ហ្វីលីពីននឹងផ្តើមបើកសាលារៀនចំនួន១២០ ក្នុងដំណាក់កាលសាកល្បង
ដោយហេតុកូវីដ រដ្ឋអំណាចហ្វីពីលីនបានបិទទ្វារសាលារៀននៅទូទាំងប្រទេសជាងមួយឆ្នាំមកហើយ។ រហូតដល់ថ្ងៃចន្ទ ទី២០ កញ្ញាម្សិលមិញនេះ ទើបលោកប្រធានាធិបតី ឌុយទែរតេ ប្រកាសអនុញ្ញាតឲ្យសាកល្បងបើកសាលារៀនឡើងវិញចំនួន ១២០ តែត្រូវកំណត់ចំនួនសិស្សនិងម៉ោងរៀន។
ចុះផ្សាយនៅថ្ងៃ៖
ស្តាប់ - ០២:៣៦
ខណៈដែលសឹងតែគ្រប់ប្រទេសនៅលើពិភពលោកបានបើកសាលារៀនឡើងវិញដោយផ្នែកនិងពេញលេញសម្រាប់កម្មវិធីបង្រៀនដោយផ្ទាល់ក្នុងថ្នាក់ ប្រទេសហ្វីលីពីនវិញបានបិទសាលាទាំងស្រុងចាប់តាំងពីផ្ទុះការឆ្លងរាលដាលជំងឺកូវីដដំបូងកាលពីខែមីនា ឆ្នាំ ២០២០។
ទើបតែនៅថ្ងៃទី ២០ កញ្ញា ក្រោមការណែនាំដែលអនុម័តដោយលោកប្រធានាធិបតីឌុយទែរតេ សាលាមួយចំនួននៅក្នុងប្រទេសហ្វីលីពីនអាចបើកទ្វារទទួលបង្រៀងសិស្សក្នុងថ្នាក់ទល់មុខគ្នាបាន។ សាលារដ្ឋចំនួន១០០ ដែលស្ថិតនៅក្នុងតំបន់មានហានិភ័យតិចតួចបំផុតនៃការចម្លងជំងឺកូវីដនឹងទទួលបានភ្លើងខៀវក្នុងការបើកសាលាសាកល្បងឡើងវិញចំនួនពីរខែ។ ហើយមាន ២០ សាលាផ្សេងទៀត គឺជាសាលាឯកជន។
ថ្នាក់រៀននឹងត្រូវបើកសម្រាប់កុមារថ្នាក់មត្តេយ្យដល់ថ្នាក់ទី៣ និងថ្នាក់វិទ្យាល័យ។ ប៉ុន្តែចំនួនសិស្សនិងចំនួនម៉ោងរៀនក្នុងថ្នាក់នឹងត្រូវមានកំណត់។ ប្រសិនបើការបើកសាលាសាកល្បងនេះមានសុវត្ថិភាព នោះអាជ្ញាធរហ្វីលីពីននឹងបង្កើនចំនួនសាលារៀនដែលត្រូវបើកបន្ថែមទៀត។
គួរបញ្ជាក់ថាកាលពីពេលកន្លងទៅ ប្រមុខដឹកនាំហ្វីលពីលីនលោកឌុយទែរតេ បានបដិសេធទៅនឹងសំណើសុំបើកសាលាសាកល្បងដោយបារម្ភខ្លាចថាក្មេងៗអាចឆ្លងជំងឺកូវីដ១៩ រួចបន្ទាប់មកទៀតចម្លងជំងឺនេះទៅមនុស្សចាស់។
ប៉ុន្តែដោយមានការអំពាវនាវខ្លាំងឡើងពីមូលនិធិកុមាររបស់អង្គការសហប្រជាជាតិនិងពីក្រុមគ្រូបង្រៀនជាច្រើននាក់ដែលព្រួយបារម្ភពីវិបត្តិអប់រំ ប្រមុខរដ្ឋអំណាចហ្វីលីពីនសម្រេចឲ្យបើកទ្វារសាលារៀន ១២០សម្រាប់ដំណាក់កាលសាកល្បងលើកដំបូង។ សាលារៀនដែលចង់បើកទ្វារក្នុងដំណាក់កាលសាកល្បងនេះ នឹងត្រូវវាយតម្លៃហើយប្រសិនបើសាលាទាំងនោះត្រៀមលក្ខណៈគ្រប់គ្រាន់រួចរាល់ហើយនោះ អាជ្ញាធរមូលដ្ឋាននឹងអនុញ្ញាតឲ្យពួកគេបើកដំណើរការឡើងវិញបាន។ ចំណែកការយល់ព្រមជាលាយលក្ខណ៍អក្សរពីពុកម្តាយឬអាណាព្យាបាលសិស្សចាំបាច់ត្រូវមានផងដែរ។
យ៉ាងណាក៏ដោយរហូតមកដល់ពេលនេះ គេនៅមិនទាន់ដឹងច្បាស់នោះទេថាតើការបើកសាលារៀនសាកល្បងនឹងចាប់ផ្តើមនៅពេលណាឲ្យប្រាកដ ឬក៏សាលាណាមួយឲ្យជាក់ច្បាស់ដែលមានឈ្មោះឲ្យបើកសាកល្បង។ អ្វីដែលគេដឹងច្បាស់នៅពេលនេះ គឺកម្មវិធីរៀនសូត្រលាយបញ្ចូលគ្នាដែលរួមមានថ្នាក់រៀនអនឡាញ ការផ្ញើបញ្ជូនឯកសារមេរៀន និងមេរៀនដែលផ្សាយនៅលើកញ្ចក់ទូរទស្សន៍ និងប្រព័ន្ធផ្សព្វផ្សាយសង្គមនឹងនៅបន្តប្រព្រឹត្តធ្វើនៅហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ