្មចាំបាច់ ដើម្បីទ្រទ្រង់ និងធានាសកម្មភាពមនុស្សធម៌ដែរ។ គម្រោងច្បាប់បានលើកទឹកចិត្ត ឱ្យអ្នកផ្គត់ផ្គង់ជំនួយមនុស្សធម៌ ត្រូវចេះប្រុងប្រយ័ត្ន និងកាត់បន្ថយឱ្យបានច្រើនបំផុតកុំពាក់ព័ន្ធ ដោយត្រង់ ឬដោយពង្រាងជាមួយក្រុមដែលជាប់ទណ្ឌកម្មអន្តរជាតិ។ បើតាមគម្រោងសេចក្តីសម្រេចចិត្ត ការត្រួតពិនិត្យទិសដៅនៃជំនួយ ត្រូវប្រព្រឹត្តទៅនៅពីរខែក្រោយផែនការលេចជារូបរាងពិត។
គម្រោងសេចក្តីសម្រេចចិត្តស្នើឡើងដោយអាមេរិកនេះត្រូវឆ្លងកាត់ការបោះឆ្នោតនៅក្រុមប្រឹក្សាសន្តិសុខអង្គការសហប្រជាជាតិ។ ចិនដែលមានសិទ្ធិប្រឆាំងវេតូ មិនទាន់បានបញ្ជាក់អំពីជំហររបស់ខ្លួននៅឡើយទេ។ ឯកអគ្គរដ្ឋទូតចិនប្រចាំអង្គការសហប្រជាជាតិ បានបង្ហោះសារមួយថា ជំនួយមនុស្សធម៌ និងជំនួយចាំបាច់សម្រាប់រស់ ត្រូវទៅដល់ដៃពលរដ្ឋអាហ្វហ្កានីស្ថាន ដោយគ្មានលក្ខខណ្ឌ។
សូមបញ្ជាក់ថា នៅមុននេះបន្តិច ចិន គាំទ្រដោយរុស្ស៊ី បានច្រានចោលគម្រោងទីមួយរបស់អាមេរិករួចម្តងហើយ។ ជាគម្រោងចង់ផ្តល់ជំនួយមនុស្សធម៌ឱ្យអាហ្វហ្កានីស្ថាន ដោយលើកទណ្ឌកម្មតាមករណីជាក់ស្តែងមួយៗ ដើម្បីកុំឱ្យជំនួយនោះបានធ្លាក់ដល់ដៃពួកតាលីបង់។ ប៉ុន្តែសូម្បីឥណ្ឌា បារាំងនិងអង់គ្លេស ក៏មិនគាំទ្រដែរ។ ហេតុដូច្នេះហើយ បានជាសហរដ្ឋអាមេរិក បង្ខំចិត្តត្រូវកែសម្រួលខ្លឹមសារនិងលើកសំណើសេចក្តីសម្រេចចិត្តថ្មី ដាក់ជូនក្រុមប្រឹក្សាសន្តិសុខអង្គការសហប្រជាជាតិមួយទៀតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ