ក្រុមប្រទេសអ៊ីស្លាមរៀបចំជំនួបកំពូលដើម្បីនិយាយពីវិបត្តិមនុស្សធម៌នៅអាហ្វហ្កានីស្ថាន
នៅថ្ងៃអាទិត្យ ទី១៩ ធ្នូ អ្នកតំណាងមកពី ៥៧ប្រទេសនៃអង្គការកិច្ចសហប្រតិបត្តិការអ៊ីស្លាមបានរួមប្រជុំគ្នានៅក្នុងទីក្រុងអ៊ីស្លាម៉ាបាត ប្រទេសប៉ាគីស្ថាន។ កិច្ចប្រជុំវិសាមញ្ញនេះផ្តោតសំខាន់លើវិបត្តិមនុស្សធម៌នៅក្នុងប្រទេសអាហ្វហ្កានីស្ថាន។ តាំងពីការឡើងកាន់អំណាចរបស់ពួកតាលីបង់នៅអាហ្វហ្កានីស្ថានក្នុងខែសីហា នេះជាលើកទី១ ដែលអង្គការនៃកិច្ចសហប្រតិបត្តិការអ៊ីស្លាមបើកជំនួបកំពូលដើម្បីនិយាយពីបញ្ហាអាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០១:៤៩
មិនមែនជារឿងចៃដន្យទេដែលអង្គការនៃកិច្ចសហប្រតិបត្តិការអ៊ីស្លាមបានបើកកិច្ចប្រជុំដើម្បីជជែកពីវិបត្តិមនុស្សធម៌នៅក្នុងប្រទេសអាហ្វហ្កានីស្ថាន។ មិនចៃដន្យ ព្រោះតាំងពីការឡើងកាន់អំណាចជាថ្មីរបស់ពួកតាលីបង់មក មានលុយជាច្រើនលានដុល្លារ និងជំនួយត្រូវបានសហគមន៍អន្តរជាតិបង្កក និងផ្អាក។ នេះជាដើមចមនៃការបង្កឲ្យមានហានិភ័យវិបត្តិមនុស្សធម៌ធំធេងសម្រាប់ពលរដ្ឋអាហ្វហ្កានីស្ថានទាំង ៣៨លាននាក់ ពិសេសចំពេលជិតចូលដល់រដូវត្រជាក់។
តាមអង្គការសហប្រជាជាតិ អាហ្វហ្កានីស្ថានបានប្រឈមនឹងគ្រោះមហន្តរាយមនុស្សជាតិមួយដ៏អាក្រក់លើលោក។ ចំណែកអង្គការស្បៀងអាហារពិភពលោកបានព្រមានប្រឆាំងនឹងគ្រោះអត់ឃ្លាននាពេលខាងមុខ។ ដូច្នេះជំនួបកំពូលរយៈពេល ១ថ្ងៃរបស់អង្គការនៃកិច្ចសហប្រតិបត្តិការអ៊ីស្លាមពេលនេះត្រូវផ្តោតសំខាន់ពីការសន្យាផ្តល់ជំនួយមនុស្សធម៌ឲ្យប្រជាជនអាហ្វហ្កានីស្ថាន។ ក្រៅពីវត្តមានអ្នកតំណាងមកពី ៥៧ប្រទេសនៃអង្គការកិច្ចសហប្រតិបត្តិការអ៊ីស្លាម ជំនួបកំពូលក៏មានការចូលរួមពីអ្នកតំណាងសហរដ្ឋអាមេរិក ចិន រុស្ស៊ី សហភាពអឺរ៉ុប និងអង្គការសហប្រជាជាតិដែរ។
តែក្នុងចំណោមប្រទេសដែលមានវត្តមាននៅក្នុងជំនួបកំពូលពេលនេះ នៅមិនទាន់មានប្រទេសណាមួយបានទទួលស្គាល់របបតាលីបង់នៅឡើយទេតាំងពីពួកនេះបានឡើងកាន់អំណាចនាពាក់កណ្តាលខែសីហាកន្លងទៅ។ បើតាមប្រមុខការទូតប៉ាគីស្ថាន ជំនួបកំពូលនេះនិយាយពីប្រជាជនអាហ្វហ្កានីស្ថានទូទៅ ពោលមិនមែននិយាយសំដៅលើក្រុម ឬចលនាណាមួយទេ។ ប្រមុខការទូតប៉ាគីស្ថានបានបន្ថែមដោយលើកឡើងពីភាពខុសគ្នារវាងការទទួលស្គាល់ និងការសន្យាជាមួយរបបថ្មីនៅអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ